वेदांताच्या पहिल्या अंतरिम लाभांशाची रेकॉर्ड डेट ठरली, शेअर जवळपास ३% वाढला

अनिल अग्रवाल यांच्या वेदांता कंपनीने गुंतवणूकदारांसाठी महत्त्वाची बातमी दिली आहे. कंपनीने आपल्या पहिल्या अंतरिम लाभांशाची रेकॉर्ड डेट जाहीर केली आणि त्यानंतर शेअर बाजारात कंपनीच्या शेअर्समध्ये जवळपास ३% उसळी दिसली. या वाढीचे मुख्य कारण डिमर्जर असल्याचे सांगितले जात आहे.

वेदांताच्या मॅनेजमेंट टीमने आगामी आर्थिक वर्षासाठी पहिला अंतरिम डिव्हिडंड जाहीर केला आहे. या लाभांशासाठी १४ ऑक्टोबर ही रेकॉर्ड डेट ठरवण्यात आली आहे. मात्र याबाबतची अंतिम घोषणा ८ ऑक्टोबर रोजी होणाऱ्या संचालक मंडळाच्या, म्हणजेच बोर्ड मिटिंगमध्ये केली जाणार आहे.

वेदांताची पाच स्वतंत्र कंपन्यांमध्ये विभागणी झाली आहे. त्यानंतरचा हा पहिलाच लाभांश असणार आहे. त्यामुळे शेअर बाजारात आणि गुंतवणूकदारांमध्ये कंपनीबद्दल आणि या डिव्हिडंडबद्दल मोठी उत्सुकता आहे. लाभांशाची घोषणा होताच गुंतवणूकदारांनी खरेदी वाढवली आणि शेअरमध्ये चांगली वाढ दिसली.

बाजार तज्ज्ञ आणि आर्थिक विश्लेषकांच्या मते, गुंतवणूकदारांना मोठा लाभांश देण्याची वेदांताची जुनी परंपरा कायम राहू शकते. मात्र त्याच्या पद्धतीत थोडा बदल होऊ शकतो. कंपनीचा व्यवसाय आता पाच स्वतंत्र कंपन्यांमध्ये विभागला गेला आहे. त्यामुळे प्रत्येक कंपनीचा नफा आणि रोख प्रवाह वेगवेगळा असणार आहे.

तज्ज्ञांच्या मते, भविष्यात या वेगळ्या झालेल्या कंपन्यांकडून मिळणारा डिव्हिडंड थेट जागतिक वस्तूंच्या किमतींवर, जसे की धातू, तेल आणि वायू, यावर अवलंबून असणार आहे. पूर्वी एक संयुक्त कंपनी म्हणून वेदांता भरीव लाभांश देत असे. डिमर्जरनंतर मात्र प्रत्येक व्यवसायाच्या स्वतःच्या विशिष्ट गरजा असणार आहेत. त्यामुळे पुढे लाभांशाच्या रकमेत काही चढ-उतार होऊ शकतात.

तुम्ही वेदांताचे गुंतवणूकदार असाल आणि अंतरिम डिव्हिडंडचा लाभ घ्यायचा असेल, तर ठरलेल्या रेकॉर्ड डेटपूर्वी तुमच्या डिमॅट अकाऊंटमध्ये शेअर्स असणे आवश्यक आहे. कंपनीच्या नोंदींमध्ये नाव नोंदले गेले, तरच कंपनीकडून मिळणाऱ्या डिव्हिडंडचा फायदा मिळेल.

ही कंपनी पूर्वी वेदांता लिमिटेड म्हणून ओळखली जात होती. त्यानंतर तिचे पाच कंपन्यांमध्ये विभाजन झाले. वेदांता लिमिटेड ही मूळ, अस्तित्वात असलेली कंपनी असून तिच्यात हिंदुस्तान झिंक कंपनीचाही समावेश आहे. वेदांता ॲल्युमिनियम मेटल लिमिटेड ॲल्युमिनियम व्यवसाय पाहते, तर वेदांता ऑइल अँड गॅस लिमिटेड तेल आणि वायू व्यवसाय पाहते. वेदांता पॉवर लिमिटेड ऊर्जा व्यवसायासाठी आहे आणि वेदांता आयर्न अँड स्टील लिमिटेड लोहखनिज आणि पोलाद व्यवसायासाठी आहे.

शेअर बाजारातील गुंतवणूक बाजारातील जोखमीच्या अधीन असल्याने, गुंतवणूक करण्यापूर्वी कृपया प्रमाणित गुंतवणूक सल्लागाराचा सल्ला घ्या.