कुंभमेळ्याच्या निमित्ताने गांजा व खसखस लागवडीची परवानगी द्या, नाशिकच्या शेतकऱ्याचे राष्ट्रपतींना निवेदन

महाराष्ट्रात गांजाची लागवड करणे हा गुन्हा आहे. तरीही नाशिकमधील एका शेतकऱ्याने थेट राष्ट्रपती द्रौपदी मुर्मू यांच्याकडे गांजा आणि खसखसची शेती करू द्यावी, अशी मागणी केली आहे. नाशिकमध्ये होणाऱ्या कुंभमेळ्याचा संदर्भ देत ही मागणी करण्यात आल्याने सगळीकडे एकच खळबळ उडाली आहे.

नाशिकमधील सायाळे गावचे शेतकरी विजय रामनाथ शिंदे यांनी राष्ट्रपतींना याबाबतचे निवेदन दिले आहे. गांजाची वनस्पती तशी औषधीच आहे, पण तिचे काही चांगले आणि काही वाईट गुण आहेत. त्यामुळे राज्यात तिच्या लागवडीला परवानगी नाही. शिंदे यांच्या या वेगळ्या मागणीची सध्या नाशिकसह राज्यभर चर्चा सुरू आहे.

एका मुलाखतीत शिंदे यांनी अनेक मुद्दे मांडले. त्यांनी सांगितले की, यावर्षी नाशकात कुंभमेळा होणार आहे आणि तिथे लाखो साधू येणार आहेत. या साधूंना लागणारा गांजा बाहेरच्या राज्यांतून येतो. राज्यात सध्या दुष्काळाची स्थिती आहे, हे पाहता निदान तात्पुरत्या स्वरूपात तरी गांजा आणि खसखस लावू द्या, अशी मागणी त्यांनी केली.

शिंदे यांनी असेही म्हटले की, काही राज्यांमध्ये अटी आणि शर्तींसह गांजाच्या शेतीला परवानगी दिली जाते, मग महाराष्ट्रात का नाही? मी काही चुकीचे बोलत असेन तर माझ्यावर गुन्हा दाखल करा, असेही त्यांनी मुलाखतीत सांगितले.

निवेदनात शिंदे यांनी शेतीसमोरची आर्थिक अडचण मांडली आहे. यंदाचा पाऊस, शेतमालाला मिळणारा अगदी कमी भाव आणि दुष्काळी परिस्थिती यामुळे शेतकऱ्यांचे आर्थिक गणित कोलमडले आहे, असे त्यांनी म्हटले आहे. पारंपरिक शेतीतून अपेक्षित उत्पन्न मिळत नाही, त्यामुळे पर्यायी पिकांचा विचार करणे गरजेचे आहे, असे सांगत त्यांनी स्थानिक शेतकऱ्यांना गांजा आणि खसखस लावण्याची परवानगी द्यावी, अशी मागणी केली आहे.

सिन्नर तालुक्यातून अशी मागणी होण्याची ही पहिलीच वेळ नाही. याच वर्षी मे महिन्यात शेतकरी सुनील उकिर्डे यांनीही प्रशासनाकडे अशी मागणी केली होती. कांद्याला फक्त 12.35 रुपये प्रतिकिलो भाव मिळाल्याने त्यांचे मोठे आर्थिक नुकसान झाले होते. त्यातून बाहेर पडण्यासाठी त्यांनी तहसीलदारांना निवेदन देऊन गांजा लागवडीची परवानगी मागितली होती.

सिंहस्थ कुंभमेळ्याच्या ध्वजारोहण कार्यक्रमासाठी राष्ट्रपती द्रौपदी मुर्मू नाशिक दौऱ्यावर आल्या असताना शिंदे यांनी हे निवेदन त्यांच्याकडे दिले, असे सांगितले जात आहे. कुंभमेळ्याचा संदर्भ देऊन त्यांनी आपल्या मागणीचे समर्थन केल्याचीही चर्चा आहे. आता सरकार या मागणीची काय दखल घेते, याकडे शेतकरी वर्गाचे लक्ष लागले आहे.