वेस्ट इंडिज मालिकेनंतर टीम इंडिया न्यूझीलंड दौऱ्यावर; टी-२०, एकदिवसीय आणि कसोटीचे पूर्ण वेळापत्रक

भारत आणि वेस्ट इंडिज यांच्यातील एकदिवसीय आणि टी-२० मालिका आता संपली आहे. भारताने एकदिवसीय मालिका २-१ ने जिंकली, तर टी-२० मालिका २-२ अशी बरोबरीत सुटली. वेस्ट इंडिज मालिकेनंतर आता भारतीय संघ न्यूझीलंडच्या मोठ्या दौऱ्यावर जाणार आहे.

या न्यूझीलंड दौऱ्यात तिन्ही फॉरमॅट मिळून एकूण १२ सामने खेळले जातील. त्यात पाच टी-२० आंतरराष्ट्रीय, पाच एकदिवसीय आणि दोन कसोटी सामने आहेत. भारताचा हा दौरा २२ ऑक्टोबरला सुरू होणार आहे. सुरुवातीला टी-२० मालिका होईल, त्यानंतर एकदिवसीय मालिका आणि शेवटी कसोटी मालिका असा क्रम आहे.

भारताचा न्यूझीलंड दौरा २२ ऑक्टोबर ते १ नोव्हेंबर २०२६ दरम्यान टी-२० मालिकेने सुरू होईल. या मालिकेतले पहिले दोन सामने क्राइस्टचर्चमध्ये होतील. त्यानंतर दोन्ही संघ वेलिंग्टन, ऑकलंड आणि हॅमिल्टन येथे एकमेकांविरुद्ध खेळतील. टी-२० मालिकेतले सगळे सामने भारतीय प्रमाणवेळेनुसार दुपारी १२.३० वाजता सुरू होतील. श्रेयस अय्यरच्या नेतृत्वाखालील या मालिकेसाठी युवा खेळाडू वैभव सूर्यवंशीचीही निवड झाली आहे. वैभव न्यूझीलंडमध्ये आपल्या स्फोटक फलंदाजीने धुमाकूळ घालताना दिसेल.

टी-२० मालिकेनंतर भारत आणि न्यूझीलंड यांच्यात पाच सामन्यांची एकदिवसीय मालिका ४ नोव्हेंबर ते १५ नोव्हेंबर या काळात खेळवली जाईल. पहिले तीन सामने ऑकलंड, वेलिंग्टन आणि हॅमिल्टनमध्ये होतील. मालिकेतले शेवटचे दोन सामने माउंट माउंगानुई येथील बे ओव्हलवर होतील. एकदिवसीय मालिकेतले सगळे सामने भारतीय प्रमाणवेळेनुसार सकाळी ७.३० वाजता सुरू होतील. या मालिकेत रोहित शर्मा आणि विराट कोहली यांच्यासारखे अनुभवी खेळाडू खेळताना दिसतील.

दौऱ्याचा शेवटचा टप्पा सर्वात रोमांचक ठरणार आहे. कारण या टप्प्यात भारत आणि न्यूझीलंड यांच्यात दोन सामन्यांची कसोटी मालिका होणार आहे. ही मालिका १९ नोव्हेंबर ते १ डिसेंबर २०२६ दरम्यान खेळवली जाईल. आयसीसी जागतिक कसोटी चॅम्पियनशिप (WTC) २०२५-२७ च्या अंतिम सामन्याच्या पार्श्वभूमीवर ही मालिका भारतासाठी खूप महत्त्वाची आहे. ही मालिका जिंकून गुणतालिकेतले आपले स्थान सुधारण्याची संधी भारताकडे असेल.

पहिला कसोटी सामना १९ ते २३ नोव्हेंबर दरम्यान वेलिंग्टनमधील बेसिन रिझर्व्ह येथे खेळला जाईल. दुसरा कसोटी सामना २७ नोव्हेंबर ते १ डिसेंबर दरम्यान क्राइस्टचर्चमधील हॅगली ओव्हल येथे होईल. कसोटी सामना भारतीय प्रमाणवेळेनुसार दुपारी ३.३० वाजता सुरू होईल.