हद्दपारीच्या आदेशाला केराची टोपली; बल्लारपुरातील रुग्णालयात आरोपीची डॉक्टरांशी हुज्जत

बल्लारपूर येथील शासकीय ग्रामीण रुग्णालयात मध्यरात्री एका तडीपार गुन्हेगाराने घुसून डॉक्टरांशी वाद घातल्याची घटना घडली असून पोलिसांनी त्याला तत्काळ ताब्यात घेतले आहे. चंद्रपूर जिल्ह्यातून एका वर्षासाठी हद्दपार करण्यात आलेला योगेश शंकर येरोल (वय २५ वर्षे, रा. रवींद्र नगर वार्ड, बल्लारपूर) हा या कारवाईतील आरोपी आहे.

पोलीस दफ्तरी रेकॉर्डवर असलेला योगेश येरोल याच्या गुन्हेगारी कारवायांना आळा घालण्यासाठी चंद्रपूरच्या पोलीस अधीक्षकांनी १८ मे २०२६ रोजी महाराष्ट्र पोलीस कायद्याच्या कलम ५५ अन्वये त्याला जिल्ह्यातून एका वर्षासाठी हद्दपार करण्याचे आदेश दिले होते. म्हणजेच पुढील एक वर्ष त्याने चंद्रपूर जिल्ह्याच्या हद्दीत पाऊल टाकू नये, असे या आदेशात स्पष्टपणे नमूद होते. या आदेशाची अंमलबजावणी करत २३ मे २०२६ रोजी त्याला तेलंगणातील आसिफाबाद जिल्ह्यातील जनकपूर येथे नेऊन सोडण्यात आले होते. मात्र पोलीस अधीक्षकांच्या या अधिकृत आदेशाला केराची टोपली दाखवत आणि कोणतीही पूर्वपरवानगी न घेता तो पुन्हा शहरात परतला होता.

शनिवारी मध्यरात्रीच्या सुमारास योगेश येरोल बल्लारपूर येथील ग्रामीण रुग्णालयात अचानक शिरला आणि तिथे गोंधळ घालत कर्तव्यावर असलेल्या डॉक्टरांशी वाद घालू लागला. ही माहिती आपत्कालीन सेवा डायल ११२ मार्फत गस्तीवर असलेल्या पोलिसांना मिळाली. घटनेचे गांभीर्य लक्षात घेऊन पोलीस उपनिरीक्षक उमेश जोगदंड यांनी सहकारी पोलीस अंमलदार सत्यवान कोटनाके, पंकज शिंदे, सचिन अल्लेवार, संदीप थेरे आणि शांतकुमार घोसे यांना तसेच दोन पंचांना सोबत घेत तातडीने रुग्णालयाकडे धाव घेतली.

पोलीस पथक रुग्णालयात पोहोचले तेव्हा योगेश येरोल तिथल्या परिसरात संशयास्पदरीत्या फिरताना दिसला. पथकाने वेळ न दवडता त्याला घेरून ताब्यात घेतले. जिल्ह्यात हजर राहण्याबाबत विचारणा केली असता त्याच्याकडे कोणताही वैध परवाना किंवा समाधानकारक उत्तर नव्हते. तडीपारीच्या आदेशाचा उघड भंग झाल्याचे स्पष्ट झाल्यावर पोलीस उपनिरीक्षक उमेश जोगदंड यांच्या फिर्यादीवरून बल्लारशाह पोलीस स्टेशनमध्ये आरोपीविरुद्ध महाराष्ट्र पोलीस कायद्याच्या कलम १४२ अन्वये गुन्हा दाखल करण्यात आला आहे.

पोलीस निरीक्षक बिपीन इंगळे यांच्या मार्गदर्शनाखाली पोलीस हवालदार सत्यवान कोटनाके हे या प्रकरणाचा पुढील तपास करत आहेत. रात्रीच्या वेळी शासकीय रुग्णालयात घडलेल्या या प्रकारामुळे रुग्णालयातील कर्मचाऱ्यांमध्ये काही काळ भीतीचे वातावरण पसरले होते, मात्र पोलिसांनी वेळेवर पोहोचून कारवाई केल्याने पुढचा अनुचित प्रकार टळला.