नांदेडमध्ये आदिवासी प्रकल्पात १६ कोटींचा अपहार, २८० चेक परस्पर वटवल्याचा आरोप

नांदेड जिल्ह्यातील किनवट येथील एकात्मिक आदिवासी विकास प्रकल्प कार्यालयात शासकीय निधीचा मोठा अपहार झाल्याचे समोर आले आहे. एकूण १६ कोटी ३७ लाख ६६ हजार ९१२ रुपयांचा हा गैरव्यवहार असल्याचे तपासात उघड झाले आहे. आदिवासी बांधवांच्या विकासासाठी आलेल्या पैशावर अधिकारी आणि कर्मचाऱ्यांनी संगनमताने डल्ला मारल्याचा आरोप होत आहे. या प्रकरणात कार्यालयातील वरिष्ठ लिपिक भगवान उद्धवराव डवरे याच्याविरुद्ध गुन्हा नोंदवण्यात आला आहे. मात्र एकट्या एका कर्मचाऱ्याला एवढा मोठा घोटाळा करणे शक्य आहे का, असा सवाल आता उपस्थित होतो आहे.

१ एप्रिल २०२४ ते १६ सप्टेंबर २०२६ या जवळपास अडीच वर्षांच्या काळात हा प्रकार घडल्याचे सांगितले जाते. शासकीय बँक खाती आणि चेक नोंदवहीत फेरफार करून कोणतीही अधिकृत परवानगी न घेता तब्बल २८० चेक परस्पर वटवण्यात आले. तपासानुसार ही रक्कम शासकीय कामांसाठी वापरलीच गेली नाही, तर सुशिक्षित बेरोजगार तरुण, अल्पवयीन मुले, मजूर, दुकानदार आणि इतर खासगी लोकांच्या खात्यांत वळवण्यात आली. यातील ५७ जणांच्या नावावर सुमारे १३ कोटी रुपये काढण्यात आल्याचे तपासात पुढे आले आहे. केंद्रीय निधी परत जात नाही, याचा फायदा घेत काही चेकवर खरी सही घेतली गेली तर उरलेल्या चेकवर अधिकाऱ्यांची बनावट सही करून व्यवहार पार पाडल्याचा आरोप आहे.

या काळात किनवटला तीन वेगवेगळे IAS दर्जाचे प्रकल्प अधिकारी काम करत होते - मेघना कावली, जिनीत दोनतुला आणि बी. सर्वरण. एवढी मोठी रक्कम वटवताना साधारण तीन ते चार जबाबदार अधिकाऱ्यांची सही लागते आणि खात्याची व सहीची पडताळणी होते, तरीही तीन वर्षे हे व्यवहार सुरू राहिले. या दरम्यान दोनदा सरकारी ऑडिटही झाले, तरी हा गैरव्यवहार ऑडिटर्सच्या नजरेतून कसा सुटला, याबद्दल नागरिक आणि आदिवासी संघटना प्रश्न विचारत आहेत. बँक अधिकाऱ्यांच्या संगनमताशिवाय एवढे व्यवहार शक्य नाहीत असेही बोलले जात आहे, त्यामुळे फक्त एका लिपिकावर गुन्हा दाखल करून मोठ्या अधिकाऱ्यांना वाचवले जात आहे का, अशी शंका व्यक्त होते आहे.

जुलै २०२६ मध्ये पदभार घेतलेले प्रकल्प अधिकारी तथा उपविभागीय दंडाधिकारी बी. सर्वरण यांनी कार्यालयाचे मुख्य खाते तपासले तेव्हा हे संशयास्पद व्यवहार समोर आले. त्यानंतर जिल्हाधिकारी राहुल कर्डिले यांच्या मार्गदर्शनाखाली, प्रकल्प कार्यालयातील अधिकारी प्रेमसिंग बाबुसिंग आडे यांच्या तक्रारीवरून पोलीस स्टेशनमध्ये गुन्हा नोंदवण्यात आला. याबाबत विचारणा केली असता बी. सर्वरण यांनी माहिती देण्यास नकार देत, हे प्रकरण गोपनीय असल्याचे सांगून पत्रकारांना कार्यालयाबाहेर जायला सांगितले.

सध्या या प्रकरणाचा तपास पोलीस निरीक्षक जगदीश मंडलवार करत आहेत. सर्व २८० व्यवहारांची तपासणी सुरू असून हा घोटाळा आणखी वाढण्याची शक्यता आहे. मोठे अधिकारी पोलिसांच्या जाळ्यात कधी अडकतात आणि त्यांच्यावर फौजदारी गुन्हे दाखल होतात का, याकडे नांदेड जिल्ह्यासह संपूर्ण महाराष्ट्राचे लक्ष लागले आहे.