पुना वेस्टर्न क्लब करंडक: राजस्थान रॉयल ॲकॅडमीचे सलग दोन विजय, फराटेची नाबाद ७३

डीजेएसजी क्रिकेट ॲकॅडमी आणि स्पोर्ट्‌स व्हेंचर यांनी मिळून आयोजित केलेल्या 'पुना वेस्टर्न क्लब करंडक' आंतरक्लब १३ वर्षांखालील मुलांच्या टी-२० स्पर्धेत राजस्थान रॉयल ॲकॅडमी (पुणे) संघाने जोरदार सुरुवात केली आहे. या संघाने सलग दोन सामने जिंकून पुढे वाटचाल केली.

भुगाव येथील द पूना वेस्टर्न क्लब (पीडब्ल्युसी) मैदानावर झालेल्या पहिल्या सामन्यात राजस्थान रॉयल संघाने लाईनअप क्रिकेट ॲकॅडमीचा ६८ धावांनी पराभव केला. नाणेफेक जिंकून राजस्थानने आधी फलंदाजी घेतली आणि १८ षटकांत ४ बाद १८० धावा केल्या.

या डावात विराज फराटे याने ३७ चेंडूंत १० चौकार आणि ४ षटकारांसह नाबाद ७३ धावांची आक्रमक खेळी केली. वर्धन कुमारने ३९ धावा आणि आर्यन उचित याने ३४ धावा करून त्याला चांगली साथ दिली. लाईनअप क्रिकेट ॲकॅडमीकडून ओम बुरके याने एक गडी बाद केला.

उत्तरादाखल लाईनअप क्रिकेट ॲकॅडमीचा संपूर्ण संघ १६.५ षटकांत ११२ धावांवर बाद झाला. ओम बुरके आणि अवनीश कुलकर्णी यांनी प्रत्येकी २१ धावा केल्या. राजस्थानच्या अर्जुन मिश्रा (२/१), अनिरूध्द शिवकुमार (२/४) आणि संचित कुमार (२/१७) यांनी प्रत्येकी दोन गडी बाद करून भेदक मारा केला. विराज फराटे सामनावीर ठरला.

दुसऱ्या सामन्यात राजस्थान रॉयल्स् ॲकॅडमीने स्पार्क क्रिकेट ॲकॅडमीचा ८९ धावांनी धुव्वा उडवला. आधी फलंदाजी करताना राजस्थानने २० षटकांत ५ बाद २१५ धावा उभारल्या.

या डावात भुजंग धुलगुंड याने अवघ्या ४४ चेंडूंत ७ चौकार आणि १० षटकारांच्या जोरावर ९५ धावांची वादळी खेळी केली. रणवीर मालवडकर याने ४६ चेंडूंत ६४ धावांचे मोलाचे योगदान दिले, तर विनायक जाधव याने २३ धावा केल्या. स्पार्क क्रिकेट ॲकॅडमीकडून यश गायकवाड याने ३७ धावांत ४ गडी बाद केले.

२१६ धावांचे आव्हान पेलताना स्पार्क क्रिकेट ॲकॅडमीचा डाव १४.२ षटकांत फक्त १२६ धावांवर संपला. विहान कार्डेकर याने ४४ आणि यश गायकवाड याने २९ धावा केल्या, पण त्यांचा प्रतिकार अपुरा पडला. राजस्थानकडून अर्यमन पाविया याने ३ धावांत ३ गडी टिपले, तर सदगुरू रेड्डी (२/२१) आणि विनायक जाधव (२/२४) यांनी प्रत्येकी दोन गडी बाद केले. भुजंग धुलगुंड या सामन्याचा सामनावीर ठरला.

गटसाखळी फेरीतील या दोन्ही विजयांमुळे राजस्थान रॉयल ॲकॅडमीचा संघ स्पर्धेत आत्मविश्वासाने पुढे जात आहे. फलंदाजांची धडाकेबाज खेळी आणि गोलंदाजांचा अचूक मारा, या दोन्ही जोरावर त्यांनी प्रतिस्पर्ध्यांना वरचढ होऊ दिले नाही.