वरणगावजवळ उड्डाणपुलाखाली २४ वर्षांच्या तरुणावर गोळीबार, सात ते आठ अज्ञातांविरुद्ध गुन्हा

वरणगाव शहराजवळ असलेल्या फुलगाव उड्डाणपुलाखाली रविवारी (१ नोव्हेंबर) सायंकाळी सातच्या सुमारास एका २४ वर्षांच्या तरुणावर गोळीबार झाला. सात ते आठ अज्ञात हल्लेखोरांनी गावठी कट्ट्यातून गोळ्या झाडल्या, तसेच लोखंडी रॉड आणि दांडक्यांनी त्याला बेदम मारहाण केली, असे समोर आले आहे. या घटनेमुळे वरणगाव परिसरात खळबळ उडाली आहे.

जखमी तरुणाचे नाव सरफराज सैय्यद सकीर सैय्यद (२४, रा. काझीपुरा, मुक्ताईनगर) असे आहे. या हल्ल्यात त्याच्या खांद्यात आणि पोटात गोळ्या लागल्या आहेत. त्याशिवाय डोके, हात आणि पायांनाही गंभीर दुखापत झाली आहे.

सरफराज भुसावळ येथील एका खासगी कंपनीत चालक म्हणून काम करतो. साधारण महिनाभरापूर्वी इन्स्टाग्रामवरून त्याची अश्विनी नावाच्या तरुणीशी ओळख झाली होती. रविवारी तो मुक्ताईनगरला घरी जात असताना दोघांचे मोबाईलवर बोलणे झाले. त्यानुसार फुलगाव उड्डाणपुलाखाली भेटायचे ठरले.

ठरल्याप्रमाणे सरफराज त्या ठिकाणी थांबलेला असताना सात ते आठ अज्ञात व्यक्ती मागून आल्या आणि त्यांनी त्याच्या डोक्यावर रॉडने प्रहार केला. तो खाली कोसळल्यानंतर हल्लेखोरांनी त्याला हातापायांवरही मारहाण केली. त्यानंतर त्यांच्यापैकी एकाने गावठी कट्ट्यातून त्याच्या खांद्यावर आणि पोटात गोळ्या झाडल्या. हल्ल्यानंतर आरोपी घटनास्थळावरून पसार झाले.

हल्ल्यानंतर सरफराजला तातडीने वरणगाव ग्रामीण रुग्णालयात दाखल करण्यात आले. तिथे डॉ. गोविंदा बेलदार यांनी त्याच्यावर प्राथमिक उपचार केले. मात्र पोटातील गोळी खोलवर रुतलेली असल्याने ती काढण्याचा प्रयत्न यशस्वी झाला नाही. त्यामुळे पुढील उपचारांसाठी त्याला जळगाव येथील सामान्य रुग्णालयात हलवण्यात आले. तिथे त्याच्यावर शर्थीचे उपचार सुरू आहेत.

घटनेची माहिती मिळताच वरणगाव पोलीस रुग्णालयात गेले आणि त्यांनी जखमीकडे चौकशी केली. त्यानंतर पोलिसांनी घटनास्थळी धाव घेतली. मुक्ताईनगरच्या उपविभागीय पोलीस अधिकाऱ्यांनीही घटनास्थळी भेट देऊन तपासाबाबत सूचना दिल्या.

जखमीच्या फिर्यादीवरून सात ते आठ अज्ञातांविरुद्ध भारतीय न्याय संहितेच्या कलम १०९ (१), ११८ (२) आणि १८९ (४) तसेच शस्त्र अधिनियम १९५९ च्या कलम ३ नुसार गुन्हा दाखल करण्यात आला आहे. हल्ल्याचे नेमके कारण काय आणि आरोपींचा शोध लावण्यासाठी पोलिसांचा तपास सुरू आहे. संशयितांच्या मागावर पोलिसांची पथके आहेत.