रिश्ता तोडल्याच्या रागातून तरुणीला रस्त्यात मारहाण, छेडछाडीचा आरोप
नागपूर शहरातील प्रतापनगर पोलीस स्टेशनच्या हद्दीत येणाऱ्या आयटी पार्कजवळ एका तरुणावर रस्त्यातच एका तरुणीशी मारहाण आणि छेडछाड केल्याचा आरोप आहे. आपल्याशी असलेले नाते तोडल्यामुळे संतापलेल्या तरुणाने हा प्रकार केल्याचे सांगितले जाते. या प्रकरणातील आरोपीचे नाव अथांग कोरडे असे असून तो 27 वर्षांचा आहे.
अथांग आणि पीडित तरुणी हे दोघेही साधारण समवयस्क असून त्यांची पहिली ओळख एका जिममध्ये झाली होती. या ओळखीचे हळूहळू मैत्रीत रूपांतर झाले. मात्र काही दिवसांनी अथांग तरुणीवर संशय घेऊ लागला. त्याच्या या वागण्याला कंटाळून त्रस्त झालेल्या तरुणीने अखेर त्याच्याशी असलेले नाते तोडून टाकले. एवढेच नाही तर तिने त्याला यापुढे फोनही करू नये, असे स्पष्टपणे सांगून टाकले होते.
तरीही अथांग तिला वारंवार फोन करत राहिला. यामुळे त्रस्त झालेल्या तरुणीने अखेर त्याचा मोबाइल नंबर ब्लॉक करून टाकला. मोबाइल नंबर ब्लॉक केल्यानंतरही अथांगने तिचा पाठलाग सोडला नाही. 18 सप्टेंबर रोजी त्याने आयटी पार्कजवळ तरुणीला अडवले. यावेळी त्याने तिला शिवीगाळ करत मारहाण केली आणि छेडछाड करून तो घटनास्थळावरून पळून गेला, असा आरोप आहे.
या घटनेनंतर तरुणीने प्रतापनगर पोलीस स्टेशनमध्ये याबाबत तक्रार दाखल केली. या तक्रारीच्या आधारे प्रतापनगर पोलिसांनी आरोपी अथांग कोरडेविरुद्ध छेडछाड आणि मारहाणीचा गुन्हा दाखल केला आहे.
