चंद्रपुरात दुष्काळसदृश स्थिती: कृषिपंपांना २४ तास वीज द्या, मुनगंटीवारांची फडणवीसांकडे मागणी

चंद्रपूर जिल्ह्यात दुष्काळसदृश परिस्थिती गंभीर झाली असून पावसाने मोठा खंड दिल्याने शेतातील पिकांवर संकट आले आहे. अशा वेळी कृषिपंपांना २४ तास अखंडित आणि सुरळीत वीजपुरवठा द्यावा, अशी ठाम मागणी आमदार सुधीर मुनगंटीवार यांनी मुख्यमंत्री तथा ऊर्जामंत्री देवेंद्र फडणवीस यांच्याकडे केली आहे.

पिके वाचवण्यासाठी शेतकऱ्यांना सिंचनावर अवलंबून राहावे लागत आहे. विशेषतः धान उत्पादक शेतकऱ्यांना पिकांना वेळेवर पाणी देता यावे, यासाठी वीज खंडित होऊ नये, असे मुनगंटीवार यांचे म्हणणे आहे. वीज गेली तर पिकांचे नुकसान होईल आणि शेतकऱ्यांवर आर्थिक संकट येईल, असे त्यांनी म्हटले आहे. यापूर्वीही त्यांनी दोन पत्रांद्वारे सरकारचे लक्ष वेधले होते.

राज्यातील अनेक भागांत अपेक्षेप्रमाणे पाऊस झालेला नाही. धान उत्पादक भागात पिकांची वाढ आणि उत्पादन टिकवण्यासाठी नियमित सिंचन आवश्यक आहे. मात्र कृषिपंपांचा वीजपुरवठा वारंवार खंडित होतो, कमी दाबाने वीज मिळते आणि तांत्रिक बिघाड वेळेत दुरुस्त होत नाहीत, अशा तक्रारी येत असल्याने शेतकऱ्यांना पाणी देता येत नाही, असे निवेदनात म्हटले आहे. शेतकरी आधीच बियाणे, खते, मजुरी आणि वाढत्या खर्चाचा भार सोसत आहेत. हा प्रश्न केवळ वीज वितरणातील तांत्रिक अडचण म्हणून न पाहता शेतकऱ्यांची उपजीविका आणि कुटुंबांचे भविष्य यांच्याशी जोडलेला गंभीर प्रश्न म्हणून हाताळला पाहिजे, अशी भूमिका मुनगंटीवार यांनी मांडली.

मुनगंटीवार यांनी मुख्यमंत्री फडणवीस यांची भेट घेतली होती. सादर केलेल्या पत्रांवर संबंधित अतिरिक्त मुख्य सचिव (ऊर्जा) यांनी कार्यवाही करावी, असे निर्देश फडणवीस यांनी दिले होते. पण अजूनपर्यंत अंमलबजावणी झालेली नाही, असे मुनगंटीवार यांनी पुन्हा एकदा अधोरेखित केले. शासनाच्या निर्णयांचा प्रत्यक्ष फायदा शेतकऱ्यांपर्यंत पोहोचणे आणि शेतापर्यंत सुरळीत वीज पोहोचणे महत्त्वाचे आहे, असेही त्यांनी स्पष्ट केले.

२४ तास वीज देण्यासोबतच ज्या गावांमध्ये वीज वारंवार जाते, तिथल्या विद्युत वाहिन्या आणि इतर तांत्रिक यंत्रणांची तातडीने तपासणी करावी, अशी मागणी त्यांनी केली आहे. कमी दाबाची समस्या दूर करून कृषिपंप योग्य क्षमतेने चालतील याची काळजी घ्यावी, धान उत्पादक पट्ट्यातील शेतकऱ्यांना प्राधान्याने वीज द्यावी, असेही त्यांनी पत्रात म्हटले आहे. तक्रारींचे तातडीने निराकरण करण्यासाठी प्रभावी संपर्क यंत्रणा सुरू करावी, तांत्रिक कर्मचारी आणि दुरुस्ती पथके उपलब्ध करून द्यावीत आणि बिघाड दीर्घकाळ राहणार नाहीत याची दक्षता घ्यावी, अशी सूचनाही त्यांनी केली.

वीजपुरवठ्यातील अनियमिततेमुळे शेतकऱ्यांचे नुकसान होऊ नये, यासाठी संबंधित अधिकाऱ्यांची जबाबदारी निश्चित करावी, अशीही मागणी मुनगंटीवार यांनी केली आहे. प्रभावित गावांतील वीजपुरवठ्याचा विशेष आढावा घेऊन केलेल्या उपाययोजनांचा अहवाल ठरावीक मुदतीत सादर करावा. कमी पावसाने बाधित भागांची पाहणी करून सिंचन आणि पाणी उपलब्धतेसाठी संबंधित विभागांच्या समन्वयाने विशेष कृती आराखडा तयार करावा, असेही त्यांनी मुख्यमंत्र्यांकडे मागितले आहे.

शेतकरी हा राज्याच्या अर्थव्यवस्थेचा कणा आहे, असे मुनगंटीवार यांनी म्हटले आहे. पावसाच्या अनिश्चिततेशी झुंज देत आणि कर्ज व उत्पादन खर्चाचा भार पेलत शेतकरी मोठ्या आशेने पीक उभे करतो. त्याचे पीक वीज न मिळाल्याने धोक्यात येणे ही बाब संवेदनशीलतेने हाताळली पाहिजे, असे त्यांचे म्हणणे आहे. त्यामुळे मुख्यमंत्री फडणवीस यांनी या प्रकरणात तातडीने लक्ष घालून महावितरण आणि संबंधित विभागांना स्पष्ट, कालबद्ध आणि परिणामकारक कार्यवाहीचे निर्देश द्यावेत, अशी ठाम मागणी मुनगंटीवार यांनी केली आहे.