शिवसेना पक्ष आणि धनुष्यबाण चिन्हावरून आज शिंदे गटाचा युक्तिवाद; अंतिम निर्णय नेमका कधी?
शिवसेना पक्षाचे नाव आणि धनुष्यबाण या निवडणूक चिन्हावरील वाद सर्वोच्च न्यायालयात प्रलंबित असून बुधवारी तीन सदस्यीय खंडपीठासमोर सुनावणी होणार आहे.
शिवसेना पक्ष आणि धनुष्यबाण या निवडणूक चिन्हाचा वाद गेल्या अनेक महिन्यांपासून सर्वोच्च न्यायालयात प्रलंबित आहे. सध्या हे पक्षाचे नाव आणि हे चिन्ह राज्याचे उपमुख्यमंत्री एकनाथ शिंदे यांच्या शिवसेना पक्षाकडे आहे. मात्र माजी मुख्यमंत्री उद्धव ठाकरे यांनी या निर्णयाला आव्हान दिले असल्याने यावर अंतिम निकाल अजून यायचा आहे. त्यामुळे हे प्रकरण अजूनही न्यायालयात प्रलंबित राहिले आहे.
मंगळवारी या वादावरील सुनावणी होऊ शकली नाही. मिळालेल्या माहितीनुसार, तीन सदस्यीय खंडपीठाची बैठक बोलावता न आल्यामुळे ही सुनावणी पुढे ढकलण्यात आली.
आता बुधवारी सरन्यायाधीश सूर्यकांत, न्यायमूर्ती जॉयमाल्य बागची आणि न्यायमूर्ती व्ही. मोहना यांचा समावेश असलेल्या तीन सदस्यीय खंडपीठासमोर या याचिकेवर सुनावणी होणार आहे.
याआधी १६ आणि १७ सप्टेंबर रोजी झालेल्या सुनावणीत एकनाथ शिंदे गटाचे प्रतिनिधित्व करणारे ज्येष्ठ वकील नीरज किशन कौल यांनी निवडणूक आयोगाच्या निर्णयाचे समर्थन करणारा युक्तिवाद मांडला होता. एकनाथ शिंदे यांना शिवसेनेचे नाव आणि चिन्ह देण्याच्या निवडणूक आयोगाच्या निर्णयाला शिंदे गटाने पाठिंबा दिला होता आणि तो निर्णय योग्य असल्याचे न्यायालयासमोर मांडले होते.
दुसरीकडे, ठाकरे गटाचे प्रतिनिधित्व करणारे ज्येष्ठ वकील कपिल सिब्बल आणि देवदत्त कामत यांनी निवडणूक आयोगाचा हा निर्णय संविधानातील तरतुदींचे उल्लंघन करत असल्याचा युक्तिवाद केला. निवडणूक आयोगाने घेतलेला निर्णय कायद्याच्या चौकटीत बसत नसल्याचे त्यांनी न्यायालयासमोर मांडले.
मागील सुनावणीदरम्यान सर्वोच्च न्यायालयाने निवडणूक आयोगाच्या निर्णय प्रक्रियेवर प्रश्न उपस्थित केले होते. ठाकरे आणि शिंदे या दोन्ही गटांना स्वतंत्र चिन्हे देण्याचा पर्याय का विचारात घेतला गेला नाही, असे न्यायालयाने विचारले होते. यावर शिंदे गटाच्या वकिलांनी असा युक्तिवाद केला होता की, मागील निवडणुकीत शिंदे गटाला उद्धव ठाकरे गटापेक्षा जास्त मते मिळाली होती आणि हे जनतेच्या पाठिंब्याचे द्योतक असल्याचे त्यांनी सांगितले.
याला उत्तर देताना सर्वोच्च न्यायालयाने स्पष्ट केले की, ही मते कोणा एका व्यक्तीसाठी नव्हे तर शिवसेना पक्षासाठी होती. दोन्ही गटांनी शिवसेनाप्रमुख बाळासाहेब ठाकरे यांच्या वारशावर विसंबून न राहता स्वतःच्या ताकदीवर मते मिळवण्याची आपली क्षमता दाखवायला हवी होती, असेही न्यायालयाने नमूद केले.
ठाकरे गटाने शिवसेनेचे निवडणूक चिन्ह असलेले धनुष्यबाण गोठवण्याची मागणी केली आहे. या पार्श्वभूमीवर बुधवारच्या सुनावणीकडे राजकीय वर्तुळाचे लक्ष लागले आहे.
