उबरचं नवं 'रेकॉर्ड माय ट्रिप' फीचर: कॅबमधला व्हिडिओ आणि आवाज रेकॉर्ड होणार

उबरने प्रवाशांच्या सुरक्षेसाठी 'रेकॉर्ड माय ट्रिप' नावाचं नवीन फीचर सुरू केलं आहे. ॲपवरून कॅब बुक करताना भाड्यावरून भांडण होतं, कधी ड्रायव्हरचं वागणं खराब असतं, तर कधी गंभीर घटनाही घडतात. या सगळ्याला कंटाळून कंपनीने हे पाऊल उचललं आहे.

या फीचरमुळे प्रवासी कॅबमध्ये बसल्यापासून उतरेपर्यंतचा संपूर्ण प्रवास रेकॉर्ड होणार आहे. अलीकडे झालेल्या काही वाईट घटनांनंतर उबरला हा निर्णय घ्यावा लागला आहे. जो कोणी नियम मोडेल किंवा चुकीचं वागेल, त्याच्यावर तातडीने कारवाई करणं यामुळे सोपं होईल.

उबर इंडियाने सांगितलं की, प्रवासात काही वाईट घडलं तर त्याची नीट चौकशी व्हावी, हाच या फीचरचा एकमेव उद्देश आहे. कॅबमधला व्हिडिओ आणि आवाज दोन्ही रेकॉर्ड होतील, पण हे रेकॉर्डिंग पूर्णपणे एनक्रिप्टेड असेल.

याचा अर्थ असा की प्रवास सुरू असताना किंवा नंतर ड्रायव्हर, प्रवासी किंवा खुद्द उबर कंपनी, कुणीही ते फुटेज थेट पाहू शकणार नाही. ते लॉक राहील. प्रवासात भांडण झालं किंवा काही चुकीचं घडलं, तर पोलीस किंवा कायदेशीर तपास करणारी यंत्रणा अधिकृतपणे मागणी करून ते फुटेज घेऊ शकेल आणि पुरावा म्हणून वापरू शकेल.

याशिवाय प्रवाशांनाही त्यांच्या ॲपवरून स्वतः रेकॉर्डिंग सुरू करण्याचा पर्याय मिळणार आहे. त्यामुळे उबरच्या प्रवासात पारदर्शकता येईल आणि चुकीचं वागणाऱ्यांवर वचक बसेल.

गुरुग्राममध्ये घडलेल्या एका घटनेनंतर हा विषय जास्त चर्चेत आला. दिल्ली एअरपोर्टवरून एक सॉफ्टवेअर इंजिनिअर महिला गुरुग्राममधल्या घरी जात होती. तिने उबर बुक केली होती आणि ॲपवर भाडं 625 रुपये दिसत होतं. घरी पोहोचल्यावर ड्रायव्हरने दुसरं ॲप दाखवून 1,479 रुपये मागितले.

महिलेने जास्त पैसे द्यायला नकार दिल्यावर ड्रायव्हरने तिचं सामान गाडीतच अडकवून ठेवलं. त्याने तिला शिव्या दिल्या, घरापर्यंत तिचा पाठलाग केला आणि जीवे मारण्याची धमकीही दिली. पोलिसांनी गुन्हा नोंदवून यासिर नावाच्या 24 वर्षांच्या ड्रायव्हरला अटक केली. तो बनावट नावाने अकाउंट चालवत होता. उबरनेही त्याला कायमचं काढून टाकलं.

नोएडा आणि इतर शहरांतही असाच प्रॉब्लेम समोर येतोय. ॲपवर एक नाव दिसतं आणि गाडी चालवणारा माणूस वेगळाच असतो. लायसन्सवर एक नाव आणि ॲपवर दुसरं नाव, असंही दिसतं. याच कारणामुळे दिल्ली हायकोर्टात एक याचिका दाखल झाली आहे. कोर्टाने कंपन्यांना आणि सरकारला सांगितलं आहे की ड्रायव्हरची पूर्ण चौकशी करा, ॲपवर त्याची खरी ओळख दाखवा, गाडी कुठे चालली आहे ते ट्रॅक करा आणि SOS बटण दाबल्यावर लगेच मदत द्या. हे सगळं सक्तीचं करायलाही कोर्टाने सांगितलं आहे.

सुरक्षेबरोबरच उबरने ड्रायव्हरसाठी कमाईचे नवीन मार्गही काढले आहेत. आता ड्रायव्हर फक्त प्रवासी नाही, तर पार्सलही पोहोचवू शकतो, पाळीव प्राण्यांना घेऊन जाऊ शकतो आणि काही शहरांत उबर बाईकही चालवू शकतो. त्यांच्यासाठी 'Earn First, Pay Later' नावाचा पास आणला आहे. म्हणजे आधी कमवायचं आणि नंतर पासचे पैसे भरायचे. त्यामुळे नवीन ड्रायव्हरनाही काम सुरू करणं सोपं जाईल.