वसईत उपचारानंतर आठ वर्षांच्या मुलीचा मृत्यू; कथित बोगस डॉक्टरविरोधात वालीव पोलीस स्टेशनमध्ये गुन्हा

वसई पूर्वेतील भोयदापाडा परिसरात उलट्यांचा त्रास होत असल्याने उपचारासाठी क्लिनिकमध्ये नेलेल्या अवघ्या आठ वर्षांच्या मुलीचा उपचारानंतर काही वेळातच मृत्यू झाला. कथित बोगस डॉक्टरने दिलेल्या गोळ्या आणि दोन इंजेक्शन्सनंतर मुलीच्या नाकातोंडातून रक्त येऊ लागले आणि त्यानंतर तिचा मृत्यू झाला, असा नातेवाईकांचा आरोप आहे. महापालिकेच्या आरोग्य विभागाने कारवाई करत वालीव पोलीस स्टेशनमध्ये संबंधित डॉक्टरविरोधात गुन्हा दाखल केला आहे.

मिळालेल्या माहितीनुसार, २८ सप्टेंबर रोजी रात्री साडेआठच्या सुमारास या मुलीला उलट्या सुरू झाल्या. तिची प्रकृती पाहून आईने तिला राजावळी पालनगर येथील 'राहुल क्लिनिक'मध्ये नेले. तिथे धूपचंद निषाद (४२) याने मुलीची तपासणी करून काही गोळ्या दिल्या. शिवाय दोन इंजेक्शन्सही दिली, असे नातेवाईकांचे म्हणणे आहे.

दुसऱ्या दिवशी सकाळी आईने मुलीला चहा आणि टोस्ट दिला. त्यानंतर थोड्याच वेळात तिच्या नाकातून आणि तोंडातून अचानक रक्त येऊ लागले. तिची प्रकृती बिघडली आणि काही वेळातच तिचा मृत्यू झाला. या घटनेनंतर नातेवाईकांनी तिला दिलेल्या उपचारांबाबत गंभीर आरोप केले. मात्र मुलीच्या मृत्यूचे नेमके वैद्यकीय कारण अजून स्पष्ट झालेले नाही. शवविच्छेदन अहवाल आल्यानंतर त्याबाबत अधिक स्पष्टता येईल, असे पोलिसांनी सांगितले.

घटनेनंतर महापालिकेच्या आरोग्य विभागाने त्या क्लिनिकची चौकशी केली. महापालिकेच्या मुख्य वैद्यकीय अधिकारी डॉ. भक्ती चौधरी यांच्या माहितीनुसार, धूपचंद निषाद स्वतःकडे 'इलेक्ट्रो होमिओपॅथी'ची पदवी असल्याचे सांगत होता. पण त्याच्याकडे महाराष्ट्र वैद्यकीय परिषदेची (MMC) मान्यताप्राप्त वैद्यकीय पदवी नसल्याचे तपासणीत आढळले, असे सांगण्यात आले. तरीही तो अॅलोपॅथीची औषधे आणि इंजेक्शन्स देत असल्याचा आरोप आहे. महापालिकेचे वैद्यकीय अधिकारी डॉ. श्रीनिवासराव दुधमल यांनी पोलिसांकडे तक्रार दिली आणि त्यानंतर वालीव पोलिसांनी संबंधित डॉक्टरविरोधात गुन्हा दाखल केला.

वालीव पोलीस स्टेशनचे वरिष्ठ पोलीस निरीक्षक प्रदीप केरेकर यांनी सांगितले की, संबंधित डॉक्टरविरोधात गुन्हा दाखल करण्यात आला आहे. मुलीच्या शवविच्छेदन अहवालानंतरच तिच्या मृत्यूचे अचूक कारण स्पष्ट होईल आणि त्यानुसार पुढील कायदेशीर कारवाई केली जाणार आहे.

दरम्यान, आरोपी धूपचंद निषाद याने स्वतःवरील आरोप फेटाळले आहेत. नातेवाईकांचे आरोप खोटे असल्याचा दावा त्याने केला आहे. त्यामुळे मृत्यूमागचे नेमके वैद्यकीय कारण काय आणि उपचारांची भूमिका किती, हे आता तपासातून स्पष्ट होणार आहे.