सीबीडीतील वारकरी भवनात मांसाहारी जेवण, मद्यपानाची चर्चा; निष्पक्ष चौकशीची मागणी

सीबीडी बेलापूर येथील स्वामी विवेकानंद नगर परिसरात नवी मुंबई महानगरपालिकेचे वारकरी भवन आहे. या सभागृहाच्या वापरावरून आता नवा वाद सुरू झाला आहे. सभागृहात मांसाहारी जेवणाचे कार्यक्रम होतात, अशा तक्रारी आहेत. शिवाय ३० तारखेला झालेल्या एका कार्यक्रमात कथित मद्यपान झाल्याची चर्चा आहे. या सगळ्याची निष्पक्ष चौकशी व्हावी, अशी मागणी पुढे आली आहे.

ही मागणी सामाजिक कार्यकर्ते आणि सारथी सुरक्षा सेवा संस्थेचे सरचिटणीस विनय मोरे यांनी थेट मुख्यमंत्र्यांकडे केली आहे. वारकरी भवनाचे नाव बदलावे किंवा सभागृहाच्या वापरासाठी कठोर नियमावली लागू करावी, असे त्यांचे म्हणणे आहे.

स्वामी विवेकानंद नगर म्हणजेच सीबीडी येथील या वारकरी भवनाच्या मागच्या बाजूला भगवान शंकराचे मंदिर आहे. त्यामुळे सभागृहात होणाऱ्या कार्यक्रमांमुळे मंदिराचे पावित्र्य, परिसराची स्वच्छता आणि नागरिकांच्या धार्मिक भावना जपल्या गेल्या पाहिजेत, असे निवेदनात म्हटले आहे.

वारकरी संप्रदाय भक्ती, शाकाहार, संयम आणि सात्त्विक जीवनशैलीशी जोडलेला आहे, असे मोरे यांनी म्हटले आहे. अशा वेळी ज्या सभागृहाचे नाव "वारकरी भवन" आहे, तिथे मांसाहारी जेवणाचे कार्यक्रम होत असल्याच्या तक्रारी आल्या, तर वारकरी संप्रदायाच्या नावाबद्दल गैरसमज होऊ शकतो, असे त्यांचे म्हणणे आहे.

म्हणून या सभागृहाला भारतरत्न डॉ. ए. पी. जे. अब्दुल कलाम यांचे नाव द्यावे, अशी मागणी आहे. सर्वधर्मसमभाव, सामाजिक एकोपा आणि राष्ट्रीय एकात्मता दाखवणारे दुसरे एखादे नावही चालेल, असे सुचवले आहे. वारकरी भवन हेच नाव ठेवायचे असेल, तर त्या नावाला साजेशी वापराची नियमावली आणि स्पष्ट निर्बंध लागू करावेत, असेही मोरे यांनी सुचवले आहे.

३० तारखेला हे सभागृह आरक्षित करण्यात आले होते. त्या कार्यक्रमात मांसाहारी जेवणासोबत मद्यपानही झाल्याची चर्चा सीबीडी परिसरात सुरू आहे, असा दावा निवेदनात केला आहे. या चर्चेत किती तथ्य आहे हे तपासण्यासाठी महानगरपालिकेने सभागृहाचे बुकिंग रजिस्टर, आयोजकांची माहिती, परवानगीच्या अटी आणि कार्यक्रमाचे व्यवस्थापन तपासावे, अशी मागणी आहे.

पोलीस विभाग आणि राज्य उत्पादन शुल्क विभागाकडून आवश्यक माहिती घेऊन मद्यपान झाले होते की नाही, याची अधिकृत खातरजमा करावी, असेही निवेदनात म्हटले आहे. काही नियमबाह्य प्रकार आढळले, तर संबंधित आयोजकांवर कायदेशीर कारवाई करावी, अशी मागणीही केली आहे.

आणखी एक मुद्दा मोरे यांनी मांडला आहे. सभागृहातील कार्यक्रम संपल्यानंतरही मंडप व्यावसायिक आणि केटररचे साहित्य परिसरात पडून राहते. त्यामुळे सार्वजनिक जागेवर अतिक्रमण होते आणि परिसराची स्वच्छता व सुशोभीकरण यांना अडथळा येतो, असे त्यांचे म्हणणे आहे.

या प्रकरणी वारंवार तक्रारी करूनही ठोस कारवाई होत नाही, असा आरोप करून संबंधित महानगरपालिका अधिकारी आणि कर्मचाऱ्यांच्या कार्यपद्धतीची चौकशी करण्याची मागणीही करण्यात आली आहे. आयोजकाला नियमबाह्य सवलती दिल्या जात आहेत का, हेही तपासावे, असे निवेदनात म्हटले आहे.