सिंदेवाहीत घर बंद पाहून तांदळाची चोरी, दोघे आरोपी पोलिसांच्या ताब्यात

चंद्रपूर जिल्ह्यातील सिंदेवाही तालुक्यात तांदूळ चोरीच्या प्रकरणात पोलिसांनी दोन आरोपींना ताब्यात घेतले आहे. नागपूरला मेंदूच्या ऑपरेशनसाठी दाखल असलेल्या शालिक लोनबले यांच्या खैरी गावातील बंद घराचे कुलूप तोडून आरोपींनी ८१ किलो तांदूळ चोरून नेल्याचे समोर आले आहे. घरी वृद्ध आई एकटीच असल्याचा गैरफायदा घेत रवींद्र गुरनुले आणि सुनील कोटरंगे या दोघांनी ही घरफोडी केल्याचा आरोप आहे. ग्रामस्थांनी दाखवलेल्या दबावानंतर आरोपीने गुन्ह्याची कबुली दिली, त्यानंतर सिंदेवाही पोलिसांनी दोघांनाही ताब्यात घेत चोरीचा संपूर्ण मुद्देमाल जप्त केला.

मिळालेल्या माहितीनुसार, खैरीचे रहिवासी शालिक शंकर लोनबले यांच्या मेंदूचे १५ दिवसांपूर्वी गंभीर ऑपरेशन झाले होते, त्यामुळे ते सध्या नागपूरच्या मेडिकल कॉलेज रुग्णालयात उपचार घेत आहेत. पतीच्या शुश्रूषेसाठी पत्नी शालिनी, मुलगा सौरभ आणि मुलगी संजीवनी हे देखील नागपूरलाच रुग्णालयात थांबले होते. घर बंद असल्याने आणि शालिक यांची वृद्ध आई सरस्वती घरात एकट्याच राहत असल्याने, त्या सुरक्षेसाठी घराला कुलूप लावून शेजारीच झोपायला जात असत. २५ सप्टेंबरच्या रात्री साधारण ७ वाजता त्या नेहमीप्रमाणे घराला कुलूप लावून शेजारी झोपायला गेल्या होत्या.

घरात कोणी नसल्याची संधी साधत आरोपी रवींद्र जगन गुरनुले (वय ४५, रा. खैरी) आणि सुनील दौलत कोटरंगे (वय ३५, रा. खैरी) यांनी त्याच रात्री साधारण साडेआठ वाजता बंद घराच्या मुख्य दरवाजाचे कुलूप दगडाने ठेचून तोडल्याचा आरोप आहे. घरात बेकायदेशीरपणे शिरून त्यांनी धान्याच्या दोन प्लास्टिकच्या पोत्यांत ठेवलेला तब्बल ८१ किलो तांदूळ, ज्याची किंमत ५,२६५ रुपये आहे, चोरून नेल्याचा आणि आरोपी रवींद्र गुरनुले याने तो स्वतःच्या घरी लपवून ठेवल्याचा आरोप आहे.

दुसऱ्या दिवशी, २६ सप्टेंबरला सकाळी सहा वाजण्याच्या सुमारास शालिक यांच्या घराशेजारी लोकांची गर्दी जमलेली पाहून त्यांचे चुलत भाऊ तुकाराम मुकरू लोनबले (वय ५४) घटनास्थळी पोहोचले. तेव्हा घराचे कुलूप तुटलेले असून घरातील तांदूळ चोरीला गेल्याचे सरस्वती काकींनी त्यांना सांगितले. यानंतर तुकाराम लोनबले यांनी गावातील अजय शेंडे, मोहन वाढई, नागेश मेश्राम आणि गजानन वाडगुरे यांच्या मदतीने ग्रामस्थांना सभागृहाजवळ एकत्र केले आणि चोरीचा शोध घेण्यासाठी सगळ्यांच्या घरांची पाहणी करण्याचा निर्णय घेतला.

ग्रामस्थांचा वाढता दबाव आणि कारवाईच्या भीतीने आरोपी रवींद्र गुरनुले याने सगळ्यांसमोर गुन्ह्याची कबुली दिल्याचे सांगितले जाते. त्याने आणि सुनील कोटरंगे याने मिळून बंद घराचे कुलूप तोडून तांदूळ चोरल्याचे आणि तो स्वतःच्या घरी ठेवल्याचे मान्य केल्याचा आरोप आहे. यानंतर ग्रामस्थांनी तातडीने पोलिसांना घटनेची माहिती दिली.

माहिती मिळताच सिंदेवाही पोलीस स्टेशनचे पथक घटनास्थळी दाखल झाले. पोलिसांनी दोन्ही आरोपींना ताब्यात घेत रवींद्र गुरनुले याच्या घरातून ५,२६५ रुपये किमतीचा ८१ किलो तांदूळ जप्त केला. फिर्यादी तुकाराम लोनबले यांच्या तोंडी तक्रारीवरून सिंदेवाही पोलीस स्टेशनमध्ये आरोपींविरुद्ध भारतीय न्याय संहिता, २०२३ च्या कलम ३३१(४) आणि ३(५) अन्वये गुन्हा नोंदवण्यात आला आहे. ठाणे प्रभारी अधिकारी कांचन पांडे यांच्या मार्गदर्शनाखाली पोलीस हवालदार निलेश राऊत या प्रकरणाचा पुढील तपास करत आहेत.