याला म्हणतात पॅशन! अनिकेत कुंभारची वादळी शतकी खेळी; स्पार्टन मान्सून लीगमध्ये टायटन बुल्स्‌चा थरारक विजय

पुण्यातील स्पार्टन क्रिकेट क्लबतर्फे दरवर्षी आयोजित केल्या जाणाऱ्या स्पर्धेची यंदाची सहावी आवृत्ती सध्या सुरू आहे. या 'स्पार्टन मान्सून लीग' अजिंक्यपद मिक्स कॉर्पोरेट टी-२० क्रिकेट स्पर्धेत सिंहगड रोडवरील कोद्रे फार्मस् क्रिकेट मैदानावर दोन सामने पार पडले. या दोन्ही सामन्यांत राकेश ताकवले (आरटी) ग्रुप आणि टायटन बुल्स् या संघांनी आपापल्या प्रतिस्पर्ध्यांना नमवत विजय मिळवला.

पहिल्या सामन्यात सेरेन स्ट्रायकर्स संघाने आधी फलंदाजी करताना १६.१ षटकांत १६८ धावांवर सगळे गडी गमावले. या डावात जय कुमारने अवघ्या १८ चेंडूंत ६ चौकार आणि ५ षटकारांच्या मदतीने ५७ धावांची आक्रमक खेळी केली. आरटी ग्रुपकडून प्रफुल्ल मानकर आणि रणजीत जगताप यांनी अचूक टप्प्यावर गोलंदाजी करत प्रत्येकी ३ गडी बाद केले.

१६९ धावांचे लक्ष्य समोर असताना आरटी ग्रुपने अवघ्या १३.२ षटकांत ३ गडी गमावून १७० धावा करत सहज विजय मिळवला. या डावात अनिकेत कुंभारने तुफानी फलंदाजी करत ४४ चेंडूंत १३ चौकार आणि ८ षटकारांसह १११ धावांची खेळी उभी केली. त्याला आदित्य कदमने नाबाद २४ धावांची साथ दिली. या विजयासह आरटी ग्रुपने स्पर्धेतील सलग पाचवा विजय नोंदवला, म्हणजे या स्पर्धेत आतापर्यंत खेळलेला प्रत्येक सामना संघाने जिंकला आहे.

दुसऱ्या सामन्यात टायटन बुल्स् संघाने गेम स्विंगर्स विरुद्ध खेळताना नाणेफेक जिंकून आधी फलंदाजी करण्याचा निर्णय घेतला. या डावात संघाने २० षटकांत ७ गडी गमावून २१९ धावांचा डोंगर उभारला. अथर्व बारटक्केने ४४ चेंडूंत १२ चौकार आणि ६ षटकारांच्या मदतीने १०३ धावांची शतकी खेळी केली. त्याला आशिष झागताने २९ धावा आणि अमोल कदमने २४ धावांचे उपयुक्त योगदान दिले.

२२० धावांच्या आव्हानाचा पाठलाग करताना गेम स्विंगर्स संघाचा डाव २० षटकांत ६ गडी बाद २१८ धावांवर रोखला गेला. हृषीकेश मत्स्येने ३५ चेंडूंत १० चौकार आणि १ षटकारासह ६१ धावा केल्या. ओजस साठेने ४० धावा, प्रतिक बक्शीने ३८ धावा आणि स्वप्निल इच्चेने २७ धावा करत कडवी झुंज दिली. संघाने शेवटपर्यंत लढत दिली, तरी अखेर एका धावेने पराभवाला सामोरे जावे लागले. टायटन बुल्स्‌कडून सुनिल यादवने ३ आणि संतोषकुमार सांगळेने २ गडी बाद केले.