ठाकरे बंधूंच्या मोर्चाआधी चित्रा वाघ यांचा टोला: काँग्रेस जिंकली तर आयोग चांगला, भाजप जिंकला तर वाईट, ही
निवडणूक आयोगाच्या विरोधात ४ ऑक्टोबरला मुंबईत निघणाऱ्या मोर्चावर भाजप आमदार चित्रा वाघ यांनी टीका केली असून विरोधकांनी आधी आत्मपरीक्षण करावे, असे त्या म्हणाल्या.
मुंबई : निवडणूक आयोगाच्या विरोधात येत्या ४ ऑक्टोबरला मुंबईत मोर्चा निघणार आहे. महाराष्ट्र नवनिर्माण सेनेचे प्रमुख राज ठाकरे आणि शिवसेना उद्धव ठाकरे गटाचे प्रमुख उद्धव ठाकरे यांनी संयुक्त पत्रकार परिषद घेऊन ही माहिती दिली. त्यानंतर राजकीय वर्तुळातून प्रतिक्रिया यायला सुरुवात झाली आहे. भाजप आमदार चित्रा वाघ यांनी या मोर्चावरून जोरदार टीका केली आहे.
मुख्य निवडणूक आयुक्त ज्ञानेश कुमार यांच्या भूमिकेवरून राजकीय वातावरण तापलेले असतानाच हा मोर्चा जाहीर झाला आहे. राज ठाकरे आणि उद्धव ठाकरे यांच्या ४ ऑक्टोबरच्या प्रस्तावित मोर्चावर बोलताना, मोर्चे काढण्याआधी विरोधकांनी आत्मपरीक्षण करावे, असा टोला चित्रा वाघ यांनी लगावला.
चित्रा वाघ म्हणाल्या की, संविधानाने प्रत्येकाला आपला आवाज उठवण्याचा अधिकार दिला आहे. पण आंदोलन किंवा मोर्चा काढण्याआधी स्वतःच्या कामाचे आणि भूमिकेचेही आत्मपरीक्षण केले पाहिजे. मराठी माणसाला फसवून त्याच्यावर मंगळसूत्र गहाण ठेवण्याची वेळ आणणारेच आता मोर्चे काढत आहेत, असा आरोप त्यांनी केला.
महाविकास आघाडीच्या काळात शेतकऱ्यांना दिलेली आश्वासने पूर्ण झाली नाहीत, असा दावा चित्रा वाघ यांनी केला. सध्याचे महायुती सरकार शेतकऱ्यांच्या प्रश्नांवर काम करत आहे, असे त्यांनी म्हटले. विरोधक फक्त जनतेची दिशाभूल करत आहेत, अशी टीकाही त्यांनी केली.
निवडणूक आयोगाच्या भूमिकेवर विरोधकांकडून होत असलेल्या टीकेबद्दलही चित्रा वाघ यांनी प्रतिक्रिया दिली. "काँग्रेस जिंकली तर आयोग चांगला आणि भाजप जिंकला तर आयोग वाईट", अशी भूमिका घेणे योग्य नाही, असे त्या म्हणाल्या. फक्त समोरच्याच्या चुका दाखवण्यापेक्षा स्वतःच्या त्रुटी तपासण्याची गरज आहे, असेही त्यांनी सांगितले.
दरम्यान, राज ठाकरे आणि उद्धव ठाकरे यांनी ४ ऑक्टोबरला मुंबईत संयुक्त मोर्चाची घोषणा केली आहे. हा मोर्चा भायखळा ते छत्रपती शिवाजी महाराज टर्मिनस परिसरापर्यंत काढण्यात येणार असल्याची माहिती समोर आली आहे.
महायुतीतील अंतर्गत मतभेदांबाबतही चित्रा वाघ यांनी भाष्य केले. मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि सुनेत्रा पवार यांच्यात चांगला समन्वय आणि संवाद आहे, असा दावा त्यांनी केला. वरिष्ठ नेते एकत्र काम करत असताना इतरांच्या टीकेला फारसे महत्त्व देण्याची गरज नाही, असे त्या म्हणाल्या.
