कापूरबावडी पोलीस स्टेशनमध्ये तरुणांचा लैंगिक छळ झाल्याचा आरोप; तीन पोलीस नियंत्रण कक्षात

ठाण्यातील शिवसेनेचे (ठाकरे गट) विभागप्रमुख प्रदीप पूर्णेकर यांच्या हत्येनंतर झालेल्या आंदोलनात अटक केलेल्या तरुणांना कापूरबावडी पोलीस स्टेशनमध्ये 'थर्ड डिग्री' देण्यात आली आणि त्यांचा लैंगिक छळ करण्यात आला, असा गंभीर आरोप आता समोर आला आहे. या आरोपांचे तीव्र पडसाद उमटले असून महाविकास आघाडी आणि मनसेचे कार्यकर्ते कापूरबावडी पोलीस स्टेशनवर धडकले आणि त्यांनी जोरदार निदर्शने केली. वाढत्या दबावानंतर कथित गैरकृत्यात सहभागी असल्याचा आरोप असलेल्या तीन पोलीस कर्मचाऱ्यांना तातडीने पोलीस नियंत्रण कक्षात संलग्न करण्यात आले आहे.

प्रदीप पूर्णेकर यांच्या हत्येचा निषेध करण्यासाठी आणि आरोपींना अटक व्हावी या मागणीसाठी ठाण्यात तीव्र आंदोलन झाले होते. त्यात रास्ता रोको झाला आणि दगडफेकीच्या घटनाही घडल्या होत्या. या प्रकरणी पोलिसांनी 250 पेक्षा जास्त जणांवर गुन्हे दाखल केले आणि दोन तरुणांना अटक केली होती. मात्र कोठडीत असताना पोलिसांनी या तरुणांना अमानुष मारहाण केली आणि त्यांचा लैंगिक छळ केला, असा आरोप करण्यात आला आहे.

सामाजिक कार्यकर्ते अजय जया यांनी या तरुणांचे वैद्यकीय अहवाल मिळवले. त्यानंतर त्यांनी मानवाधिकार प्राधिकरणाकडे तसेच पोलीस उपायुक्त (डीसीपी) प्रशांत कदम यांच्याकडे रीतसर तक्रार दाखल केली. वैद्यकीय अहवालातील पुराव्यांमुळे पोलीस दलातील या कथित कृत्याला गंभीर वळण मिळाले, असे म्हटले जात आहे.

ही बातमी पसरताच ठाण्यातील राजकीय वातावरण तापले. राष्ट्रवादी काँग्रेस (शरदचंद्र पवार गट), शिवसेना (उद्धव बाळासाहेब ठाकरे), काँग्रेस आणि महाराष्ट्र नवनिर्माण सेना या पक्षांचे पदाधिकारी व कार्यकर्ते मोठ्या संख्येने कापूरबावडी पोलीस स्टेशनबाहेर जमले. त्यांनी पोलिसांच्या विरोधात घोषणाबाजी केली आणि आरोप असलेल्या कर्मचाऱ्यांवर तातडीने गुन्हे दाखल करण्याची मागणी केली. सुमारे तासभर चाललेल्या या ठिय्या आंदोलनामुळे स्टेशनच्या परिसरात मोठा तणाव निर्माण झाला होता.

आंदोलनाची तीव्रता पाहून वरिष्ठ पोलीस अधिकाऱ्यांनी मध्यस्थी केली आणि आंदोलकांचे निवेदन स्वीकारले. प्रथमदर्शनी संशयित ठरलेल्या तीन पोलीस कर्मचाऱ्यांना तातडीने नियंत्रण कक्षात हलवण्यात आले. पीडितांचे जबाब नोंदवल्यानंतर दोषींवर कडक कायदेशीर कारवाई केली जाईल, असे आश्वासन पोलिसांनी दिल्याची माहिती राष्ट्रवादी काँग्रेसचे (शरदचंद्र पवार गट) शहराध्यक्ष मनोज प्रधान यांनी दिली.

वैद्यकीय अहवाल आणि मानवाधिकार प्राधिकरणाकडे झालेल्या तक्रारीनंतर ठाणे पोलीस दल आता अडचणीत आले आहे. निष्पक्ष चौकशीत काय समोर येते आणि पीडितांना न्याय मिळावा म्हणून दोषी पोलिसांवर कायदेशीर गुन्हे दाखल होतात का, याकडे सगळ्या ठाणेकरांचे लक्ष लागले आहे.