वर्धा: रामनगर भागातील कुख्यात गुंड टोळीप्रमुख व साथीदारांविरुध्द मोक्का कारवाई

वर्धा जिल्ह्यातील पोलीस स्टेशन वर्धा (शहर), रामनगर हद्दीतील इंदिरानगर, आदिवासी कॉलनी आणि वर्धा शहर परिसरात सक्रिय असलेल्या एका कुख्यात गुंड टोळीवर पोलिसांनी महाराष्ट्र संघटित गुन्हेगारी नियंत्रण कायदा (मोक्का) अन्वये कारवाई केली आहे. या टोळीचा प्रमुख सूरज उर्फ टोळी मनोज धाडवे (वय २७, राहणार इंदिरानगर, आदिवासी कॉलनी, वर्धा) असून त्याच्यासोबत गुन्हे करणारे साथीदार म्हणून भूषण संतोषराव राऊत (वय २१, वर्धा), शंतनू आदेश नेवारे (सोमनाथ ले आऊट, रामनगर, वर्धा), गौरव संजयराव जबडे (वय २४, इंदिरानगर, आदिवासी कॉलनी, वर्धा) आणि जतिन सतीश राऊत (वय १९, इंदिरानगर, आदिवासी कॉलनी, वर्धा) यांची नावे पोलिसांनी नोंदवली आहेत. या टोळीत आणखी एक अनोळखी इसमही सहभागी असल्याचे पोलिसांनी सांगितले.

पोलिसांच्या माहितीनुसार, ही टोळी बेकायदेशीर जमाव जमवून मारहाण करणे, शिवीगाळ व जीवे मारण्याची धमकी देणे, नुकसान करून खंडणी मागणे, गंभीर दुखापत करणे, साथीदारांसह मिळून खुनाचा प्रयत्न करणे, देशी-विदेशी दारूची वाहतूक करणे आणि शासकीय आदेशाचे उल्लंघन करून शस्त्रांसह बेकायदा जमाव जमवून शिवीगाळ व नुकसान करणे अशा प्रकारचे गुन्हे वारंवार करत असल्याचा आरोप आहे. हे गुन्हे टोळीप्रमुख व साथीदारांनी वैयक्तिक आणि एकत्रितरीत्याही केल्याचा आरोप असून, टोळीच्या आर्थिक फायद्यासाठी आणि दबदबा वाढवण्यासाठी हे कृत्य केले जात असल्याचे पोलिसांचे म्हणणे आहे.

या संदर्भात पोलीस स्टेशन वर्धा (शहर) येथे गुन्हा क्रमांक १४०४/२०२६ अन्वये भारतीय न्याय संहिता २०२३ च्या कलम ३०८(३)(५), ३१८(१), १८९(२)(४), १९०, १९१(५), ३५१(२), ३५२, ३२४(४)(५) आणि भारतीय हत्यार कायदा १९५९ च्या कलम ४, २५ अन्वये गुन्हा दाखल करण्यात आला होता. हा गुन्हा टोळीप्रमुख व सदस्यांनी आर्थिक फायदा आणि टोळीचे वर्चस्व यासाठी केल्याचे तपासात समोर आल्यानंतर पोलीस निरीक्षक नागेशकुमार चतरकर यांनी या गुन्ह्यात मोक्का कायद्याचे कलम ३(१)(दोन), ३(२), ३(४) समाविष्ट करण्याचा आणि कलम २३(१) अन्वये तपासाची परवानगी मिळावी यासाठीचा प्रस्ताव पोलीस अधीक्षक सौरभ कुमार अग्रवाल यांच्यामार्फत विशेष पोलीस महानिरीक्षक, नागपूर परिक्षेत्र यांच्याकडे पाठवला होता. या प्रस्तावाची दखल घेत विशेष पोलीस महानिरीक्षकांनी मोक्का अन्वये तपासाची परवानगी दिल्याने या गुन्ह्यात मोक्का कायद्याखाली कलमवाढ करण्यात आली.

गुन्हा दाखल झाल्यापासून टोळीप्रमुख व साथीदार पसार होते. स्थानिक गुन्हे शाखा, वर्धाच्या पथकाने पोलीस निरीक्षक विनोद चौधरी यांच्या मार्गदर्शनाखाली आंध्र प्रदेशातील पूर्व गोदावरी जिल्ह्यातील बॅरेज कॉलनी येथून त्यांना ताब्यात घेतले असून या गुन्ह्यात त्यांना अटक करण्यात आली आहे. गुन्ह्यातील अनोळखी आरोपीची ओळख पटवण्यात आली असून हा आरोपी विधी संघर्षग्रस्त बालक (कायद्याशी संघर्ष करणारा अल्पवयीन) असल्याचे पोलिसांनी स्पष्ट केले आहे.

या गुन्ह्याचा तपास विशेष पोलीस महानिरीक्षक, नागपूर परिक्षेत्र यांच्या आदेशानुसार उपविभागीय पोलीस अधिकारी, आर्वी राहुल आत्राम करत आहेत. ही संपूर्ण कारवाई पोलीस अधीक्षक सौरभ कुमार अग्रवाल, अपर पोलीस अधीक्षक सदाशिव वाघमारे, उपविभागीय पोलीस अधिकारी सुनिल महाडीक आणि पोलीस निरीक्षक विनोद चौधरी यांच्या मार्गदर्शनाखाली पोलीस हवालदार अमोल आत्राम, पोलीस हवालदार आशिष महेशगौरी, पोलीस निरीक्षक नागेशकुमार चतरकर, पोलीस उपनिरीक्षक शरद गायकवाड, सुनिल राम, महिला पोलीस हवालदार वैशाली करमरकर आणि महिला पोलीस शिपाई करिश्मा परचाके, प्रविण शिंदे यांनी पार पाडली.