सांगली जिल्हा बँक: जत गटातून पडळकर विजयी, जयंत पाटलांचे वर्चस्व संपल्याचा दावा

सांगली जिल्हा मध्यवर्ती सहकारी बँकेच्या निवडणुकीत जत गटातून भाजपचे आमदार गोपीचंद पडळकर विजयी झाले आहेत. निकालानंतर त्यांनी विरोधकांवर टीका करत जिल्ह्याच्या राजकारणात नवा संघर्ष सुरू होण्याचे संकेत दिले.

पडळकर म्हणाले, 'करेक्ट कार्यक्रम करणाऱ्यांचाच आम्ही टप्प्यात आणून कार्यक्रम केला.' माझ्या निकालाने जिल्हा बँकेचे संपूर्ण गणित बदलले असून, बँकेवरील जयंत पाटलांचे वर्चस्व संपुष्टात आणले आहे, असा दावा त्यांनी केला. जिल्ह्यात 'मी म्हणेल तेच होईल' ही मक्तेदारी आता चालू देणार नाही, असा इशाराही त्यांनी दिला.

जत गटातील मतदारांचे अभिनंदन करताना पडळकर यांनी जत तालुका नवनवीन इतिहास घडवण्यात माहिर असल्याचे सांगितले. त्यांच्या म्हणण्यानुसार, पुढच्या पिढीचे नेतृत्व करणारे नेते सतत वेगवेगळे नॅरेटिव्ह सेट करत होते, पण जतच्या जनतेने ते नॅरेटिव्ह मोडून काढले. 'करेक्ट कार्यक्रम करणाऱ्यांचाच कार्यक्रम झाला आहे. आम्ही त्यांना टप्प्यात आणून कार्यक्रम केला. जतच्या जनतेनेही त्यांचा कार्यक्रम केला,' असे ते म्हणाले.

जिल्हा बँकेवर एकहाती वर्चस्व ठेवण्याचा काही नेत्यांचा प्रयत्न आहे, असा आरोप पडळकर यांनी केला. विरोधकांच्या संस्था मोडीत काढून त्या कवडीमोल दराने विकत घेण्याचा उद्योग सुरू आहे, असेही त्यांनी सांगितले आणि या प्रवृत्तीला आव्हान दिले. जिल्ह्याच्या राजकारणात कोणाचीही एकाधिकारशाही खपवून घेतली जाणार नाही, असे त्यांनी ठणकावून सांगितले.

कवठेमहांकाळमधील निवडणुकीचाही उल्लेख पडळकर यांनी केला. आम्ही ताकदीने शेतकऱ्यांच्या बाजूने उभे राहणार आहोत, असे सांगत ते म्हणाले की घोरपडे यांना पराभूत करण्यासाठी अनेक कटकारस्थाने रचण्यात आली, पण ते सर्वांना पुरून उरले आहेत. या निवडणुकीत मोठ्या प्रमाणात पैशांचा गैरवापर झाला आणि मतदारांना विविध आमिषे दाखवण्यात आली, असा आरोपही त्यांनी केला. 'आम्ही निवडणुकीच्या मैदानात उशिरा उतरलो असलो, तरी थेट बँकेत पोहोचलो आहोत,' असे सांगून त्यांनी आपल्या विजयाचे राजकीय महत्त्व अधोरेखित केले.

बँकेच्या सत्तेत सहभागी होणार का, या प्रश्नावर पडळकर यांनी सावध भूमिका घेतली. वरिष्ठ नेते जो निर्णय घेतील, तो आम्हाला मान्य असेल, असे त्यांनी सांगितले. चांगल्या कामाच्या पाठीशी आम्ही उभे राहू, तर चुकीच्या कामाला विरोध करू, असेही ते म्हणाले.

बँकेतील नोकरभरतीबाबतही पडळकर यांनी भूमिका मांडली. शिपाई भरतीची चौकशी मुख्यमंत्र्यांनी लावली आहे, असे त्यांनी सांगितले. आता लिपिक पदाच्या परीक्षेतही आम्ही लक्ष घालणार आहोत, असेही त्यांनी सांगितले. निवडणूक संपल्यानंतर आता बँकेतील सत्तेची समीकरणे, नोकरभरती आणि बँकेचा कारभार या मुद्द्यांवरून जिल्ह्यात राजकीय संघर्ष पेटण्याची चिन्हे आहेत.