वाशिम: लाखोंचा ऐवज लंपास करणारा अट्टल घरफोड्या एलसीबीच्या जाळ्यात, दोन्ही गुन्ह्यांतील ११ लाखांचा मुद्देमाल

वाशिम शहरात एकाच दिवशी दोन वेगवेगळ्या घरांचे कुलूप तोडून चोरट्याने लाखो रुपयांचा ऐवज लंपास केला होता. या दोन्ही घरफोड्यांमधील आरोपीला स्थानिक गुन्हे शाखेने अटक केली आहे.

एरिगेशन कॉलनी, सिव्हील लाईन, ता. जि. वाशिम येथे राहणारे सीताराम सखाराम वाशिमकर (वय ६५) आणि योजना पार्क, सिव्हील लाईन, ता. जि. वाशिम येथे राहणारे अरुण रामराव सरनाईक (वय ५९) या दोघांच्या घरी अज्ञात चोरट्याने कुलूप तोडून प्रवेश केला होता. या दोन्ही घरांमधून सोन्या-चांदीचे दागिने आणि रोख रक्कम अशा लाखो रुपयांच्या ऐवजाची चोरी झाली होती. या प्रकरणी पोलीस स्टेशन वाशिम शहर येथे अज्ञाताविरोधात गुन्हा नोंदवण्यात आला होता.

या दोन्ही गुन्ह्यांतील अज्ञात आरोपींचा शोध घेऊन गुन्हा उघडकीस आणण्याच्या सूचना पोलीस अधीक्षक निकेश खाटमोडे-पाटील यांनी स्थानिक गुन्हे शाखा, वाशिम येथील अधिकारी आणि अंमलदारांना दिल्या होत्या. या सूचनांनुसार स्थानिक गुन्हे शाखेच्या पथकाने तांत्रिक आणि गोपनीय माहितीच्या आधारे तपास केला. या तपासातून रॅन्डो उर्फ फिरोज खान साहेब खान (वय ३६, रा. मुखरी चौक, तुकाराम बापू वॉर्ड, पुसद) या आरोपीपर्यंत पथक पोहोचले आणि त्याला अटक करण्यात आली. अटकेनंतर आरोपीला मेहकर पोलिसांच्या स्वाधीन करण्यात आले.

ही कामगिरी पोलीस अधीक्षक निकेश खाटमोडे-पाटील, अपर पोलीस अधीक्षक लता फड आणि उपविभागीय पोलीस अधिकारी रामकृष्ण पवार यांच्या मार्गदर्शनाखाली तसेच पोलीस निरीक्षक सुधाकर आहे यांच्या नेतृत्वाखाली स्थानिक गुन्हे शाखा, जि. वाशिम येथील पथकाने पार पाडली. या कारवाईत पोउपनि सचिन गोखले, पोउपनि शेखर मास्कर, पोलीस अंमलदार गजानन अवगळे, दिलीप देवकते, विनोद अवगळे, भूषण ठाकरे, विठ्ठल महाले, तुषार ठाकरे, संदीप दुतोंडे, अविनाश वाढे, संतोष बाघ, श्याम इंगळे, सुनील तायडे तसेच अंगुली मुद्रा शाखा, वाशिम येथील सपोनि आशिष भोंडे, पोलीस अंमलदार संदीप सरोदे, महेश आकरे, शीतल मानकर आणि गणेश बिंगल यांचा सहभाग होता.

आरोपीकडे या दोन्ही गुन्ह्यांबाबत विचारपूस केली असता त्याने दोन्ही घरफोड्या केल्याची कबुली दिली. या कबुलीनंतर त्याच्याकडून चोरी गेलेले एकूण ७ तोळे सोन्याची लगड आणि ९ तोळे चांदीची लगड असा एकूण ११ लाख ५ हजार रुपये किमतीचा मुद्देमाल पंचासमक्ष जप्त करण्यात आला. या गुन्ह्याचा पुढील तपास वाशिम शहर पोलीस स्टेशन करत आहे.