यमुना एक्सप्रेसवेवर धावत्या स्लीपर बसला आग, 9 जणांचा होरपळून मृत्यू

यमुना एक्सप्रेसवेवर सोमवारी एका धावत्या स्लीपर बसने अचानक पेट घेतला आणि बघता बघता संपूर्ण बस आगीच्या भक्ष्यस्थानी पडली. या भीषण दुर्घटनेत 9 जणांचा होरपळून मृत्यू झाला. दुर्घटनेच्या वेळी बसमध्ये 40 ते 50 प्रवासी प्रवास करत होते.

ही बस दिल्लीहून महोबाच्या दिशेने निघाली होती आणि जेवर पोलीस स्टेशनच्या हद्दीत, यमुना एक्सप्रेसवेवरील झिरो पॉईंटपासून सुमारे 32 किलोमीटर पुढे या बसला आग लागली. आग लागताच बसमधील प्रवाशांमध्ये एकच गोंधळ आणि पळापळ उडाली. जीव वाचवण्यासाठी अनेक प्रवाशांनी थेट बसच्या खिडक्या आणि दरवाजांमधून खाली उड्या मारल्या.

या दुर्घटनेतून सुखरूप बाहेर पडलेल्या एका महिला प्रवाशाने या भयावह रात्रीचा अनुभव सांगितला. ती म्हणाली, "मी झोपलेले असताना अचानक कोणीतरी दरवाजा ठोठावला. जेव्हा माझे डोळे उघडले, तेव्हा पूर्ण बसमध्ये भयानक चेंगराचेंगरी आणि गोंधळ उडालेला होता. संपूर्ण बसमध्ये धुराचे साम्राज्य पसरल्याने काहीच दिसत नव्हते आणि श्वास घेणेही कठीण झाले होते." ती पुढे म्हणाली, "मी माझे बूट किंवा सामान काहीही न घेता फक्त मोबाईल हातात धरून बाहेरच्या दिशेने धावले. दरवाज्यावर इतकी धक्काबुक्की सुरू होती की लोक एकमेकांवर पडत होते. मागाहून कोणीतरी मला धक्का देऊन बाहेर ओढले. जे लोक धक्काबुक्की करून कसेबसे बाहेर पडू शकले, तेच वाचले. माझ्या मागे अनेक लोक अडकले होते, जे धूर आणि आगीच्या ज्वाळांमुळे बाहेर येऊ शकले नाहीत."

घटनेची माहिती मिळताच अग्निशमन दलाच्या अनेक गाड्या आणि जेवर पोलीस स्टेशनचे पथक तातडीने घटनास्थळी पोहोचले. अग्निशमन जवानांनी अथक प्रयत्नांनंतर बसला लागलेल्या भीषण आगीवर नियंत्रण मिळवले. सुरुवातीला काही प्रवासी बसमध्ये अडकल्याची भीती व्यक्त केली जात होती. ज्वाइंट सीपी राजीव नारायण मिश्रा यांनी दिलेल्या माहितीनुसार, या अपघातात 9 जणांचा मृत्यू झाल्याची अधिकृत पुष्टी करण्यात आली आहे.

उत्तर प्रदेशचे मुख्यमंत्री योगी आदित्यनाथ यांनी या दुर्दैवी घटनेची गंभीर दखल घेतली असून मृतांच्या नातेवाईकांबद्दल तीव्र शोक व्यक्त केला आहे. जखमींवर तात्काळ आणि योग्य उपचार व्हावेत यासाठी प्रशासकीय अधिकाऱ्यांना कडक निर्देश देण्यात आले आहेत. तसेच मुख्यमंत्र्यांनी मृतांच्या कुटुंबीयांशी संवाद साधून त्यांना सर्वतोपरी मदत पुरवण्याचे आदेश दिले असून जखमी नागरिक लवकरात लवकर पूर्णपणे बरे व्हावेत अशी प्रार्थना केली आहे.