जरांगेंच्या ऑडिओ क्लिपवरून सुषमा अंधारेंचा शिंदे-फडणवीसांना इशारा: "कर्मा रिटर्न्स"

मराठा आंदोलक मनोज जरांगे यांनी दोन दिवसांपूर्वी पत्रकार परिषदेत एक ऑडिओ क्लिप ऐकवली. तेव्हापासून महाराष्ट्राच्या राजकारणात खळबळ उडाली आहे. शिवसेना आणि भाजपच्या नेत्यांमध्ये यावरून खडाजंगी सुरू झाली आहे. नेते एकमेकांवर टीका करत असतानाच शिवसेना ठाकरे गटाच्या उपनेत्या सुषमा अंधारे यांनी सोशल मीडियावर पोस्ट लिहून आपला संताप व्यक्त केला आहे.

अंधारे यांनी पोस्टमध्ये म्हटले आहे की, दोन दिवसांपूर्वी त्यांनी फक्त दीड मिनिटांचा एक तुकडा ऐकला होता. आज त्यांनी संपूर्ण 30-32 मिनिटांची ऑडिओ ऐकली आणि त्या बधिर झाल्यासारख्या झाल्या. उदयनराजेंनाही आपण मॅन्युपलेट (manipulate) करू शकू, असे सुशील कुलकर्णीला वाटते, याकडे त्यांनी बोट दाखवले. हा कुलकर्णीचा माज आहे की उदयनराजेंची अवहेलना, असा सवाल त्यांनी केला. उदयनराजे किंवा त्यांचे समर्थक यावर काहीच का बोलत नाहीत, असेही त्यांनी विचारले.

क्लिपमध्ये सुशील कुलकर्णी आणि अतुल भातखळकर हे उद्धव साहेबांबद्दल फेक नरेटीव्ह कसे तयार करायचे, यावर बेशरमपणे चर्चा करतात, असा अंधारे यांचा आरोप आहे. वाढवण बंदर किंवा अनेक प्रकल्पांच्या नावाखाली लोकांना विस्थापित करण्याला जो विरोध करेल, तो देशविरोधी आहे आणि त्याला अमेरिका किंवा चीनकडून फंडिंग मिळते, हे नरेटीव्ह रुजवता येईल, असे कुलकर्णी सांगतो. त्यासाठी विविध वर्तमानपत्रांना मॅन्युपलेट करता येईल, असेही तो म्हणतो. वर्तमानपत्रांनी याच्याविरुद्ध रान उठवायला हवे होते, कारण हा त्यांच्या विश्वासार्हतेचाही प्रश्न आहे, असे अंधारे यांनी म्हटले आहे.

या चर्चेत आपल्या नावाचाही उल्लेख असल्याचे अंधारे यांनी सांगितले. स्त्री कुठल्याही हल्ल्याने खचत नाही, तेव्हा तिच्या चारित्र्यावर हल्ला केला जातो, असे त्या म्हणाल्या. अंधारेंचे मॅन्युपीलेशन करता येणार नाही, हे यातून स्पष्ट झाले, असेही त्यांनी नमूद केले.

क्लिपमध्ये श्वेता आणि शालिनी यांचाही उल्लेख असल्याचे अंधारे यांनी लिहिले आहे. भाजपसाठी पर्सेप्शनवर काम करणारी एक महिला बैठकीतल्या इतरांना सांगते की, जरांगेंना शिंदेंनी 500 कोटी रुपये दिले आणि ते भाजपकडून घेऊन दिले. हे गंभीर भाष्य आहे, असे अंधारे म्हणतात. पाचशे कोटी शिंदेंनी आणले की नाही, यावर शिंदेंच्या गोटातून अनेक जण चर्चा करतात. मुख्यमंत्री फडणवीस क्लिप तपासू असे म्हणतात, पण आम्ही पैसे दिलेच नाहीत, असे स्पष्टपणे म्हणत नाहीत, असेही त्यांनी लिहिले आहे. नेमके कोण कोणाचा गेम करतंय, असा प्रश्न त्यांनी उपस्थित केला.

जरांगेंचे आंदोलन शरद पवार चालवतात किंवा त्याला ठाकरेंचे पाठबळ आहे, हे लोकांना पुन्हा पुन्हा सांगूया, वेगवेगळ्या युट्युब चॅनेलवरून हे खोटे पेरत राहूया, यावर राजरोसपणे रणनीती आखली जाते, असे अंधारे यांनी म्हटले आहे. सुशील कुलकर्णी, अतुल भातखळकर, श्वेता, शालिनी आणि अतुल लिमये यांचा त्यांनी नावानिशी उल्लेख केला. मराठे शक्तिशाली असले तरी ते स्वतःचा मेंदू वापरू शकत नाहीत, असे यांना दाखवायचे आहे, असा त्यांचा दावा आहे.

मोठ्या उभ्या राहिलेल्या आंदोलनाला सुपारीबाज लोक पैसे घेऊन बदनाम करायला पुढे येतात, हे सुमारे 30 मिनिटांची क्लिप ऐकल्यावर लक्षात येते, असे अंधारे म्हणतात. जरांगेंनी पैसे खाल्ले, इथपासून त्यांच्या फार्म हाऊसवर बायका असायच्या, इथपर्यंत बोलणाऱ्या महिला मराठा समाजातूनच तयार केल्या जातात, असा आरोपही त्यांनी केला. आक्रमण बाहेरून होते तेव्हा माणूस हिंमत ठेवतो, पण उठाव आतून झाला की तो खचतो, असेही त्या म्हणाल्या.

ऑडिओ क्लिप खरी आहे आणि त्यातले आवाज कुणाकुणाचे आहेत, हे प्रत्येकाला कळते, असे अंधारे यांनी म्हटले आहे. मात्र सत्ताधाऱ्यांना ती खोटी ठरवायला क्षणाचाही वेळ लागणार नाही, असे त्या म्हणाल्या. हे षडयंत्र विसरायचे की लक्षात ठेवायचे, ते लोकांनी ठरवायचे आहे, असे सांगत त्यांनी शेवटी शिंदे आणि फडणवीस यांना उद्देशून लिहिले की, एक गोष्ट नक्की लक्षात ठेवा, karma returns.