गायमुख-कापूरबावडी मेट्रो टप्पा डिसेंबरअखेर सुरू करण्याचे नियोजन, ठाण्याला कोंडीतून दिलासा मिळणार

घोडबंदर रोडवरून रोज प्रवास करणाऱ्या लाखो ठाणेकरांची वाहतूक कोंडीतून लवकरच सुटका होण्याची शक्यता आहे. गायमुख ते कापूरबावडी या मेट्रो मार्गिकेचा पहिला टप्पा यंदाच्या वर्षाअखेरीस म्हणजे डिसेंबरपर्यंत प्रवाशांसाठी सुरू करण्याचे उद्दिष्ट असल्याचे राज्याचे परिवहन मंत्री प्रताप सरनाईक यांनी सांगितले आहे.

हा टप्पा मेट्रो मार्ग ४ आणि मार्ग ४अ या दोन्ही मार्गिकांच्या एकत्रित पहिल्या टप्प्याचा भाग आहे. मेट्रो मार्ग ४ वडाळा ते कासारवडवली दरम्यान धावणार असून त्याची एकूण लांबी ३२.३२ किलोमीटर इतकी आहे. या मार्गाला जोडणारा मेट्रो मार्ग ४अ कासारवडवलीपासून पुढे गायमुखपर्यंत विस्तारलेला असून त्याची लांबी २.८८ किलोमीटर आहे. मुंबई आणि ठाणे या दोन शहरांना जोडणारा हा मार्ग महत्त्वाचा पूर्व-पश्चिम दळणवळण दुवा म्हणून विकसित होत आहे. यातील गायमुख ते कापूरबावडी जंक्शन हा १०.५ किलोमीटर लांबीचा भाग सर्वात आधी प्रवाशांसाठी खुला केला जाणार आहे. मंत्री सरनाईक यांच्या माहितीनुसार हा टप्पा वर्षाखेरीस धावू लागेल आणि दोन्ही मार्गिकांच्या पहिल्या टप्प्याचे डिसेंबर २०२६ पर्यंत उद्घाटन करण्याचे नियोजन आहे.

मुंबई महानगर प्रदेश विकास प्राधिकरणाकडून म्हणजेच एमएमआरडीएकडून राबवण्यात येणाऱ्या या प्रकल्पाचे बांधकाम आता अंतिम टप्प्यात पोहोचले आहे. गायमुख-कापूरबावडी भागात सध्या चाचणी आणि तपासणीचे काम सुरू असून प्रवाशी सेवा सुरू करण्याच्या दिशेने वाटचाल चालू आहे. यंदा २ जून रोजी संशोधन, रचना व मानक संघटनेकडून म्हणजेच आरडीएसओकडून या मार्गिकेला आवश्यक प्रमाणपत्र मिळाले होते. जवळपास २०९ दिवसांच्या चाचणी व समन्वय प्रक्रियेनंतर हे प्रमाणपत्र देण्यात आले. काही दिवसांपूर्वी उन्नत मार्गिकेवर मेट्रो गाड्यांच्या चाचण्यांचे व्हिडिओ सोशल मीडियावर व्हायरल झाले होते, त्यामुळे सेवा लवकरच सुरू होणार अशी चर्चा रंगली होती. मात्र प्रवाशी सेवा अजून सुरू झालेली नाही आणि अंतिम उद्घाटनाची अधिकृत तारीख अद्याप जाहीर व्हायची आहे.

या मेट्रो मार्गिकेच्या कामाला याआधी अनेकदा उशीर झाला आहे. काही महिन्यांपूर्वी गायमुख-कॅडबरी जंक्शन खंडाचे जवळपास ९० टक्के काम पूर्ण झाले असतानाही परिचालन नोव्हेंबर २०२६ पर्यंत लांबणीवर पडल्याचे समोर आले होते. कारशेडचे काम रखडणे, स्टेशन उभारणी तसेच सिग्नल आणि वीज यंत्रणेची कामे पूर्ण न झाल्यामुळे या प्रकल्पाला याआधी विलंब झाल्याचे सांगण्यात आले होते.

घोडबंदर रोडवर रोज कोंडीचा त्रास सहन करणाऱ्या लाखो प्रवाशांना ही मेट्रो सेवा सुरू झाल्यावर मोठा दिलासा मिळेल अशी अपेक्षा आहे. मात्र प्रकल्पाला याआधी झालेला उशीर पाहता, प्रत्यक्षात सेवा नेमकी कधी सुरू होते याकडे ठाणेकरांचे लक्ष लागले आहे.