उमरग्यात बनावट दारू वाहतूक करणारे वाहन पकडले, दोघे ताब्यात, ४ लाखांचा मुद्देमाल जप्त

उमरगा तालुक्यातील येणेगुर भागात बनावट देशी-विदेशी दारू तयार करून तिची वाहतूक आणि विक्री केली जात असल्याचा प्रकार मुरूम पोलिसांच्या कारवाईत उघडकीस आला. सोलापूर-येणेगुर रस्त्यावर सापळा लावून पोलिसांनी बुधवारी रात्री दारू घेऊन जाणारे वाहन पकडले. या कारवाईत १९ बॉक्स आणि ८ बाटल्या दारूसह वाहन असा एकूण ४ लाख ३३ हजार ४० रुपयांचा मुद्देमाल जप्त करण्यात आला. या प्रकरणी अमर प्रकाश येडगे (रा. येणेगुर) आणि काशीनाथ दिगंबर देवकर (रा. करवंजी) या दोघांविरुद्ध दारूबंदी कायद्यानुसार गुन्हा नोंदवण्यात आला असून, त्यांना ताब्यात घेण्यात आले आहे.

या प्रकरणात अमर येडगे हा मुख्य सूत्रधार असल्याचा संशय व्यक्त केला जात आहे. त्याच्या संपर्कात आणखी कोण-कोण आहेत, तसेच येणेगुर भागात तयार होणारी बनावट देशी-विदेशी दारू इतर ठिकाणी किंवा जिल्ह्याबाहेर पाठवली जात होती का, याचा तपास पोलीस करत आहेत.

मुरूम पोलीस स्टेशनचे सहाय्यक पोलीस निरीक्षक गणेश पाटील यांच्या नेतृत्वाखालील पथकाने येणेगुर येथे सोलापूर-येणेगुर मार्गावर सापळा रचला होता. त्यावेळी एमएच २५ झेड ३००० क्रमांकाचे वाहन पोलिसांच्या नजरेस पडले. पोलीस दिसताच चालकाने वाहन पळवण्याचा प्रयत्न केला, पण पोलिसांनी पाठलाग करत सुपतगाव शिवारात वाहन अडवले. वाहनाची तपासणी केली असता त्यात मोठ्या प्रमाणात दारूसाठा सापडला. पोलिसांनी दारूसाठ्यासह वाहन जप्त करून दोन्ही आरोपींना ताब्यात घेतले. येणेगुरमध्ये तयार होणारी बनावट दारू फक्त स्थानिक पातळीवर विकली जात होती की वेगवेगळ्या जिल्ह्यांत तिचा पुरवठा होत होता, याचा तपास सुरू आहे. या कथित रॅकेटचा पसारा किती मोठा आहे आणि यामागे आणखी कोण आहेत, हे आरोपींच्या चौकशीतून आणि पुढील तपासातून स्पष्ट होणार आहे.

पोलीस अधीक्षक रीतू खोकर आणि अतिरिक्त पोलीस अधीक्षक सचिन पांडकर यांच्या मार्गदर्शनाखाली तसेच उमरगा विभागीय पोलीस अधिकारी प्रशांत संपते यांच्या सूचनेनुसार ही कारवाई करण्यात आली. मुरूम पोलीस स्टेशनचे सहाय्यक पोलीस निरीक्षक गणेश पाटील यांच्या नेतृत्वाखालील पथकात अमर महानुरे, चालक विलास सहाने, मिलिंद साखळे तसेच उमरगा पोलीस स्टेशनचे संतोष बोयणे, बिराजदार आदी पोलीस कर्मचारी सहभागी होते.

बनावट दारू तयार करण्यासाठी कच्चा माल कुठून आणला जात होता, दारू नेमकी कुठे तयार होत होती, कोणत्या ब्रँडच्या नावाखाली ती बाजारात पाठवली जात होती, बाटल्या, बुच आणि लेबल कुठून मिळत होते, तसेच हा माल कोणाला दिला जात होता, याचा तपास महत्त्वाचा ठरणार आहे. या कथित प्रकरणात आणखी साथीदार, पुरवठादार, वाहतूकदार किंवा विक्रेते सहभागी आहेत का, याचाही तपास पोलीस करणार आहेत.