नालासोपाऱ्यात कुत्र्याला मारल्याच्या वादातून ४० ते ५० जणांचा जमाव घरात घुसला

नालासोपाऱ्यातील श्रीराम नगर परिसरात सोमवारी रात्री साडेनऊच्या सुमारास अतिशय विचित्र आणि धक्कादायक घटना घडली. कुत्र्याला मारल्याच्या कारणावरून सुरू झालेला वाद इतका विकोपाला गेला की ४० ते ५० अज्ञात लोकांचा जमाव थेट एका घरात घुसला. त्यांनी घरातील सामानाची मोठ्या प्रमाणावर तोडफोड केली आणि हाणामारीही केली.

या घटनेनंतर संपूर्ण श्रीराम नगर परिसरात प्रचंड भीतीचे आणि तणावाचे वातावरण पसरले आहे. रात्रीच्या वेळी अचानक झालेल्या या प्रकारामुळे परिसरातील लोक चिंतेत आहेत.

मिळालेल्या माहितीनुसार, या प्रकरणाची सुरुवात १ नोव्हेंबर रोजी झाली होती. त्या दिवशी कुत्र्याला मारल्याच्या क्षुल्लक कारणावरून दोन गटांमध्ये वाद झाला आणि त्याचे पर्यवसान हाणामारीत झाले. त्याबाबत पेल्हार पोलीस स्टेशनमध्ये गुन्हाही दाखल करण्यात आला होता. त्याच वादाचा राग मनात धरून सोमवारी रात्री साडेनऊच्या सुमारास ४० ते ५० अज्ञात लोकांचा टोळका अचानक एका घरात घुसला, असे सांगितले जात आहे. त्यांनी घरातील सामानाची मोठ्या प्रमाणावर तोडफोड करून धुमाकूळ घातला.

घटनेची माहिती मिळताच पेल्हार पोलीस घटनास्थळी पोहोचले. मात्र तोपर्यंत सगळे हल्लेखोर तिथून पसार झाले होते.

घटनेचे गांभीर्य लक्षात घेऊन पोलीस उपायुक्त शंतनू बोराटे यांनी घटनास्थळी भेट देऊन पाहणी केली. सध्या परिसरात मोठा पोलीस बंदोबस्त ठेवण्यात आला आहे.

धक्कादायक म्हणजे, पसार होण्याआधी हल्लेखोरांनी "पुन्हा हल्ला करू" अशी उघड धमकी दिली, असे सांगण्यात आले आहे. या धमकीमुळे घाबरलेल्या अनेक कुटुंबांनी आपली घरे सोडून दुसऱ्या सुरक्षित ठिकाणी आसरा घेतला आहे.

पोलीस आता परिसरातील सीसीटीव्ही फुटेजच्या आधारे संबंधित लोकांची ओळख पटवण्याचा प्रयत्न करत आहेत. आरोपींचा कसून शोध सुरू असल्याचे सांगण्यात आले आहे. कोणाला अटक झाल्याची माहिती समोर आलेली नाही; ओळख पटवण्याचे काम अजून सुरू आहे.