निवडणूक आयोगावर शंका घेण्यापेक्षा काँग्रेसने आत्मपरीक्षण करावे, शिवेंद्रराजे भोसले यांचे मत

सातारा : निवडणूक आयोगाच्या कामकाजावर प्रश्न उपस्थित करून काँग्रेस लोकांमध्ये संभ्रम निर्माण करत आहे, असा दावा सार्वजनिक बांधकाम मंत्री शिवेंद्रराजे भोसले यांनी केला. निवडणुकीत पराभव झाल्यावर मतदान प्रक्रिया आणि संवैधानिक संस्थांवर बोट ठेवण्याऐवजी काँग्रेसने पराभवाची कारणे शोधून आत्मपरीक्षण करावे, असे ते म्हणाले.

सातारा येथे झालेल्या पत्रकार परिषदेत ते बोलत होते. या वेळी भाजपचे गटनेते अविनाश कदम, विकास गोसावी, विठ्ठल बलशेटवार आणि इतर जण उपस्थित होते.

एसआयआर प्रक्रियेबाबत निवडणूक आयोगाने जे स्पष्टीकरण दिले, त्यामुळे काँग्रेसच्या आरोपांमधील विसंगती समोर आली आहे, असे भोसले यांनी सांगितले. ते म्हणाले, "केंद्रीय निवडणूक आयोगाच्या आयुक्तांमध्ये कोणतेही मतभेद नसल्याचे स्पष्ट करण्यात आले आहे. एसआयआरची प्रक्रिया एकमताने सुरू असल्याचेही आयोगाने सांगितले आहे. असे असताना काँग्रेसचे नेते राहुल गांधी यांच्याकडून आयोगाच्या भूमिकेबाबत प्रश्न उपस्थित करून एक विशिष्ट राजकीय कथानक पुढे नेण्याचा प्रयत्न केला जात आहे."

कर्नाटक, तेलंगणा आणि हिमाचल प्रदेशातील निवडणुकांत काँग्रेसला मिळालेल्या विजयाचा उल्लेख करून त्यांनी काँग्रेसच्या भूमिकेवर प्रश्नचिन्ह उपस्थित केले. ते म्हणाले, "विजय मिळाल्यानंतर लोकशाहीचा विजय झाला असे सांगायचे आणि पराभव झाल्यानंतर मतदान यंत्रणा किंवा निवडणूक प्रक्रियेवर संशय व्यक्त करायचा, अशी भूमिका योग्य नाही. काँग्रेसने आपल्या कारभाराचे आत्मपरीक्षण करावे."

मतदार याद्यांच्या पुनरावलोकनासाठी सुरू असलेल्या एसआयआर प्रक्रियेवरही त्यांनी भाष्य केले. मतदार याद्या अधिक अचूक करण्याच्या या प्रक्रियेत सर्व राजकीय पक्षांना सहभागी होण्याची संधी आहे, असे ते म्हणाले. त्यामुळे गैरसमज पसरवण्यापेक्षा प्रक्रियेत सहभागी होऊन त्रुटी निदर्शनास आणून द्याव्यात, असे आवाहन त्यांनी केले. फॉर्म क्रमांक सहाबाबतही संभ्रम निर्माण केला जात असल्याचा आरोप त्यांनी केला. संवैधानिक संस्थांवर आरोप करायचे आणि दुसरीकडे संविधानाचा उल्लेख करायचा, ही काँग्रेसची दुटप्पी भूमिका आहे, अशी टीका त्यांनी केली.

देशातील जनतेने नरेंद्र मोदी यांच्या नेतृत्वाला सलग तिसऱ्यांदा संधी दिली आहे, याकडे शिवेंद्रराजे यांनी लक्ष वेधले. त्यामुळे निवडणूक प्रक्रियेवर संशय घेण्यापेक्षा जनतेचा कौल स्वीकारून संघटनात्मक आणि राजकीय पातळीवर आत्मपरीक्षण करण्याची गरज आहे, असे ते म्हणाले.

कॅबिनेट सचिवांचे पत्र डेप्युटेशनवरील नियुक्त्यांशी संबंधित होते, असे सांगून शिवेंद्रराजे यांनी दावा केला की, त्याचा वेगळा अर्थ काढून विरोधकांनी लोकांमध्ये गैरसमज निर्माण करण्याचा प्रयत्न केला. पंतप्रधान नरेंद्र मोदी यांच्या नेतृत्वाला राजकीय पातळीवर थेट आव्हान देता येत नाही, म्हणून काँग्रेस वेगवेगळ्या मुद्द्यांवरून संभ्रम निर्माण करत आहे, अशी टीकाही त्यांनी केली.