१० ऑक्टोबरपूर्वी अटकेची तयारी असल्याचा सीजेपीचे आशुतोष रांका यांचा दावा

कॉकरोच जनता पार्टी (CJP) ची राज्यात आणि देशभरात सध्या जोरदार चर्चा आहे. नीट परीक्षा फुटीप्रकरणात धर्मेंद्र प्रधान यांचा राजीनामा घेतला गेल्यानंतर आता निवडणूक आयोगाचे मुख्य आयुक्त ज्ञानेश कुमार यांनी राजीनामा द्यावा, यासाठी सीजेपीने आक्रमक पवित्रा घेतला आहे. अशातच सीजेपीचे राष्ट्रीय प्रवक्ते आशुतोष रांका यांनी एक दावा केला आहे.

अभिजीत दिपके, सौरव दास आणि आपल्याला कोणत्याही क्षणी अटक होऊ शकते आणि त्यासाठी प्लॅनिंगही सुरू आहे, असे रांका यांनी म्हटले आहे. त्यांनी आपल्या अधिकृत एक्स अकाऊंटवरून पोस्ट करून हे सांगितले. त्यांच्या म्हणण्यानुसार, अनेक लोकांनी कळवले आहे की १० तारखेपूर्वी कधीही NSA किंवा तत्सम कायद्यांखाली अटक होऊ शकते. रांका यांनी लिहिले की, तिघेही ६ जूनपासून तुरुंगात जायला तयार आहेत आणि त्यांना त्याची अजिबात भीती नाही.

रांका यांनी महात्मा गांधींचा दाखला दिला. ते म्हणाले, "हिंसा आणि द्वेष हे भीतीतूनच जन्माला येतात." जे या देशाला उद्ध्वस्त करण्यासाठी टपले आहेत, त्यांनाच भीती वाटली पाहिजे आणि ते घाबरत आहेत, असे ते म्हणाले. सरकार घाबरले आहे आणि म्हणूनच ते हिंसेचा मार्ग अवलंबत आहे, असा आरोप रांका यांनी केला आहे.

आम्ही ३० वर्षांचे तरुण आहोत आणि चांगल्या व अधिक जबाबदार भारतासाठी लढत आहोत, असे रांका यांनी सांगितले. आमच्याकडे गमावण्यासारखे काहीही नाही, तुम्ही आम्हाला अटक करू शकता, मारहाण करू शकता, अगदी ठारही मारू शकता, पण थांबवू शकत नाही, असे ते म्हणाले. "जरी तुम्ही आम्हाला ठार मारले, तरी आमच्या चितेच्या आगीने तुमचे महाल वितळतील," असा इशाराही त्यांनी दिला. तसेच सीजेपीच्या रत्ना सिंग आणि इतर नेत्यांनाही अटक करण्यासाठी प्लॅनिंग सुरू असल्याचे अनेकांकडून कळवले जात आहे, असाही दावा रांका यांनी केला आहे.

काही दिवसांपूर्वी सीजेपीचे प्रवक्ते सौरव दास यांनीही असाच दावा केला होता. केंद्र सरकारकडून आपल्याला, अभिजीत दीपके, आशुतोष रांका, रत्ना सिंग आणि कॉकरोच जनता पक्षाच्या इतर नेत्यांना अटक करण्याची योजना आखली जात असल्याचे त्यांनी म्हटले होते. इन्स्टाग्रामवर त्यांनी लिहिले, "जर सरकारला वाटत असेल की अशा हुकूमशाही उपायांमुळे फायदा होईल, तर त्यांचा गैरसमज आहे. देशाची तरुण पिढी आता जागी झाली आहे." आपण जगू वा मरू, हक्कांसाठी आणि चांगल्या भविष्यासाठीचा लढा सुरू ठेवा, असे आवाहन त्यांनी केले होते. तुरुंगात जाण्यास किंवा त्याहूनही वाईट परिणामांना सामोरे जाण्यास आम्ही तयार आहोत, पण ही सरकारची मोठी चूक ठरेल, कारण देशातील तरुण हे सहन करणार नाहीत, अशी प्रतिक्रिया दास यांनी दिली होती.

रांका यांच्या दाव्यानंतर अभिजीत दिपके यांनीही प्रतिक्रिया दिली. यूएपीए (UAPA), एनएसए (NSA) किंवा तुरुंगवासाच्या धमकीने आम्ही गप्प बसू, असे सरकारला वाटत असेल तर तसे होणार नाही, असे ते म्हणाले. गरज पडल्यास महिने किंवा वर्षे तुरुंगात घालवण्यासही आपण तयार आहोत, पण लोकशाही वाचवण्याच्या लढ्यातून मागे हटणार नाही, असे दिपके यांनी म्हटले आहे. महात्मा गांधींनी दाखवलेल्या मार्गाचे आम्ही अनुसरण करतो आणि शांततापूर्ण व अहिंसक मार्गाने आंदोलन करत राहू, असेही ते म्हणाले.

येत्या १० ऑक्टोबर रोजी दिल्लीत सीजेपीचे आंदोलन नियोजित आहे. ते शांततापूर्ण असेल, असे सीजेपीने म्हटले आहे. मुक्त आणि निष्पक्ष निवडणुकांचे समर्थन करणाऱ्या प्रत्येक नागरिकाने आंदोलनात सहभागी व्हावे, असे आवाहनही पक्षाने केले आहे. ज्ञानेश कुमार यांनी राजीनामा दिला नाही, तर देशभरातील नागरिक आणि संघटनेचे सदस्य नवी दिल्लीत एकत्र जमतील आणि जंतर मंतरवर भव्य आंदोलन करतील, असे अभिजीत दिपके यांनी म्हटले आहे.