ठाणे क्राईम: गस्तीवरील पोलिस उपनिरीक्षकावर प्राणघातक हल्ला; किसन भोईर यांचा मृत्यू

ठाण्यातील सुभाषनगर भागात गुरुवारी रात्री गस्तीवर असलेल्या एका पोलिस अधिकाऱ्यावर जीवघेणा हल्ला झाल्याची घटना समोर आली आहे. या हल्ल्यात चितळसर पोलिस स्टेशनचे उपनिरीक्षक किसन भोईर (वय ५६) गंभीर जखमी झाले होते आणि उपचार सुरू होण्यापूर्वीच त्यांचा मृत्यू झाला. या घटनेनंतर ठाणे पोलिस दलात एकच खळबळ उडाली आहे.

गणपती उत्सवाच्या निमित्ताने शहरात पोलिसांकडून खास बंदोबस्त लावण्यात आला होता. उत्सव काळात गर्दी आणि सुरक्षेच्या दृष्टीने पोलिस स्टेशनच्या हद्दीत जादा पोलिस पथकं तैनात केली जातात, त्याचाच एक भाग म्हणून भोईर हे त्यांच्या सहकाऱ्यांसोबत पीसीआर-१ या पोलिस गाडीतून चितळसर पोलिस स्टेशनच्या हद्दीत रात्री गस्त घालत होते. पोखरण रोड नंबर दोनच्या परिसरातील गांधीनगर आणि सुभाषनगर या भागांतून पोलिस पथक गस्त घालत जात असतानाच ही घटना घडली.

पोलिसांनी दिलेल्या प्राथमिक माहितीनुसार, रेकॉर्डवर असलेला आरोपी राजू वाल्मीकी (वय ३०) याने भोईर यांच्यावर मागच्या बाजूने बांबूने हल्ला केला असा आरोप आहे. रेकॉर्डवरील आरोपी म्हणजे याआधीही या आरोपीच्या नावावर पोलिस दप्तरी गुन्हे नोंद असल्याचे पोलिसांनी सांगितले. या हल्ल्यात भोईर यांच्या डोक्याला गंभीर मार लागला. हल्ला झाला त्यावेळी भोईर पोलिसांच्या गणवेशातच आपले कर्तव्य बजावत होते. हल्ल्यानंतर त्यांना तातडीने जवळच्या एका खासगी हॉस्पिटलमध्ये उपचारासाठी नेण्यात आले, पण डॉक्टरांनी त्यांना उपचार सुरू होण्याआधीच मृत घोषित केले. घटनेची खबर मिळताच वरिष्ठ पोलिस अधिकारी घटनास्थळी पोहोचले आणि त्यांनी पाहणी केली.

चितळसर पोलिसांनी दिलेल्या माहितीनुसार, या प्रकरणातील आरोपी राजू वाल्मीकी याला पोलिसांनी ताब्यात घेतले आहे. आरोपीविरुद्ध खुनाचा गुन्हा दाखल करण्याची प्रक्रिया सुरू असल्याचे पोलिसांनी सांगितले आहे.

दरम्यान, पोलिस उपनिरीक्षकावर हा हल्ला नेमका कशामुळे झाला, हे अजून स्पष्ट झालेले नाही. आरोपीने हल्ला का केला, त्यावेळी नेमकं काय घडलं आणि या घटनेत आणखी कुणाचा हात आहे का, याचा तपास पोलिस करत आहेत. पोलिस उपायुक्त प्रशांत कदम आणि वरिष्ठ पोलिस निरीक्षक सुनील वरुडे यांच्यासह इतर वरिष्ठ अधिकाऱ्यांनीही घटनास्थळी भेट देऊन पाहणी केली. परिसरातील परिस्थिती आणि उपलब्ध पुराव्यांच्या आधारे पोलिसांचा पुढचा तपास सुरू आहे. कर्तव्यावर असताना एका पोलिस अधिकाऱ्याचा असा मृत्यू झाल्यामुळे पोलिस दलात हळहळ व्यक्त केली जात आहे.