शेतकऱ्यांनो आत्महत्या करू नका, तुमच्या पाया पडतो! जरांगे पाटील भावुक, फायनान्स कंपन्यांबाबत केले आवाहन

नांदेडमध्ये एका खासगी फायनान्स कंपनीच्या कार्यालयात एका शेतकऱ्याचा मृतदेह आढळल्याच्या घटनेने राज्यात खळबळ उडाली आहे. या घटनेवर मराठा आंदोलक मनोज जरांगे पाटील यांनी तीव्र प्रतिक्रिया दिली आहे. त्या शेतकरी कुटुंबाची आपण भेट घेणार आहोत आणि हा विषय सरकारदरबारी लावून धरणार आहोत, असे त्यांनी स्पष्ट केले. यावेळी शेतकऱ्यांनी आत्महत्या करू नये, असे भावनिक आवाहनही त्यांनी केले.

शेतकऱ्यांच्या अडचणींवर बोलताना जरांगे पाटील भावुक झाले. संकटे आपल्या पाठीशी लागली आहेत, पण दुष्काळाचे संकटही निघून जाईल, असे ते म्हणाले. त्यामुळे शेतकऱ्यांनी टोकाचे पाऊल उचलू नये, असे त्यांनी सांगितले. हात जोडून त्यांनी शेतकऱ्यांना विनंती केली, "आत्महत्या करू नका, तुमच्या पाया पडतो. लेकराबाळांचं लय हाल होतात."

क्रांतिकारी शेतकरी संघटनेने फायनान्स कंपनीचे कार्यालय फोडले, त्या घटनेवरही जरांगे यांनी प्रतिक्रिया दिली. शेतकरी कुटुंबाच्या पाठीशी आपण ताकदीने उभे राहणार आहोत, असे सांगत त्यांनी फायनान्स कंपन्यांच्या वसुलीच्या पद्धतीवर आक्षेप घेतला. फायनान्सवाल्यांना पैसे द्यायचे नाहीत, महाराष्ट्रात कोणीही पैसे भरायचे नाहीत, असे आवाहनही त्यांनी केले. त्यांच्या या वक्तव्यामुळे कर्जवसुलीचा मुद्दा पुन्हा चर्चेत आला आहे.

यावेळी जरांगे पाटील यांनी राज्य सरकारवरही गंभीर आरोप केले. मराठा समाजातील काही लोकांना आपल्याविरोधात बोलण्यासाठी पुढे केले जात आहे, असे त्यांनी म्हटले. एकनाथ शिंदे आणि देवेंद्र फडणवीस यांच्या समर्थकांकडून आपल्याविरोधात वातावरण तयार केले जात आहे, असेही ते म्हणाले. मात्र अशा टीकेला आपण उत्तर देत बसणार नाही, असे त्यांनी स्पष्ट केले.

आगामी राजकारणाबद्दल बोलताना त्यांनी २०२९ च्या निवडणुकीचा उल्लेख केला. योग्य वेळी मतदानाबाबतची भूमिका जाहीर करू, असे सांगत सत्तेत मराठा समाजाचे चार ते पाच मंत्री असायलाच हवेत, अशी अपेक्षा त्यांनी व्यक्त केली.

इतर समाजांना अडचणीच्या वेळी त्यांच्या समाजातील मंत्र्यांचा आधार मिळतो, पण मराठा समाजाला तसा आधार मिळत नाही, अशी खंतही त्यांनी बोलून दाखवली.

एकीकडे शेतकऱ्यांच्या प्रश्नांवर आक्रमक भूमिका आणि दुसरीकडे २०२९ च्या राजकारणाचे संकेत, यामुळे जरांगे पाटील यांच्या वक्तव्यांची सध्या चर्चा सुरू झाली आहे. शेतकरी आत्महत्या, फायनान्स कंपन्यांची वसुली आणि मराठा समाजाला सत्तेत मिळणारे स्थान, या तिन्ही मुद्द्यांना त्यांनी हात घातला.