नाशिकमध्ये सिग्नल तोडून कारने महिलेला धडक, वाहतूक पोलिसावर कार घालण्याचा प्रयत्न

नाशिक शहरातील गजबजलेल्या दत्त मंदिर सिग्नल परिसरात मंगळवारी एक थरारक प्रकार घडला. वाहतूक नियम धाब्यावर बसवून भरधाव कार चालवणाऱ्या एका २२ वर्षीय संशयित चालकाने कर्तव्यावर असलेल्या वाहतूक पोलिसाच्या अंगावर थेट कार घालण्याचा प्रयत्न केला. या घटनेपूर्वी संशयिताने एका महिला दुचाकीस्वाराला जोरदार धडक दिली होती, अशी माहिती पोलिसांनी दिली आहे. पाठलाग करून पोलिसांनी संशयित चालक वैभव दांडे याला ताब्यात घेतले. या संपूर्ण घटनेचा व्हिडीओ एका नागरिकाने मोबाईलमध्ये शूट केला असून तो सोशल मीडियावर व्हायरल झाला आहे.

पोलिसांनी दिलेल्या माहितीनुसार, दत्त मंदिर चौकात वाहतूक पोलीस नेहमीप्रमाणे वाहतूक नियंत्रणाचं काम करत होते. त्याचवेळी संशयित वैभव दांडे भरधाव वेगात कार घेऊन आला आणि त्याने सिग्नल तोडला. पुढे जाताना त्याच्या कारने एका महिला दुचाकीस्वाराला जोरदार धडक दिली. ही धडक झाल्यानंतर तिथे तैनात असलेल्या पोलीस हवालदाराने संशयिताला कार थांबवण्याचा इशारा दिला. पण चालकाने कार थांबवण्याऐवजी उलट वेग आणखी वाढवला.

यानंतर संशयिताने कार थेट हवालदाराच्या दिशेने नेली आणि काही क्षण तिथे तणावाचं वातावरण तयार झालं. कार अंगावर येताना बघून हवालदाराने प्रसंगावधान राखत बाजूला उडी मारली, त्यामुळे मोठा अपघात टळला. यानंतरही संशयिताने कार न थांबवता पुढे नेली. हा सगळा प्रकार जागेवर उपस्थित असलेल्या एका नागरिकाने आपल्या मोबाईलमध्ये रेकॉर्ड केला. पोलिसावर कार घालण्याचा प्रयत्न झाल्याचा हा व्हिडीओ सध्या सोशल मीडियावर मोठ्या प्रमाणात फिरतो आहे.

हवालदाराला चुकवून संशयिताने कारसह घटनास्थळावरून पळून जाण्याचा प्रयत्न केला. मात्र तिथे असलेल्या पोलिसांनी लगेच त्याचा पाठलाग सुरू केला. यावेळी काही नागरिकांनीही पोलिसांना मदत केली. अखेर पोलिसांनी संशयिताला कारसह ताब्यात घेतलं. त्यानंतर त्याला पोलीस स्टेशनला नेऊन चौकशी करण्यात आली. या घटनेमुळे दत्त मंदिर सिग्नल भागातल्या वाहतूक सुरक्षेचा मुद्दाही पुन्हा चर्चेत आला आहे.

या प्रकरणी नाशिकच्या उपनगर पोलीस स्टेशनमध्ये संशयिताविरोधात गुन्हा दाखल करण्यात आला आहे. शासकीय कामात अडथळा आणणे, वाहतूक नियमांचं उल्लंघन करणे आणि सदोष मनुष्यवधाचा प्रयत्न अशा वेगवेगळ्या कलमांखाली ही कारवाई करण्यात आली आहे. पोलिसांकडून या घटनेचा सविस्तर तपास सुरू असून, महिला दुचाकीस्वाराला झालेल्या धडकेबद्दलही अधिक माहिती घेतली जात आहे. व्हिडीओ आणि इतर उपलब्ध पुराव्यांच्या आधारे घटनाक्रम तपासला जातो आहे.