वर्धेत जबरी चोरी करणाऱ्या चार अल्पवयीनांना अवघ्या चार तासात पोलिसांनी शोधले
वर्धा शहर पोलीस स्टेशनने जबरी चोरीचा गुन्हा घडल्यानंतर अवघ्या चार तासात उघडकीस आणला असून चौघे विधीसंघर्षीत बालक पोलिसांच्या ताब्यात घेण्यात आले आहेत.
वर्धा शहरात दिनांक 20 सप्टेंबर 2026 रोजी रात्री आठ ते साडेआठच्या सुमारास एक जबरी चोरीची घटना घडली. फिर्यादी हे आपल्या मित्रासोबत मोपेड गाडीवरून पोस्ट ऑफिस चौक ते गांधी पुतळा या रस्त्याने जात होते. त्याचवेळी मागून आलेल्या दुसऱ्या मोपेड गाडीवरील दोन अनोळखी मुलांनी त्यांची गाडी आडवी करून त्यांना अडवले आणि शिवीगाळ केली.
या प्रकारामुळे घाबरलेल्या फिर्यादीच्या मित्राने पोलिसांना फोन करण्याचा प्रयत्न केला. मात्र त्याचवेळी आधीपासूनच तिथे थांबलेल्या आणखी एका मोपेड गाडीवरील दोन अनोळखी मुलांनी फिर्यादीच्या मित्राला मारहाण करण्यास सुरुवात केली. मित्राला वाचवण्यासाठी फिर्यादी मध्ये गेले असता, चौघांनीही आधी हाताने-बुक्क्यांनी मारहाण केली. त्यानंतर त्यांच्यापैकी एकाने धारदार शस्त्राने फिर्यादीच्या डाव्या कानाखाली आणि डाव्या गालावर वार करून त्यांना जखमी केले.
मारहाणीदरम्यान आरोपींनी फिर्यादीच्या बोटातील पाच ग्रॅम वजनाची, पाचू खडा जडवलेली सोन्याची अंगठी जबरदस्तीने हिसकावून नेली. या अंगठीची किंमत सुमारे 45 हजार रुपये असल्याचे सांगण्यात येते. फिर्यादीच्या मित्रालाही आरोपींनी कोणत्यातरी धारदार शस्त्राने मारल्याचे समोर आले आहे. फिर्यादीच्या तोंडी जबाबावरून तसेच वैद्यकीय अधिकाऱ्यांच्या इन्ज्युरी रिपोर्टच्या आधारे पोलीस स्टेशन वर्धा शहर येथे वेगवेगळ्या कलमांखाली गुन्हा दाखल करण्यात आला आणि तपास सुरू करण्यात आला.
पोलीस स्टेशन वर्धा शहरचे पोलीस निरीक्षक नागेशकुमार चतरकर यांनी या गुन्ह्याचे गांभीर्य लक्षात घेत गुन्हे प्रगटीकरण पथकाचे प्रमुख पोलीस उपनिरीक्षक शरद गायकवाड यांना तातडीने तपासाच्या सूचना दिल्या. गायकवाड यांनी तातडीने तपासकामाला सुरुवात करत मिळालेली माहिती आणि उपलब्ध पुराव्याच्या आधारे गुन्हा करणाऱ्या चौघा अनोळखी व्यक्तींचा शोध घेतला. तपासादरम्यान हे चौघेही विधीसंघर्षीत बालक असल्याचे निष्पन्न झाले.
बाल न्याय अधिनियमातील तरतुदींनुसार या विधीसंघर्षीत बालकांच्या ताब्यातून गुन्ह्यात वापरण्यात आलेले धारदार शस्त्र म्हणजेच चाकू तसेच गुन्ह्यात वापरलेल्या दोन्ही मोपेड गाड्या जप्त करण्यात आल्या. त्यानंतर या विधीसंघर्षीत बालकांची रवानगी बाल सुधार गृहात करण्यात आली.
ही संपूर्ण कारवाई पोलीस अधीक्षक सौरभकुमार अग्रवाल, अपर पोलीस अधीक्षक सदाशिव वाघमारे, उपविभागीय पोलीस अधिकारी सुनिल महाडिक आणि पोलीस निरीक्षक नागेशकुमार चतरकर यांच्या मार्गदर्शनाखाली पार पडली. गुन्हे प्रगटीकरणाचे अधिकारी पोलीस उपनिरीक्षक शरद गायकवाड यांच्यासह पोलीस अंमलदार गजेंद्र धर्मे, नितीन इटकरे, प्रशांत वंजारी, अभिजीत वाघमारे, नरेंद्र कांबळे, श्रावण पवार, रंजीत भुरसे आणि अमोल साळवन यांनी या कारवाईत सहभाग घेतला.
