वी कंपनीचा 'वी इंटेलिजन्स' एआय उपक्रम जाहीर, पीडब्ल्यूसी इंडियासोबत लॅब उभारली

टेलिकॉम कंपनी 'वी' (Vi) ने 'वी इंटेलिजन्स' नावाचा खास एआय उपक्रम सुरू केल्याची घोषणा केली आहे. कंपनीच्या स्वतःच्या कामकाजात आणि ग्राहकांच्या व्यवसायांमध्ये एआयवर आधारित मोठे बदल घडवून आणणे, हा या उपक्रमाचा उद्देश आहे. वी इंटेलिजन्समुळे वेगवेगळ्या उद्योगांना अत्याधुनिक एआय तंत्रज्ञान सहजपणे वापरता येईल आणि त्यामुळे व्यवसाय अधिक सक्षम आणि स्मार्ट होऊ शकतील, असे कंपनीने सांगितले.

या उपक्रमाच्या केंद्रस्थानी 'वी इंटेलिजन्स लॅब' असणार आहे. ही लॅब 'पीडब्ल्यूसी इंडिया'च्या भागीदारीतून उभारण्यात आली आहे. उद्योगांना लागणाऱ्या एआय सोल्युशन्सचे संशोधन, विकास आणि विस्तार करण्याचे मुख्य केंद्र म्हणून ती काम करेल. ही लॅब एक जागतिक व्यासपीठ असेल. आघाडीचे एआय तज्ञ, स्टार्टअप्स, संशोधन संस्था आणि उद्योग यांना ती एकमेकांशी जोडेल. प्रत्यक्ष व्यवसायासमोर असलेल्या अडचणींवर एआयच्या मदतीने उपाय शोधणे, हे तिचे उद्दिष्ट आहे. त्यासाठी 'पीडब्ल्यूसी इंडिया' मुंबईतील 'वी'च्या कार्यालयात एक खास 'सेंटर ऑफ एक्सलन्स' (सीओई) टीम तैनात करणार असल्याची माहिती समोर आली आहे.

लॅबचे कामकाज तीन धोरणात्मक स्तंभांवर उभे असेल. हे स्तंभ म्हणजे एजेंटिक एआय, असिस्टिव्ह एआय आणि सोव्हरिन व रिस्पॉन्सिबल एआय. ग्राहक, उद्योग आणि तांत्रिक कामकाज अशा सर्व पातळ्यांवर एआय उपाय तयार करताना हे तीन स्तंभ मार्गदर्शक ठरतील. एआय तंत्रज्ञानाचा सुरक्षित आणि जबाबदार वापर व्हावा, यासाठी ही लॅब प्रोत्साहन देईल. डेटा, बौद्धिक संपदा आणि एआय प्रणाली यांचा वापर नैतिक आणि पूर्णपणे सुरक्षित पद्धतीने केला जाईल, असेही सांगण्यात आले.

'वी'चे मुख्य तंत्रज्ञान अधिकारी (सीटीओ) जगबीर सिंग यांनी या उपक्रमाबद्दल बोलताना सांगितले की, येत्या काळात फक्त कनेक्टिव्हिटी पुरेशी नसेल, तर 'इंटेलिजन्स'ची भूमिकाही अत्यंत महत्त्वाची ठरेल. जागतिक पातळीवरचे एआय कौशल्य, धोरणात्मक भागीदारी आणि आमच्या डिजिटल पायाभूत सुविधा एकाच मंचावर आणण्यासाठी आम्ही 'वी इंटेलिजन्स लॅब'ची मदत घेत आहोत, असे ते म्हणाले. ग्राहकांच्या अनुभवाची गुणवत्ता सुधारण्यापासून ते वेगवेगळ्या विभागांच्या अंतर्गत कामकाजाची पुनर्रचना करण्यापर्यंत, ही लॅब संस्थांना एआय (AI) तंत्रज्ञान अगदी व्यावहारिक आणि सोप्या पद्धतीने स्वीकारण्यास मदत करेल, असेही सिंग यांनी म्हटले आहे.

'पीडब्ल्यूसी इंडिया'चे पार्टनर आणि लीडर (टीएमटी) विनिष बावा यांनीही आपले मत मांडले. आपण अशा युगाच्या उंबरठ्यावर उभे आहोत, जिथे कृत्रिम बुद्धिमत्ता (AI) फक्त संस्थांच्या कार्यपद्धतीत बदल घडवणार नाही. संस्था नाविन्य कसे निर्माण करतात, स्पर्धा कशी करतात आणि आपल्या भागधारकांसाठी मूल्य कसे तयार करतात, याची व्याख्याही ती पूर्णपणे बदलून टाकेल, असे बावा यांनी म्हटले आहे.