'महाराष्ट्र एपस्टीन फाइल्स'चा तिसरा टीझर आला, सुबोध भावे राजकीय नेत्याच्या लूकमध्ये

नाशिकमधील अशोक खरात प्रकरणामुळे राज्यभरात भोंदूबाबा, महिलांचे शोषण आणि राजकीय संबंध यांच्याबद्दल चर्चा सुरू झाली होती. याच पार्श्वभूमीवर आता 'महाराष्ट्र एपस्टीन फाइल्स' हा चित्रपट चर्चेत आला आहे. या चित्रपटाचा तिसरा टीझर नुकताच प्रदर्शित झाला आहे. त्यासोबत अभिनेता सुबोध भावे यांच्या महत्त्वाच्या राजकीय व्यक्तिरेखेचा लूकही समोर आला आहे.

सत्तेचा गैरवापर, गुन्हेगारीचे जाळे आणि न्यायासाठी चाललेला संघर्ष याची झलक या चित्रपटात पाहायला मिळणार असल्याचे संकेत मिळत आहेत. हा चित्रपट २० नोव्हेंबर २०२६ रोजी संपूर्ण महाराष्ट्रात प्रदर्शित होणार आहे.

नव्या पोस्टरमध्ये सुबोध भावे एका वजनदार राजकीय नेत्याच्या भूमिकेत दिसत आहेत. पांढराशुभ्र कुर्ता, काळ्या रंगाचे बंद गळ्याचे जॅकेट आणि चेहऱ्यावरचे गंभीर भाव यामुळे त्यांच्या व्यक्तिरेखेचा प्रभाव जाणवतो. या लूकमुळे चित्रपटातील राजकीय संघर्षाबद्दलची उत्सुकता आणखी वाढली आहे.

टीझरमधील एक संवाद विशेष लक्ष वेधून घेत आहे. सुबोध भावे यांची व्यक्तिरेखा म्हणते, 'मंत्री असो की आमदार असो... जो कोणी दोषी असेल, त्याला कायद्याच्या चौकटीत यायलाच लागेल. त्याची गय केली जाणार नाही...' यावरून सत्तेच्या प्रभावाखाली सत्य दडपण्याचा प्रयत्न आणि गुन्हेगारांना कायद्याच्या कक्षेत आणण्याचा संघर्ष हा कथानकाचा महत्त्वाचा भाग असेल, असे दिसते.

राजकीय आणि सामाजिक विश्वातील कथित वादग्रस्त घडामोडींच्या पार्श्वभूमीवर या चित्रपटात रहस्य आणि थरार मांडण्यात आला आहे. गुन्ह्यांचा तपास करणारी यंत्रणा, सत्तेच्या जोरावर सत्य दाबण्याचे प्रयत्न आणि न्यायासाठीचा लढा यांची झलक चित्रपटात असेल.

तपासाचे फलक, घटनास्थळाभोवती लावलेल्या पोलिसांच्या पिवळ्या पट्ट्या, पत्रकारांचे प्रश्न आणि वेगवेगळ्या पात्रांच्या चेहऱ्यांवरची भीती व संशय यामुळे चित्रपटातले गूढ वातावरण अधिक ठळक होते. सुबोध भावे यांच्या व्यक्तिरेखेमागे नेमके कोणते राजकीय रहस्य दडले आहे, याची उत्सुकता आता निर्माण झाली आहे.

या चित्रपटात सुबोध भावे यांच्यासोबत दीपाली सय्यद, उदय टिकेकर आणि अक्षय टंकसाळे यांच्याही महत्त्वाच्या भूमिका आहेत. वेगवेगळ्या व्यक्तिरेखांमधून राजकारण, समाजकारण आणि गुन्हेगारी विश्वातील गुंतागुंतीचे पैलू उलगडण्याचा प्रयत्न करण्यात आला आहे.

चित्रपटाची कथा, पटकथा आणि संवाद संजय नवगिरे यांनी लिहिले आहेत. संकल्पना सागरकुमार एस. जैन यांची आहे, तर दिग्दर्शनाची जबाबदारी स्वरूप सावंत यांनी सांभाळली आहे. छायाचित्रण आकाश काकडे यांचे असून कलादिग्दर्शन अक्षय आंबेकर यांनी केले आहे.

आनंदी पिक्चर्स अमरावती आणि सचिन रोडे पाटील प्रस्तुत हा चित्रपट मातोश्री एन्टरटेन्मेंट वर्ल्डच्या बॅनरखाली तयार झाला आहे. देवेंद्र भट, सूर्यकांत भुंडे आणि प्रशांत कदमपुरे हे निर्माते आहेत. निर्मिती व्यवस्थापनात नेहा घोडके, सचिन घनवट आणि यश सणस यांच्यासह इतर तंत्रज्ञांनीही योगदान दिले आहे.

तिसऱ्या टीझरमधून समोर आलेला सुबोध भावे यांचा राजकीय लूक आणि चित्रपटातले रहस्यमय वातावरण यामुळे उत्सुकता वाढली आहे. 'महाराष्ट्र एपस्टीन फाइल्स' २० नोव्हेंबर २०२६ रोजी संपूर्ण महाराष्ट्रात चित्रपटगृहांत प्रदर्शित होणार असल्याची माहिती देण्यात आली आहे.