शिवाजी पार्कवरील आंदोलनानंतर अभिजीत दिपके आणि सहकाऱ्यांविरोधात पोलीस ठाण्यात तक्रार

कॉकरोच जनता पार्टीने (सीजेपी) शुक्रवारी, २ ऑक्टोबरला मुंबईतील शिवाजी पार्कवर आंदोलन केले. या आंदोलनानंतर पक्षाचे अध्यक्ष अभिजीत दिपके आणि त्यांच्या काही सहकाऱ्यांविरोधात पोलीस ठाण्यात तक्रार दाखल करण्यात आली आहे. वकील सिद्धी देवळेकर यांनी ही तक्रार दिली आहे.

स्थानिक नागरिकांचा सीजेपीच्या शिवाजी पार्कवरील आंदोलनाला विरोध होता. तरीही तो विरोध डावलून सीजेपीने तिथे आंदोलन केले. त्यानंतर देवळेकर यांनी दिपके आणि त्यांच्या सहकाऱ्यांविरोधात तक्रार दाखल केली.

देवळेकर यांच्या तक्रारीनुसार, आंदोलनाला परवानगी नसतानाही सीजेपीच्या नेत्यांनी ते केले आणि त्यामुळे परिसरातील शांतता भंग झाली, असा दावा करण्यात आला आहे. यासाठी त्यांनी मुंबई उच्च न्यायालयाच्या २०१३ मधील एका निवाड्याचा दाखला दिला आहे. त्यानुसार छत्रपती शिवाजी महाराज पार्क परिसरात कोणालाही आंदोलन करण्यास सक्त मनाई आहे. मुंबई पोलिसांनी या आंदोलनाला परवानगी दिली नसतानाही सीजेपीच्या लोकांनी गर्दी जमवून निदर्शने केली, असाही दावा तक्रारीत करण्यात आला आहे.

दुसरीकडे, केंद्रीय निवडणूक आयोगाचे मुख्य निवडणूक आयुक्त ज्ञानेश कुमार यांच्या राजीनाम्याची मागणी आता जोर धरू लागली आहे. शुक्रवारी मुंबईतील शिवाजी पार्कवर कॉकरोच जनता पक्षाने जोरदार शक्तिप्रदर्शन करत ज्ञानेश कुमार यांच्या राजीनाम्यासाठी आवाज उठवला. दिल्लीतील जंतरमंतरप्रमाणे शिवाजी पार्कवरही हजारोंच्या संख्येने विद्यार्थी आणि अनेक नागरिक जमा झाल्याचे पाहायला मिळाले. इतकेच नव्हे, तर शिवाजी पार्कनंतर सीजेपी लवकरच दिल्लीतील आंदोलनाची घोषणा करणार असल्याचेही सांगण्यात आले आहे.

देवळेकर यांनी तक्रारीत म्हटले आहे की, प्रत्येकाला आंदोलनाचा अधिकार आहे, पण आंदोलने योग्य ठिकाणी करणे आवश्यक आहे. आझाद मैदानावरही आंदोलन होऊ शकले असते, पण अभिजीत दिपके यांनी शिवाजी पार्कवरच आंदोलन केले. त्यांनी दिल्लीतील जंतरमंतर मैदानात जाऊन आंदोलन करायला हवे होते, असे त्यांचे म्हणणे आहे. मुख्य निवडणूक आयुक्तांचा राजीनामा हवा असेल, तर त्यांनी दिल्लीत जाऊन निदर्शने करायला पाहिजे होती, मुंबईत आंदोलन करण्याला काय अर्थ आहे, असा सवालही त्यांनी तक्रारीत केला आहे.

सर्वसामान्य नागरिकांना नाहक त्रास देऊन त्यांना काय मिळणार आहे, असा प्रश्नही देवळेकर यांनी विचारला आहे. त्या म्हणाल्या की, मी मुंबई पोलिसांकडे तक्रार केली असून त्यांनी ती स्वीकारली आहे. आता ते योग्य ती कारवाई करतील, असे देवळेकर यांनी म्हटले आहे.

या तक्रारीत कोणाला अटक झाल्याचे कुठेही नमूद नाही. तक्रारीतील सर्व मुद्दे हे तक्रारदार देवळेकर यांचे दावे आहेत.