शिवाजी महाराजांच्या अपमानावरून नितेश राणेंचा अभिजीत दिपकेंवर आरोप, माफीची मागणी

कॉक्रोच जनता पार्टीचे (CJP) आंदोलन उद्या, शुक्रवारी 2 ऑक्टोबरला मुंबईत होणार आहे. त्याआधीच राजकीय वातावरण चांगलंच तापलं आहे. महायुतीतले अनेक नेते या आंदोलनावर टीका करत आहेत. आता त्यात भाजप नेते नितेश राणे यांनीही भर घातली आहे.

नितेश राणे यांनी CJP चे संस्थापक अभिजीत दिपके यांच्यावर जोरदार टीका केली. दिपके यांनी छत्रपती शिवाजी महाराजांचा अपमान करणारा फोटो सोशल मीडियावर पोस्ट केला, असा आरोप राणे यांनी केला आणि दिपके यांनी माफी मागावी, अशी मागणी केली.

राणे म्हणाले, की अभिजीत दिपके यांच्या आंदोलनाला त्यांचा आक्षेप नाही. मात्र दिपके ज्या व्यक्तींना समर्थन देतात आणि आंदोलनाच्या प्रचारासाठी वापरल्या जाणाऱ्या काही प्रतिमांवर त्यांची हरकत आहे.

दिपके यांनी सोशल मीडियावर टाकलेल्या एका फोटोचा उल्लेख करून राणे यांनी दावा केला, की त्यात छत्रपती शिवाजी महाराजांच्या खाली मावळ्यांऐवजी 'क्रॉक्रोज' दाखवले आहेत. हा महाराजांचा अपमान आहे, असं म्हणत राणे यांनी भूमिका मांडली, की 'मुंबईतील कुठलाही शिवप्रेमी आणि देशभक्त हा अपमान सहन करणार नाही.'

दुसऱ्या एका फोटोवरही राणे यांनी आक्षेप घेतला. त्या प्रतिमेत महात्मा गांधींच्या पायाजवळ छत्रपती शिवाजी महाराजांचं नाव दाखवलं आहे, असा त्यांचा दावा आहे. या प्रतिमांबद्दल अभिजीत दिपके यांनी स्पष्टीकरण द्यावं आणि माफी मागावी, अशी मागणी राणे यांनी केली.

उमर खालिद यांच्या समर्थनाच्या मुद्द्यावरूनही राणे यांनी दिपके यांना लक्ष्य केलं. 'हे आंदोलन नेमकं कुणासाठी आहे?' असा सवाल करत त्यांनी आंदोलनाच्या भूमिकेवर प्रश्न उपस्थित केले. राणे यांच्या म्हणण्यानुसार, 'महाराष्ट्रात लोकशाही आहे, कुणीही घाबरत नाही. आंदोलन करायचं असेल तर करा; मात्र छत्रपती शिवाजी महाराजांचा अपमान आम्ही सहन करणार नाही.'

CJP ने 2 ऑक्टोबरला मुंबईत आंदोलनाची घोषणा केली आहे. मुख्य निवडणूक आयुक्त ज्ञानेश कुमार यांनी राजीनामा द्यावा, ही या आंदोलनाची प्रमुख मागणी आहे. निवडणूक प्रक्रियेशी संबंधित मुद्दे आणि SIR यावरही CJP ने आक्षेप नोंदवले आहेत.

शिवाजी पार्कमधील प्रस्तावित आंदोलनाला मुंबई पोलिसांनी परवानगी नाकारल्याची माहिती यापूर्वीच समोर आली होती. त्यानंतर अभिजीत दिपके यांनी 'जेल भरो आंदोलन' करण्याची घोषणा केली होती.

CJP कडून मात्र सांगण्यात आलं आहे, की हे आंदोलन निवडणूक आयोगाच्या कार्यपद्धतीविरोधात आणि ज्ञानेश कुमार यांच्या राजीनाम्याच्या मागणीसाठी आहे. आंदोलनाआधी राणे यांनी केलेल्या वक्तव्यांमुळे शिवाजी महाराजांच्या कथित अवमानावरून नवा राजकीय वाद पेटण्याची चिन्हं आहेत.