नागपुरात बनावट दारूचे रॅकेट उघड, 28.70 लाखांचा माल जप्त, एकाला अटक

नागपूर क्राइम ब्रांचने बनावट दारूची तस्करी करणाऱ्या एका रॅकेटचा पर्दाफाश केला आहे. या रॅकेटच्या एका सदस्याला अटक करण्यात आली असून नागपूर आणि वर्धासह राज्यातील अनेक जिल्ह्यांत पसरलेल्या या रॅकेटकडून बनावट दारूसह एकूण 28.70 लाखांचा माल जप्त करण्यात आला आहे.

अटक झालेल्या आरोपीचे नाव अब्दुल तौसीफ अब्दुल हफीज (34, रा. आझाद नगर, गिट्टीखदान) असे आहे. त्याचा साथीदार अंकुश उर्फ अन्ना सुधाकर कुंचनवार (38, रा. यशवंत नगर, हिंगणघाट) हा फरार असून पोलीस त्याचा शोध घेत आहेत.

क्राइम ब्रांचच्या वाहन चोरी प्रतिबंधक पथकाला अमरावती मार्गावरून एका वाहनातून मोठ्या प्रमाणात अवैध दारूची वाहतूक होत असल्याची माहिती मिळाली होती. या माहितीच्या आधारे पोलीस पथकाने अमरावती मार्गावरील आठवा मैल जवळ वाहन पकडण्याचा बेत आखला. अमरावतीकडून एमएच 40 सीडी 1591 क्रमांकाचा ट्रक येताना पोलिसांना दिसला. पोलीस पथकाने ट्रकची झडती घेतली असता त्यात भंगारसामान भरलेले आढळले. चालक अब्दुल तौसीफ याने भंगार घेऊन जात असल्याचे सांगितले. मात्र पोलिसांनी भंगार बाजूला करून ट्रकची कसून तपासणी केली असता त्याखाली एक गुप्त कप्पा असल्याचे लक्षात आले. हा कप्पा उघडताच त्यात दारूच्या पेट्या दिसल्या आणि पोलीस पथकही आश्चर्यचकित झाले. या कप्प्यात लपवलेले दारूचे 39 खोके पोलिसांनी जप्त केले.

पोलिसांनी ट्रकचालक तौसीफला ताब्यात घेतले असता त्याने हिंगणघाटच्या अन्नाने ट्रक घेऊन धुळ्याला पाठवल्याचे सांगितले. तौसीफच्या म्हणण्यानुसार, धुळ्यात काही अज्ञात आरोपींनी ट्रक नेला होता आणि त्यांनीच त्यात दारू भरून ट्रक त्याच्या ताब्यात दिला. ही दारू त्याला गडचिरोलीतील आलापल्ली येथे नेऊन सोडायची होती.

दारूच्या बाटल्यांच्या बनावटीवरून पोलिसांना त्या बनावट असल्याचा संशय आला. त्यामुळे पोलिसांनी आबकारी विभागाला तपासणीसाठी पाचारण केले. आबकारी विभागाच्या तपासणीत ही दारू बनावट असल्याचे स्पष्ट झाले आणि त्यामुळे हे प्रकरण अधिक गंभीर बनले. ट्रकची खास बनावट आणि आरोपींनी वापरलेली युक्ती पाहता हे रॅकेट बऱ्याच काळापासून गडचिरोली आणि वर्धा जिल्ह्यात बनावट दारूची तस्करी करत असल्याचे समोर येत आहे. अन्ना हा हिंगणघाटचा रहिवासी असून वर्ध्यात दारूबंदी असतानाही तो खास ट्रक तयार करून बनावट दारूची तस्करी करत होता, असा आरोप आहे. ही बनावट दारू धुळ्याहून नागपूर, वर्धा आणि गडचिरोलीपर्यंत पोहोचवली जात होती. या मार्गावर अनेक पोलीस स्टेशन तसेच महामार्ग पोलीसही कार्यरत आहेत, तरीही इतके दिवस या रॅकेटची भनक कुणाला न लागणे आश्चर्यकारक आहे.

या रॅकेटमध्ये अन्नासह ताजाबादचा सद्दाम आणि आणखी काही जण सहभागी असल्याचा संशय पोलिसांनी व्यक्त केला आहे. या रॅकेटशी संबंधित इतर आरोपींचा शोध पोलीस घेत आहेत. ही कारवाई पीआय दिलीप चंदन यांच्या मार्गदर्शनाखाली हवालदार रोशन तिवारी, विलास कोकाटे, सचिन बढिये, अजय शुक्ला, नितीन वर्मा, राहुल कुसरामे आणि अभय ढोणे यांनी केली.

बनावट दारू तयार करण्यासाठी घातक रसायनांचा वापर केला जातो, जो नागरिकांच्या जिवाशी थेट खेळ ठरतो. यापूर्वी अनेकदा बनावट दारूमुळे लोकांना जीव गमवावा लागल्याच्या घटना घडल्या आहेत. असे असतानाही अशा तस्करीचे प्रकार सर्रास घडत राहणे अत्यंत गंभीर बाब आहे.