आमदार करण देवतळे यांच्या फेसबुक पोस्टवर आक्षेपार्ह कमेंट, भाजपचे वरोरा पोलिसांना निवेदन

वरोरा (चंद्रपूर) : आमदार करण देवतळे यांच्या अधिकृत फेसबुक पोस्टवर आक्षेपार्ह, अश्लील आणि बदनामीकारक टिप्पणी करणाऱ्या 'बजरंग माळी' नावाच्या खातेदारावर कठोर कायदेशीर कारवाई करावी, अशी जोरदार मागणी भारतीय जनता पक्षाचे वरोरा शहराध्यक्ष तथा नगरसेवक संतोष सुरेश पवार यांनी केली आहे. या मागणीसाठी त्यांनी वरोरा पोलीस ठाण्याच्या पोलीस निरीक्षकांना एक औपचारिक निवेदन दिले आहे.

पोलीस ठाण्यात दिलेल्या निवेदनानुसार, आमदार देवतळे यांच्या अधिकृत फेसबुक अकाऊंटवरील पोस्टवर 'बजरंग माळी' या फेसबुक प्रोफाइलवरून अत्यंत आक्षेपार्ह, अश्लील आणि अपमानास्पद मजकूर कमेंट म्हणून टाकण्यात आला आहे. अशा कृत्यामुळे आमदारांची वैयक्तिक तसेच सार्वजनिक क्षेत्रातील प्रतिमा मलिन करण्याचा आणि त्यांच्या प्रतिष्ठेला जाणीवपूर्वक धक्का पोहोचवण्याचा प्रयत्न झाला, असे निवेदनात स्पष्ट म्हटले आहे. सोशल मीडियाचा गैरवापर करून हा प्रकार मुद्दाम घडवून आणला गेला, असेही भाजप नेत्यांचे म्हणणे आहे.

संतोष पवार यांनी निवेदनात अशी मागणी केली आहे की, पोलिसांनी संबंधित फेसबुक खातेधारकाचा तातडीने शोध घ्यावा आणि त्याच्यावर कडक कायदेशीर कलमांखाली गुन्हा दाखल करावा. तसेच आक्षेपार्ह कमेंट आणि पोस्टचे डिजिटल पुरावे जपून ठेवावेत आणि फेसबुक/मेटा (Meta) कंपनीकडून आवश्यक ती तांत्रिक माहिती मागवावी. त्यामुळे संशयित बजरंग माळी याच्या खात्याची नेमकी ओळख पटवणे आणि त्यावर कारवाई करणे सोपे होईल, असे निवेदनात म्हटले आहे.

याशिवाय असा वादग्रस्त मजकूर पुढे इतर ठिकाणी पसरू नये, यासाठी पोलिसांनी लगेच प्रतिबंधात्मक पावले उचलावीत, अशीही विनंती करण्यात आली आहे. पोलिसांनी केलेल्या कारवाईची अधिकृत माहिती निवेदन देणाऱ्यांना कळवावी, अशीही मागणी आहे. डिजिटल पुराव्यादाखल स्क्रीनशॉट आणि छायाचित्रे निवेदनासोबत जोडण्यात आली आहेत.

वरोरा पोलीस निरीक्षकांना हे निवेदन देताना शहराध्यक्ष संतोष पवार यांच्यासोबत भाजपचे पदाधिकारी दिलीप घोरपडे, जगदीश तोटावार, अमित चवले, अनिकेत नाकाडे, अजिंक्य नरडे, पंकज जाधव, राहुल बांदुरकर, प्रशांत उलमले, सुरज केशवानी, अनिकेत मिन्नलवार, शुभम गोल्हर आणि इतर कार्यकर्ते व पदाधिकारी मोठ्या संख्येने हजर होते.