पूर्णेकर कुटुंबाला पोलीस संरक्षण द्या, मिनाक्षी शिंदे यांचे पोलीस आयुक्तांना पत्र

ठाण्यातील मानपाडा परिसरात शिवसेना ठाकरे गटाचे विभागप्रमुख असलेल्या प्रदीप पूर्णेकर यांच्या हत्या प्रकरणामुळे राजकीय वातावरण चांगलंच तापलं आहे. आता माजी महापौर मिनाक्षी शिंदे यांनी पोलीस आयुक्तांना पत्र लिहिलं असून, त्यात त्यांनी एक मोठी मागणी केली आहे.

या प्रकरणात पूर्णेकर कुटुंबीय मिनाक्षी शिंदे आणि त्यांचे पती प्रदीप शिंदे यांच्यावर आरोप करत आहेत. त्या दोघांना अटक करावी, अशी मागणीही कुटुंबाकडून होत आहे. असं असतानाच खुद्द मिनाक्षी शिंदे यांनी पोलीस आयुक्तांकडे पत्र पाठवलं आहे.

प्रदीप पूर्णेकर यांच्या निधनानंतर त्यांचे कुटुंबीय न्याय मिळावा म्हणून आक्रमक झाले आहेत. राम पूर्णेकर आणि विरोधी पक्षातील नेत्यांनी आंदोलन करून या प्रकरणातील संशयितांवर कारवाई करण्याची मागणी केली होती. आता मात्र मिनाक्षी शिंदे यांनी वेगळाच मुद्दा पुढे आणला आहे.

विरोधी पक्षातील काही नेते या दुःखद घटनेचा वापर राजकीय स्वार्थासाठी करत आहेत, असा आरोप त्यांनी केला आहे. राजकीय आरोप-प्रत्यारोपांमुळे ठाण्यातलं वातावरण बिघडू शकतं आणि कायदा-सुव्यवस्थेचा प्रश्न निर्माण होऊ शकतो, असंही त्यांनी पत्रात म्हटलं आहे.

पत्रातला सगळ्यात महत्त्वाचा भाग म्हणजे राम पूर्णेकर आणि त्यांच्या संपूर्ण कुटुंबाच्या सुरक्षेची चिंता. राजकीय विरोधकांकडून काहीतरी अनुचित प्रकार घडवला जाऊ शकतो, अशी भीती मिनाक्षी शिंदे यांनी व्यक्त केली आहे. म्हणूनच राम पूर्णेकर, त्यांचे कुटुंबीय आणि निकटवर्तीय यांना पोलीस संरक्षण द्यावं, अशी मागणी त्यांनी केली आहे. सध्या जे पोलीस संरक्षण उपलब्ध आहे, ते तातडीने वाढवावं, अशी विनंतीही त्यांनी पोलीस आयुक्तांकडे केली आहे.

पत्रात मिनाक्षी शिंदे यांनी आदित्य ठाकरे, संजय राऊत, विनायक राऊत, अनिल परब आणि राजन विचारे यांच्यासह इतर विरोधी नेत्यांचा उल्लेख केला आहे. या प्रकरणाच्या निमित्ताने मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांची प्रतिमा मलिन करण्याचा प्रयत्न होत आहे, असा आरोपही त्यांनी केला आहे. शिवाय पत्रकार परिषदेत जामिनावर असलेले काही आरोपी उपस्थित होते, असा दावा करून त्यांनी विरोधकांच्या भूमिकेवर प्रश्न उपस्थित केले आहेत.

एकीकडे पूर्णेकर कुटुंबीय न्यायाची मागणी करत आहे, तर दुसरीकडे मिनाक्षी शिंदे यांनी त्याच कुटुंबाच्या सुरक्षेचा मुद्दा मांडला आहे. त्यामुळे या हत्या प्रकरणाला आता नवं राजकीय वळण मिळालं आहे. पोलीस प्रशासन या मागणीवर काय निर्णय घेतं, याकडे सर्वांचं लक्ष लागलं आहे.