पुणे महापालिकेचा एथर एनर्जीशी करार; स्कूटरच्या डेटावरून रस्त्यांची दुरुस्ती ठरवणार

पुणे, 29 ऑक्टोबर 2026: पुणे महापालिकेने (PMC) एथर एनर्जी लिमिटेडशी सामंजस्य करार (MoU) केला आहे. तंत्रज्ञानावर आधारित रस्त्यांवरील अडथळ्यांचा डेटा वापरून पुणे शहरातील खड्डे, खराब झालेले रस्त्यांचे पट्टे आणि रस्त्याच्या पृष्ठभागावरील इतर समस्या शोधणे हा या कराराचा उद्देश आहे.

प्रस्तावित सहकार्यानुसार, एथरच्या कनेक्टेड इलेक्ट्रिक स्कूटरमधून तयार होणारा एकत्रित (aggregated) डेटा महापालिका एक अतिरिक्त डिजिटल माहिती म्हणून वापरणार आहे. त्याद्वारे रस्त्यांची स्थिती तपासणे, दुरुस्तीची प्राधान्ये ठरवणे आणि नेमकी देखभाल करण्याचे नियोजन करणे शक्य होईल.

एथरच्या प्रस्तावानुसार, पुण्यात 24,000 पेक्षा जास्त एथर स्कूटर चालतात. कंपनीच्या कनेक्टेड गाड्यांमध्ये टेलिमेट्री आणि सेन्सरवर आधारित तंत्रज्ञान आहे. रोजच्या प्रवासात रस्त्यांच्या स्थितीची माहिती त्याद्वारे गोळा केली जाते.

या सहकार्यातून महापालिकेला जीपीएस आणि लोकेशनवर आधारित एकत्रित माहिती मिळेल. त्यात खड्डे, रस्ते खोदलेली ठिकाणे (road cuts), स्पीड ब्रेकर आणि रस्त्याच्या पृष्ठभागावरील इतर अनियमितता यांचा समावेश असेल. ही माहिती Road Health Maps च्या स्वरूपात मांडली जाणे अपेक्षित आहे. त्यामुळे कुठे लक्ष द्यावे लागेल, हे महापालिकेच्या अधिकाऱ्यांना समजू शकेल.

या डेटामुळे अडचणीचे रस्ते ओळखणे, दुरुस्तीच्या कामांना प्राधान्य देणे, नेमके उपाय आखणे आणि ज्या ठिकाणी रस्त्यांच्या समस्या पुन्हापुन्हा येतात तिथे लक्ष ठेवणे महापालिकेला शक्य होईल, अशी अपेक्षा आहे. हा डेटा महापालिकेच्या सध्याच्या रस्ते देखभालीच्या कामाला आणि प्रत्यक्ष पाहणीला पर्याय नसेल, तर त्याला पूरक असेल.

प्रस्तावित व्यवस्थेनुसार नागरिकांची किंवा एथरच्या ग्राहकांची वैयक्तिक माहिती महापालिकेला दिली जाणार नाही. महापालिकेला फक्त एकत्रित लोकेशनवर आधारित माहिती मिळेल.

डेटा किती मिळेल, हे शहरात एथर स्कूटर प्रत्यक्षात कुठे फिरतात यावर अवलंबून असेल. ही माहिती महापालिकेच्या अधिकाऱ्यांनी प्रत्यक्ष जागेवर केलेल्या पडताळणीसोबत वापरली जाणे अपेक्षित आहे. आपोआप गोळा होणाऱ्या डेटाच्या अचूकतेची स्वतंत्र हमी एथरच्या प्रस्तावात दिलेली नाही.

हा सामंजस्य करार एक वर्ष लागू राहील. या काळात महापालिका आणि एथर हे तंत्रज्ञान आणि कनेक्टेड मोबिलिटी डेटा पुण्यातील रस्ते व्यवस्थापनाला आणि पायाभूत सुविधांच्या नियोजनाला कशी मदत करू शकतात, याचा अभ्यास करतील.

करारावर सही करताना महापालिका आयुक्त नवल किशोर राम, अतिरिक्त महापालिका आयुक्त प्रजित नायर, शहर अभियंता अनिरुद्ध पावसकर आणि माहिती तंत्रज्ञान विभागप्रमुख राहुल जगताप उपस्थित होते. एथर एनर्जीतर्फे प्रॉडक्ट प्रमुख आणि चीफ ऑफ स्टाफ मिलिंद कोठेकर, कॉर्पोरेट, कायदा आणि सार्वजनिक धोरण विभागाचे डॉ. सुरेंदर सिंघरोहा, सीनियर प्रॉडक्ट मॅनेजर ऋषिकेश प्रधान आणि गव्हर्नमेंट रिलेशन्स अँड पॉलिसी विभागाचे अमोल मोहिते उपस्थित होते.

या उपक्रमाबद्दल बोलताना महापालिका आयुक्त नवल किशोर राम म्हणाले, "रस्त्यांची देखभाल प्रभावीपणे करण्यासाठी आणि प्रवाशांच्या सुरक्षेसाठी रस्त्यांतील दोष वेळेवर ओळखणे महत्त्वाचे आहे. या सहकार्यातून मिळणारा डेटा अडचणीचे रस्ते ओळखण्यासाठी, दुरुस्तीच्या कामांना प्राधान्य देण्यासाठी आणि वारंवार येणाऱ्या समस्यांवर लक्ष ठेवण्यासाठी अतिरिक्त माहितीचा स्रोत ठरेल. तंत्रज्ञानावर आधारित माहिती आणि प्रत्यक्ष जागेवरील पाहणी यांची सांगड घालून पुण्यातील रस्ते व्यवस्थापन अधिक डेटाआधारित आणि प्रभावी करण्याचा महापालिकेचा प्रयत्न आहे."