पुण्यातील MPSC आंदोलनात रोहित पवारांचा पोलिसांना इशारा, १५ मिनिटांत निर्णयाची मागणी

पुण्यात सुरू असलेल्या MPSC विद्यार्थ्यांच्या आंदोलनात आज आणखी एक वळण आले. आमदार रोहित पवार यांनी एस. एम. जोशी पुलाजवळ आंदोलन करणाऱ्या विद्यार्थ्यांच्या दिशेने वाहतूक वळवली जात असल्याचा दावा केला. यामुळे विद्यार्थ्यांना त्रास होत आहे, असे त्यांनी सांगितले. एखादे वाहन विद्यार्थ्यांच्या पायावर गेले तर परिस्थिती गंभीर होऊ शकते, अशी चिंताही त्यांनी व्यक्त केली.

याच मुद्द्यावरून रोहित पवार यांनी पोलिसांना इशारा दिला. पुढील १० ते १५ मिनिटांत योग्य निर्णय घ्यावा, असे त्यांनी सांगितले. हा इशारा दिल्यानंतर आंदोलनस्थळी विद्यार्थीही आक्रमक झाल्याचे दिसले.

पवार म्हणाले, "पोलिसांनी पुढील १५ मिनिटात योग्य निर्णय नाही घेतला तर आम्ही अलका टॉकीज चौकात जाऊन बसावे लागेल." तसेच, "कृपा करून इकडे वाहने डायव्हर्ट केल्याने त्यांना त्रास होतोय. तुम्हाला फोटो, व्हिडीओ काढून त्याचा वापर कोर्टात करायचा असेल तर मग आम्ही आमची ताकद दाखवू," असेही त्यांनी म्हटले.

गेल्या सात दिवसांपासून वाहतूक वळवण्यात आली होती, पण कालपासून आंदोलनाच्या दिशेने वाहने पाठवली जात आहेत, असा दावा त्यांनी केला. "गाडी विद्यार्थ्यांच्या पायावर वगैरे गेली तर मग अवघड आहे," असेही पवार म्हणाले.

त्यानंतर पवार यांनी पोलिसांना आणखी १० ते १५ मिनिटांचा वेळ देत असल्याचे सांगितले. अलका चौकात जाऊन बसलो तर तिथून उठणार नाही, अशी भूमिका त्यांनी मांडली. पोलिसांनी आंदोलनस्थळाबाबत नोटिसा दिल्या असल्या तरी विद्यार्थी मागे हटणार नाहीत, असाही इशारा त्यांनी दिला. दरम्यान, पवार यांच्या या भूमिकेनंतर एस. एम. जोशी पुलावरील वाहतूक बंद करण्यात आल्याची माहिती समोर आली आहे.

आंदोलनाचा आज आठवा दिवस आहे. पुणे पोलिसांनी आंदोलक विद्यार्थ्यांना आंदोलनस्थळ रिकामे करण्याच्या सूचना दिल्या आहेत. सार्वजनिक वाहतूक आणि कायदा-सुव्यवस्थेचा प्रश्न निर्माण होऊ नये, यासाठी ही कारवाई केली जात आहे, असे पोलिसांकडून सांगण्यात आले. पोलिसांच्या व्हॅनमधून आंदोलकांना शांततेने आंदोलन थांबवण्याचे आवाहनही करण्यात आले आहे.

या आंदोलनाच्या पार्श्वभूमीवर मुंबई उच्च न्यायालयाने सामान्य पुणेकरांना त्रास होणार नाही याची काळजी घेण्याचे निर्देश दिले आहेत. या प्रकरणी सरकारने प्रतिज्ञापत्र दाखल करावे, असेही न्यायालयाने सांगितले आहे.

गेल्या काही दिवसांपासून रोहित पवार यांच्या नेतृत्वाखाली पुण्यात MPSC विद्यार्थ्यांचे आंदोलन सुरू आहे. MPSC अध्यक्ष विवेक भीमनवार यांच्या राजीनाम्यासह विविध मागण्या आंदोलनात मांडल्या जात आहेत. आंदोलनाची व्याप्ती वाढत असताना विविध राजकीय नेते आणि सामाजिक कार्यकर्ते आंदोलनस्थळी जाऊन विद्यार्थ्यांशी संवाद साधत आहेत. पुण्यातील आंदोलन मुंबईच्या दिशेने हलवण्याबाबतही चर्चा सुरू असल्याचे समोर आले आहे. त्यामुळे पुढील काही तासांत प्रशासन आणि आंदोलक काय भूमिका घेतात, याकडे लक्ष लागले आहे.