एसटी कर्मचाऱ्यांची दिवाळी गोड होणार; पगार सणाआधीच खात्यात जमा करण्याचे प्रताप सरनाईक यांचे निर्देश

महाराष्ट्र राज्य मार्ग परिवहन महामंडळाच्या म्हणजेच एसटीच्या सुमारे 83 हजार अधिकारी आणि कर्मचाऱ्यांची यंदाची दिवाळी आनंदात जाणार आहे. परिवहन मंत्री आणि एसटी महामंडळाचे अध्यक्ष प्रताप सरनाईक यांनी एक महत्त्वाचा निर्णय घेतला आहे. या निर्णयामुळे कर्मचाऱ्यांच्या पगाराचा प्रश्न मार्गी लागण्याच्या दिशेने पावले उचलली गेली आहेत.

कर्मचाऱ्यांना दिवाळी कोणत्याही अडचणीशिवाय आणि उत्साहात साजरी करता यावी, म्हणून या महिन्याचा पगार सणाआधीच त्यांच्या बँक खात्यात जमा करावा, असे स्पष्ट निर्देश सरनाईक यांनी एसटी प्रशासनाला दिले आहेत.

एरवी एसटीतील कर्मचाऱ्यांचा पगार दर महिन्याला 7 ते 10 तारखेच्या दरम्यान दिला जातो. पण यंदा दिवाळी 6 नोव्हेंबरपासूनच सुरू होत आहे. सणाच्या तोंडावर घरखर्च, खरेदी आणि कुटुंबाचे नियोजन वेळेत करायचे असेल, तर पगार सणाआधी हातात पडणे गरजेचे असते. कर्मचाऱ्यांची ही बाजू लक्षात घेऊन मंत्री सरनाईक यांनी प्रशासनाला वेळेत कार्यवाही करण्याचे आदेश दिले आहेत.

पगार दिवाळीआधी देता यावा, यासाठी महामंडळाच्या अर्थ व नियोजन विभागाने राज्य सरकारकडे तातडीने पाठपुरावा करावा, अशा कडक सूचनाही देण्यात आल्या आहेत. कर्मचाऱ्यांच्या पगारासाठी लागणारे सरकारी अनुदान मिळवण्यासाठी, तसेच मागील महिन्यांतील विविध प्रवासी सवलतींपोटी सरकारकडून येणे असलेली थकीत रक्कम वेळेत मिळवण्यासाठी विशेष प्रयत्न करावेत, असेही सरनाईक यांनी स्पष्ट केले आहे. महामंडळाला कोणतीही आर्थिक अडचण आली किंवा निधीची कमतरता भासली, तरी त्याचा फटका कर्मचाऱ्यांच्या आनंदाला बसू नये, याला प्राधान्य देण्यात आले आहे.

एसटी महामंडळाला रोजचा चालवण्याचा खर्च, इंधनाचा खर्च आणि पगाराची जबाबदारी पार पाडताना अनेकदा आर्थिक ताण सहन करावा लागतो. अशा वेळी सरकारशी नीट समन्वय साधून आणि निधी वेळेत उपलब्ध करून घेऊन दिवाळीआधी पगार खात्यात टाकणे, हे प्रशासनासमोरचे मोठे आव्हान आहे.

तरीही मंत्र्यांच्या या निर्णयामुळे राज्यातील हजारो एसटी कर्मचाऱ्यांना मोठा दिलासा मिळाला आहे. आता पगार प्रत्यक्षात कोणत्या तारखेला जमा होतो आणि प्रशासन या निर्देशांची किती लवकर अंमलबजावणी करते, याकडे राज्यभरातील 83 हजार एसटी कर्मचाऱ्यांचे लक्ष लागले आहे.