वरोऱ्यात रात्रगस्तीत वाळूचा ट्रॅक्टर पकडला, ७ लाख ५ हजारांचा माल जप्त

वरोरा शहरात रविवारी रात्री पोलिसांनी अवैध वाळू वाहतुकीवर कारवाई केली. रात्रगस्तीवर असलेल्या पोलिसांनी एक ट्रॅक्टर थांबवला आणि त्यातील माल मिळून ७ लाख ५ हजार रुपयांचा मुद्देमाल जप्त केला. या प्रकरणी ट्रॅक्टर चालक आणि वाळू मालक यांच्यावर वरोरा पोलीस स्टेशनमध्ये गुन्हा दाखल झाला आहे.

पोलिसांच्या माहितीनुसार, वरोरा पोलीस स्टेशनचे पोलीस हवालदार संदीप विठ्ठल मुळे आणि पोलीस अंमलदार विशाल राजुरकर हे १ नोव्हेंबर २०२६ रोजी रात्रीच्या सुमारास रात्रगस्तीच्या ड्युटीवर होते. त्या वेळी त्यांना गुप्त बातमीदाराकडून खबर मिळाली. मौजा तुळाणा रोडकडून वरोरा शहराच्या दिशेने काही जण ट्रॅक्टर-ट्रॉलीतून रेतीचे अवैध उत्खनन करून तिची वाहतूक करत आहेत, असे या खबरीत सांगितले होते.

या खात्रीशीर माहितीवरून पोलिसांनी वणी बायपास रोडवरील कटारिया मंगल कार्यालयाजवळ पंचांसमक्ष तात्पुरती नाकाबंदी लावली. थोड्या वेळाने तुळाणा रोडकडून वरोरा शहराकडे येणाऱ्या मार्गावर देशपांडे ग्राउंडजवळ एक ट्रॅक्टर येताना दिसला. पोलिसांनी इशारा केल्यावर चालकाने ट्रॅक्टर थांबवला. विचारपूस केली तेव्हा त्याने आपले नाव सुनील एकनाथ वाभीटकर असे सांगितले. तो ३६ वर्षांचा असून तुळाणा, ता. वरोरा येथील रहिवासी आहे.

पंचांसमक्ष ट्रॅक्टरची तपासणी केली असता, ५ लाख रुपये किमतीचा सिल्व्हर रंगाचा आयशर ४८५ कंपनीचा ट्रॅक्टर सापडला. त्यासोबत २ लाख रुपये किमतीची, नंबर नसलेली लाल रंगाची ट्रॉली होती. ट्रॉलीत अंदाजे एक ब्रास वाळू भरलेली होती. हा सगळा माल मिळून ७ लाख ५ हजार रुपयांचा मुद्देमाल जप्त करण्यात आला.

वाळू वाहतुकीचा परवाना आहे का, असे विचारल्यावर चालकाकडे कोणताही परवाना नसल्याचे समोर आले. हा माल आपण मालक स्वप्नील दाते यांच्या सांगण्यावरून आणला, अशी माहिती चालकाने पोलिसांना दिली. स्वप्नील दाते हे करंजी, ता. वरोरा येथील असल्याचे पोलिसांनी नमूद केले आहे.

पोलिसांनी घटनास्थळी पंचनामा करून सगळा मुद्देमाल ताब्यात घेतला. चालक सुनील वाभीटकर आणि मालक स्वप्नील दाते यांनी आपसात संगनमत करून अवैध रीतीने रेती चोरल्याचा ठपका ठेवत त्यांच्यावर गुन्हा नोंदवण्यात आला आहे. हा गुन्हा भारतीय न्याय संहिता २०२३ च्या कलम ३०३(२) आणि ३(५) तसेच महाराष्ट्र जमीन महसूल अधिनियम १९६६ च्या कलम ४८ अन्वये नोंदवला आहे.

या प्रकरणाचा पुढील तपास पोलीस हवालदार अमोल मारोती नवघरे करत आहेत.