दिया मिर्झा व्हिडीओ वादावर अमित साटम म्हणाले, आमचा विरोध कायम राहणार

अभिनेत्री दिया मिर्झा हिच्या दिवाळीच्या व्हिडीओवरून सुरू झालेला वाद अजून शांत झालेला नाही. मुंबई उच्च न्यायालयाने या प्रकरणात टिप्पणी करून भाजप नेत्यांच्या वक्तव्यांबद्दल नाराजी व्यक्त केली होती. शिवाय, हटवलेला दिया मिर्झाचा व्हिडीओ पुन्हा अपलोड करा, असे निर्देशही न्यायालयाने दिले होते. या पार्श्वभूमीवर भाजप आमदार अमित साटम यांनी मुंबईत पत्रकार परिषद घेतली आणि या सगळ्या प्रकरणावर आपली भूमिका स्पष्ट केली.

दिया मिर्झाच्या व्हिडीओवर आक्षेप का घेतला, याबद्दल बोलताना साटम म्हणाले की, भारतात अराजकता पसरवणाऱ्यांबद्दल सहानुभूती दाखवणाऱ्या काही लोकांच्या भूमिकेवर आमचा आक्षेप होता आणि पुढेही राहील. मात्र कोणाची जात, धर्म किंवा भाषा यावरून आमचा आक्षेप नाही, असेही त्यांनी स्पष्ट केले.

भारतविरोधी भूमिका घेणाऱ्यांना पाठिंबा देणाऱ्यांबद्दल सहानुभूती व्यक्त करण्याआधी विचार केला पाहिजे, अशी भूमिकाही साटम यांनी मांडली.

मुंबई महानगरपालिकेने दिया मिर्झाचा व्हिडीओ आधी पोस्ट केला आणि नंतर हटवला. हा व्हिडीओ का हटवला, असे विचारल्यावर साटम म्हणाले की, महापालिकेला वाटले म्हणून त्यांनी व्हिडीओ पोस्ट केला आणि त्यांनाच वाटले म्हणून तो डिलीट केला. याचे स्पष्टीकरण प्रशासनच देऊ शकते, असे ते म्हणाले. सोशल मीडिया हँडल चालवणाऱ्यांनाच पोस्ट टाकण्याचा आणि हटवण्याचा अधिकार असतो, असेही त्यांनी सांगितले.

पुढे महापालिकेने किंवा इतर संस्थांनी कोणत्या व्यक्तींशी जोडून घेत आहोत, कोणाची मदत घेत आहोत आणि कोणाला मदत करत आहोत, याचा आधी अभ्यास करावा, असे साटम यांनी सुचवले. नीट विचार करून निर्णय घेतले तर अशा घटना टाळता येतील, असे मतही त्यांनी व्यक्त केले.

मुंबई उच्च न्यायालयाने केलेल्या निरीक्षणांबद्दल विचारले असता साटम यांनी सांगितले की, न्यायालयाने कोणत्या संदर्भात टिप्पणी केली आहे, याचा आम्ही नक्कीच अभ्यास करू.

या प्रकरणाची पार्श्वभूमी अशी की, सार्वजनिक रस्त्यांवर फटाके फोडू नयेत, या न्यायालयाच्या निर्देशांबद्दल जनजागृती करण्यासाठी महापालिकेने दिया मिर्झाचा हा व्हिडीओ तयार केला होता. मात्र अमित साटम यांनी आक्षेप घेतल्यानंतर तो व्हिडीओ हटवण्यात आला होता.

आता उच्च न्यायालयाच्या निर्देशानंतर हा व्हिडीओ पुन्हा पोस्ट करण्याचा मुद्दा चर्चेत आला आहे. त्यामुळे साटम यांच्या या ताज्या प्रतिक्रियेनंतर हा वाद पुढे कोणते वळण घेतो, याकडे राजकीय वर्तुळाचे लक्ष लागले आहे.