पूर्णेकर हत्या: मिनाक्षी शिंदेंनी सुपारी दिल्याचा संजय राऊत यांचा आरोप

ठाकरे गटाचे नेते संजय राऊत यांनी प्रदीप पूर्णेकर यांच्या हत्येबाबत मोठा दावा केला आहे. त्यांच्या म्हणण्यानुसार, शिंदे गटाच्या माजी महापौर मिनाक्षी शिंदे यांनी पती राजेंद्र शिंदे यांना हत्येची सुपारी दिली आणि राजेंद्र शिंदे यांनी ती पुढे खालच्या लोकांना दिली. ठाण्याचे पालकमंत्री एकनाथ शिंदे यांना याची माहिती आहे, असेही राऊत यांनी म्हटले आहे. माध्यमांशी बोलताना त्यांनी हे आरोप केले. यावर शिंदे गटाकडून काय प्रतिक्रिया येते, याकडे आता सर्वांचे लक्ष लागले आहे.

राऊत यांच्या म्हणण्यानुसार, पूर्णेकर यांच्या हत्येचा कट रचण्यात मिनाक्षी शिंदे आणि राजेंद्र शिंदे यांचा सहभाग आहे आणि त्याचे पुरावे आहेत. हत्येच्या एक तास आधी सर्व आरोपी राजेंद्र शिंदे यांच्यासोबत बसले होते, असे ते म्हणाले. या प्रकरणाच्या मुख्य सूत्रधार मिनाक्षी शिंदे आहेत आणि त्यांनीच पती राजेंद्र शिंदे यांना सुपारी दिली, असा त्यांचा दावा आहे. ठाण्याचे पोलीस आणि एसआयटीला हे माहीत आहे, एकनाथ शिंदे यांनाही माहीत आहे, सगळ्यांना माहीत आहे. तरीही पोलीस आरोपींना का वाचवत आहेत आणि पोलीस आयुक्त नेमके कुणाला वाचवत आहेत, असा सवाल राऊत यांनी उपस्थित केला.

काल आम्ही पोलीस आयुक्तांना पुरावे दिले, ते पाहिल्यावर आयुक्तांचीही खात्री पटली आहे, असे राऊत यांनी सांगितले. मिनाक्षी शिंदे आणि राजेंद्र शिंदे हे आरोपी आहेत आणि तेच सूत्रधार आहेत, यावर पोलिसांचा विश्वास बसला आहे, असा त्यांचा दावा आहे. तरीही अटक होत नसेल, तर राज्याला दुर्बल आणि हतबल गृहमंत्री मिळाला आहे, अशी टीका त्यांनी केली. आता विधिमंडळाचे अधिवेशन येणार आहे आणि पार्लमेंटही सुरू होणार आहे. लोकांचा दबाव आहे. या प्रकरणात कारवाई झाली नाही, तर पोलीस आयुक्त आणि गृहमंत्री यांचा बळी जाईल, असा दावा राऊत यांनी केला.

निष्पाप राजकीय कार्यकर्त्याची हत्या झाली आहे आणि ती दडपण्याचे काम पालकमंत्री व इतर लोक करत आहेत, असा आरोप राऊत यांनी केला. काल आमचे आंदोलन दडपण्यात आले, त्यांना लाज वाटली पाहिजे, असे ते म्हणाले. पुरावे पाहायला हवे होते आणि आमच्यासोबत आंदोलनात यायला हवे होते, असेही त्यांनी म्हटले. बाळासाहेबांची शिवसेना इतकी अमानुष नव्हती, याचा अर्थ तुम्ही ड्युप्लिकेट आहात, अशी टीका त्यांनी केली. ज्याची हत्या झाली, त्याच्या कुटुंबाचे दु:ख तुम्हाला कळणार नाही, असेही ते म्हणाले. पूर्णेकर यांचा मुलगा पालकमंत्र्यांच्या घरी निवेदन द्यायला एकटा जात होता आणि सत्य सांगणार होता, पण पोलिसांनी त्याला फरफटत नेले, असे राऊत यांनी सांगितले. भविष्यात पूर्णेकर प्रकरण गृहमंत्री आणि ठाण्याच्या पालकमंत्र्यांना महागात पडल्याशिवाय राहणार नाही, असा इशाराही त्यांनी दिला.

काल आदित्य ठाकरे यांच्यासोबत आम्ही सर्व नेते आणि पदाधिकारी पोलिसांना भेटायला गेलो होतो, असे राऊत यांनी सांगितले. महाराष्ट्र नवनिर्माण सेनेचे प्रमुख लोकही उपस्थित होते आणि सर्वपक्षीय आंदोलन सुरू होते. पोलीस आयुक्त चांगले गृहस्थ आहेत, पण ते दबावात होते, असे सांगतानाच या प्रकरणात पुढच्या आंदोलनाची दिशा ठरेल, असे त्यांनी स्पष्ट केले. आम्ही राजकीय वरातीत गेलो नव्हतो, तर आरोपींना अटक करण्याची मागणी करण्यासाठी गेलो होतो, असेही राऊत यांनी सांगितले.