वाशीमच्या जऊळकात झोपेतल्या पत्नीची कुऱ्हाडीने हत्या, संशयित पती मालेगावातून अटकेत

वाशीम जिल्ह्यातील जऊळका येथे एका महिलेची कुऱ्हाडीने हत्या झाल्याची घटना उघडकीस आली आहे. घरात सर्वजण गाढ झोपेत असताना झोपलेल्या पत्नीच्या मानेवर कुऱ्हाडीने जबर वार केल्याचा आरोप तिच्या संशयित पतीवर आहे. त्यानंतर तो घरातून पसार झाला होता. पोलिसांनी त्याला काही तासांतच मालेगाव शहरातून ताब्यात घेतले आणि हत्येचा गुन्हा दाखल करून अटक केली. सकाळी मुलीने आईचा रक्ताने माखलेला मृतदेह पाहिल्यानंतर हा प्रकार उघडकीस आला.

मिळालेल्या माहितीनुसार, आरोपी पतीचे नाव दिनेश जोंधळे असून हत्या झालेल्या पत्नीचे नाव शारदा जोंधळे आहे. दिनेश दारूच्या आहारी गेला होता आणि पत्नीच्या चारित्र्यावर सतत संशय घेऊन तिच्याशी वाद घालायचा, असे सांगण्यात आले.

शनिवारी रात्री हे दाम्पत्य घरातल्या खोलीत झोपायला गेले होते. पहाटे चार ते पाचच्या सुमारास दिनेशने घरातली कुऱ्हाड आणून झोपलेल्या शारदा यांच्या मानेवर वार केले, असा आरोप आहे. हल्ला इतका भीषण होता की शारदा यांचा जागीच मृत्यू झाला. त्यानंतर आरोपी घटनास्थळावरून फरार झाला.

या दाम्पत्याला तीन मुले आहेत. त्यांपैकी दोन मुलींची लग्ने झाली आहेत, तर १५ वर्षांचा मुलगा शिक्षण घेतो आहे. दिनेशचे वृद्ध आई-वडील समोरच्या छोट्या घरात वेगळे राहतात. म्हणजेच घटनेच्या रात्री मुलगा आणि मुलगी आजी-आजोबांच्या त्या घरात झोपायला गेले होते.

सकाळी आई-वडील नेहमीप्रमाणे उठले नाहीत, म्हणून मुलगी त्यांना बघायला मुख्य घरात गेली. तिने आधी बाहेरून हाक मारली, पण आतून काहीच उत्तर आले नाही. म्हणून तिने दरवाजा ढकलला. दरवाजा उघडाच होता. आत गेल्यावर आई रक्ताच्या थारोळ्यात मृत अवस्थेत पडलेली दिसली, तर वडील घरात कुठेच नव्हते. हे पाहून मुलीने मोठ्याने आक्रोश केला आणि परिसरात एकच खळबळ उडाली.

घटनेची माहिती मिळताच जऊळका पोलीस ठाण्याचे ठाणेदार गणेश हिवरकर, हवालदार रतन बावस्कर, कर्मचारी अमोल पाटील, विनोद दामोदर आणि सलीम शेख तातडीने घटनास्थळी पोहोचले. पोलिसांनी मृतदेहाचा पंचनामा केला आणि पसार झालेल्या आरोपीचा शोध सुरू केला.

तांत्रिक तपास आणि गुप्त बातमीदाराकडून मिळालेल्या माहितीच्या आधारे पोलिसांनी दिनेश जोंधळे याचा माग काढला. अवघ्या काही तासांत त्याला मालेगाव शहरातून ताब्यात घेण्यात आले. त्याच्यावर हत्येचा गुन्हा दाखल करून त्याला अटक करण्यात आली आहे. या प्रकरणाचा पुढील सविस्तर तपास जऊळका पोलीस करत आहेत.