रोशन गेटमधील अतिक्रमण कारवाई ठरलेल्या कार्यपद्धतीनुसारच, उच्च न्यायालयाचे निरीक्षण; ५० लाखांच्या भरपाईच्या

छत्रपती संभाजीनगरमधील रोशन गेट परिसरातील अतिक्रमण हटवण्यासाठी महापालिकेने केलेली कारवाई ठरलेल्या कार्यपद्धतीनुसारच झाली, असे निरीक्षण मुंबई उच्च न्यायालयाच्या छत्रपती संभाजीनगर खंडपीठाने नोंदवले आहे. या कारवाईविरोधात दाखल झालेल्या याचिकेवरील सुनावणीच्या वेळी महापालिकेने कोणती प्रक्रिया राबवली, याची न्यायालयाने दखल घेतली.

सईदा फरीदा अनिस मोहम्मद अनिस अहमद यांनी ही याचिका दाखल केली होती. त्यांनी ५० लाख रुपयांच्या नुकसानभरपाईची मागणी केली होती. रोशन गेट परिसरातील संबंधित मालमत्तेवरील अतिक्रमण हटवण्याच्या महापालिकेच्या कारवाईला आव्हान देत त्यांनी उच्च न्यायालयात धाव घेतली. कारवाईमुळे आपले नुकसान झाले, असा दावा त्यांनी केला होता.

सुनावणीच्या वेळी महापालिकेच्या वतीने कारवाईआधी कोणती प्रक्रिया पार पाडली गेली, याची माहिती न्यायालयासमोर मांडण्यात आली. महापालिकेच्या म्हणण्यानुसार, संबंधित अतिक्रमणधारकांना अतिक्रमण स्वतःहून हटवण्याची संधी आधी देण्यात आली होती. त्यासाठी वर्तमानपत्रात जाहीर प्रगटन प्रसिद्ध करण्यात आले. तसेच प्रत्यक्ष कारवाई सुरू होण्याआधी सलग तीन दिवस ध्वनिक्षेपकावरून परिसरात सूचना देऊन अतिक्रमणे स्वतःहून काढून घेण्याचे आवाहन करण्यात आले होते. या प्रक्रियेनंतरच अतिक्रमण हटवण्याची कारवाई करण्यात आली, अशी बाजू महापालिकेने मांडली.

महाराष्ट्र महानगरपालिका अधिनियमातील कलम २३० आणि २३१ चाही आधार महापालिकेने घेतला. या कलमांनुसार रस्त्याला बाधा निर्माण करणाऱ्या अतिक्रमणांविरोधात नोटीस न देता कारवाई करण्याचा अधिकार महापालिकेला आहे, असे प्रशासनाकडून स्पष्ट करण्यात आले.

अतिक्रमणे हटवणे आणि शहराचा विकास नियोजनबद्ध पद्धतीने करणे, यासाठी कायद्याच्या चौकटीत राहून कारवाई केली जात आहे, अशी भूमिका महापालिकेने मांडली. सुनावणीच्या वेळी महापालिकेच्या वतीने संतोष वाहुळे, विधीज्ञ अॅड. संभाजी टोपे आणि अॅड. वैभव देशमुख यांनी बाजू मांडली.

अतिक्रमण निर्मूलन विभागाचे प्रमुख संतोष वाहुळे यांनी अतिक्रमणधारकांना आवाहन केले आहे. शहराच्या विकासासाठी आणि सार्वजनिक हिताच्या संरक्षणासाठी महापालिका कटिबद्ध आहे, असे त्यांनी सांगितले. अतिक्रमणविरोधी कारवाई करताना कायदेशीर तरतुदींचे पालन केले जाईल, असेही ते म्हणाले. अतिक्रमणधारकांनी स्वतःहून अतिक्रमणे हटवून संभाव्य नुकसान टाळावे, असे आवाहन वाहुळे यांनी केले.