शेअर बाजारातल्या पैशातून घेतलं नवं घर; वैशाली कदम यांनी सांगितला अरुण कदमांचा रुसवा

मराठी इंडस्ट्रीत अरुण कदम हे नाव सगळ्यांना माहिती आहे. कॉमेडी असो किंवा गंभीर भूमिका, त्यांनी नेहमीच लोकांना हसवलं आहे. पण कामापेक्षा जास्त ते त्यांच्या खऱ्या आयुष्यामुळे चर्चेत असतात. त्यांच्या पत्नी वैशाली कदम सिनेमात काम करत नाहीत, पण सोशल मीडियावर त्या चांगल्याच प्रसिद्ध आहेत. नुकत्याच एका मुलाखतीत त्यांनी आपल्या नव्या घराचा एक भारी किस्सा सांगितला.

वैशाली यांनी सांगितलं की त्या आधी पूर्णवेळ हाऊस वाईफ होत्या. पण घरी बसूनही त्या शेअर मार्केट पाहायच्या. थोडे थोडे पैसे गुंतवत गेल्या आणि त्यातून चांगला नफा मिळाला. हळूहळू आणखी पैसे गुंतवावेसे वाटले. खारमध्ये जे घर घेतलं, ते याच पैशातून घेतलं. त्यात अरुण यांचे अर्धे पैसे आणि त्यांचे अर्धे पैसे लावले होते.

त्या आधी खारच्या पूर्वेला राहत होत्या. पण तिथे त्यांचं मन लागत नव्हतं. आपण आणखी पुढे गेलं पाहिजे, मोठं घर घेतलं पाहिजे, असं त्यांना नेहमी वाटायचं. पण अरुण यांचा प्रॉब्लेम वेगळा होता. त्यांची आई शेजारीच राहायची, त्यामुळे ते म्हणायचे की आईला सोडून कुठेही जाणार नाही.

वैशाली यांनी अरुण यांना खूप समजावलं. घरांचे भाव रोज वाढतायत, आता घेतलं नाही तर नंतर घेणं अवघड होईल, आता गुंतवणूक करायचीच वेळ आहे, असं त्यांनी सांगितलं. त्यांची एक मैत्रीण त्यांना सारखी म्हणायची की तू तिथून बाहेर पड, आताच पाऊल उचललं नाहीस तर आयुष्यात काहीच होणार नाही.

पण अरुण काही केल्या ऐकायला तयार नव्हते. ते आपल्या निर्णयावर ठाम होते. मग वैशाली यांनी विचार केला, हे येत नसतील तर आपण एकटीने जायचं. त्यांनी स्वतः जाऊन भाड्याचं घर शोधलं आणि तिथे राहायला गेल्या. सगळं घर त्यांनी एकटीने पाहून ठरवलं होतं. त्यांची मुलगी सुकन्या तेव्हा मोठी झाली होती आणि नेहमी त्यांच्यासोबत असायची. आपण असा निर्णय घेत आहोत, असं त्यांनी तिला सांगितलं. ती म्हणाली, आई तू म्हणतेस ते बरोबर असेल तर कर, पण पप्पांचं काय? वैशाली म्हणाल्या, बघूया काय होतंय ते. त्यांनी सुकन्यालाही ते नवं घर दाखवून आणलं. सगळी कागदपत्रं आणि व्यवहार त्यांनी एकटीनेच केले.

मैत्रिणीनेच त्यांना आयडिया दिली होती की आधी भाड्याने तिकडे राहायला जा, म्हणजे आजूबाजूला चांगलं घर मिळेल. तिथे राहिल्यावरच आजूबाजूच्या घरांची माहिती कळते. म्हणून त्या घरातून बाहेर पडल्या. त्या वेळी त्यांच्याकडे थोडे जास्त पैसे होते, म्हणून त्यांनी अरुण यांना जास्त विचारलं नाही. त्या हसत हसत म्हणाल्या की तेव्हा त्या सक्षम होत्या, पण अरुणही आपल्या मतावर ठाम होते की आईला सोडणार नाही.

मग वैशाली आणि सुकन्या यांनी मिळून ट्रक बोलावला आणि सामान भरायला सुरुवात केली. तेव्हा अरुण एका कोपऱ्यात रुसून बसले होते. काही झालं तरी या घरातून जाणार नाही, असं त्यांनी ठरवलं होतं.

लोकमत फिल्मीला दिलेल्या मुलाखतीत वैशाली पुढे म्हणाल्या की त्यांनी अरुणना सरळ सांगितलं, ठीक आहे, तू इथेच राहा. त्यांनी आपला सगळा संसार, लागणाऱ्या सगळ्या गोष्टी पॅक केल्या. पण मुद्दाम अरुण यांच्या कपड्यांना हात लावला नाही.

सगळं सामान बाहेर काढल्यावर शेवटची बॅग घेताना त्यांनी विचारलं, आता तू काय करणार आहेस? तेव्हा अरुण लहान मुलासारखे रुसून म्हणाले, भर माझी पण बॅग! बायको आणि मुलीशिवाय ते एकटे कसे राहणार होते? शेवटी ते यायला तयार झाले. अगदी शेवटच्या क्षणी वैशाली यांनी त्यांचे कपडे भरले. अरुण यांनी अजिबात मदत केली नाही. त्यांना कार्यक्रमात मिळालेल्या शालींमध्ये वैशाली यांनी त्यांचे सगळे कपडे भरले आणि सगळे जण नव्या घरात निघाले.