फ्लायदुबईच्या विमानात चाकूहल्ल्याचा दावा; पायलट स्मित मछार यांच्या धाडसाचे जगभर कौतुक

भारतीय पायलट स्मित मछार यांच्या धाडसाची चर्चा सध्या जगभर सुरू आहे. फ्लायदुबईच्या विमानात त्यांच्यासोबत घडलेल्या प्रकाराचे किस्से सोशल मीडियावर खूप शेअर होत आहेत. पंतप्रधान नरेंद्र मोदी यांच्यापासून इस्रायलचे पंतप्रधान बेंजामिन नेतन्याहू यांच्यापर्यंत अनेक मोठे लोक त्यांच्या धैर्याचे कौतुक करत आहेत. या घटनेत १७४ प्रवाशांचे प्राण वाचले, असे सांगितले जात आहे.

सांगितल्या जाणाऱ्या घटनाक्रमानुसार, विमानाचे नियंत्रण स्मित मछार आणि ओमानचा को-पायलट या दोघांकडे होते. विमानाने टेक-ऑफ केल्यानंतर जमिनीपासून ३३,००० फूट उंचीवर ओमानच्या को-पायलटने अचानक कंट्रोल पॅनेल आपल्या हातात घेतले आणि विमान क्रॅश करण्याचा प्रयत्न सुरू केला, असा दावा आहे. भारतीय पायलटने आपल्या कटात आडकाठी करू नये म्हणून त्याने मछार यांच्यावर चाकूने हल्ला केला, असेही म्हटले जात आहे. या हल्ल्यात मछार गंभीर जखमी झाले आणि त्यांच्या अंगातून रक्त वाहू लागले.

त्यानंतर विमान वेगाने खाली येऊ लागले. ३३,००० फूट उंचीवरून अवघ्या ३० सेकंदांत ते १७,००० फुटांपर्यंत आले होते. मछार जखमी होते, तरीही त्यांनी हिंमत सोडली नाही. ओमानच्या पायलटकडून त्यांनी कंट्रोल पॅनेल आपल्या हातात घेतले आणि कॉकपिटमध्येच विमान क्रॅश होऊ नये म्हणून प्रयत्न केले. जखमी अवस्थेत को-पायलटचा सामना करायचा, विमानाची सूत्रे हातात घ्यायची आणि या भीषण परिस्थितीतून सुरक्षित लँडिंग करायचे, ही काही सोपी गोष्ट नाही.

घटनेची माहिती एअर ट्रॅफिक कंट्रोलपर्यंत म्हणजेच एटीसीपर्यंत पोहोचवण्यासाठी मछार यांनी सर्वात आधी ७७०० हा कोड पाठवला. आणीबाणीच्या वेळी पायलट ट्रान्सपॉन्डरमध्ये स्क्वॉक ७७०० हा कोड पाठवतो. विमान गंभीर अडचणीत आहे आणि त्याला मदत हवी आहे, हे ग्राउंड कंट्रोलला कळते. या कोडमुळे तेल अवीवहून निघालेले हे विमान हायजॅक झाल्याची माहिती सुरुवातीलाच मिळाली. पण विमान सुरक्षित उतरल्यानंतर आणि प्रवाशांशी बोलल्यावर आतल्या रक्तरंजित थराराची खरी कहाणी समोर आली.

इस्रायलचे पंतप्रधान बेंजामिन नेतन्याहू यांनी या घटनेवर प्रतिक्रिया दिली. ते म्हणाले, "मी एका इस्रायली प्रवाशाशी बोललो. त्याने मला सांगितले की विमान गरगर फिरू लागले आणि खाली कोसळू लागले." त्या प्रवाशाने नेतन्याहू यांना असेही सांगितले की, एका क्रू मेंबरच्या मदतीने त्यांनी कसेबसे कॉकपिटचा दरवाजा उघडला आणि सर्वांनी मिळून ओमानच्या पायलटवर हल्ला चढवला.

या संपूर्ण घटनेचा तपशीलवार एआय व्हिडिओ अलीकडे सोशल मीडियावर शेअर करण्यात आला आहे. घटना कशी घडली, हल्ला कसा झाला आणि भारतीय पायलटने विमानाचे सेफ लँडिंग कसे केले, हे त्यात दाखवले आहे. हा व्हिडिओ इंटरनेटवर ट्रेंड करत असून पायलटच्या धाडसाचे आता जगभर कौतुक होत आहे.