नागपुरात संघाच्या विजयादशमी उत्सवाची तयारी पूर्ण, मंचावर वंदे मातरम्चा उल्लेख आणि शस्त्रपूजनात अस्मि कार्बाइन

राष्ट्रीय स्वयंसेवक संघाच्या विजयादशमी उत्सवाची नागपुरात तयारी पूर्ण झाली आहे. आज, मंगळवारी 20 ऑक्टोबर रोजी नागपुरातील रेशीमबाग मैदानावर हा सोहळा होत आहे. संघाचा यंदाचा विजयादशमी सोहळा संघाच्या इतिहासातील महत्त्वाच्या टप्प्यावर होत आहे. संघाच्या शताब्दी वर्षाची सांगता आणि पुढच्या वाटचालीची दिशा, अशा दोन्ही दृष्टींनी या कार्यक्रमाकडे देशाचे लक्ष लागले आहे.

कार्यक्रमाची सुरुवात ध्वजारोहण आणि शस्त्रपूजनाने झाली. यंदा शस्त्रपूजनाच्या जागी पारंपरिक शस्त्रांबरोबरच पूर्णपणे भारतीय बनावटीची अस्मि ही अत्याधुनिक कार्बाइनही ठेवण्यात आली आहे. या कार्यक्रमात सरसंघचालक डॉ. मोहन भागवत यांचे उद्बोधन होणार आहे. ते आपल्या मार्गदर्शनपर भाषणात नेमके काय बोलतात आणि कोणत्या मुद्द्यांना हात लावतात, याकडे सगळ्यांचे लक्ष असेल.

दैनिक जागरणचे मुख्य संपादक संजय गुप्ता हे प्रमुख पाहुणे म्हणून उपस्थित राहणार आहेत. माजी उपराष्ट्रपती जगदीप धनखड आणि इस्रायलचे मुंबईतील महावाणिज्यदूत यानिव रेवाच यांनाही या कार्यक्रमासाठी निमंत्रित करण्यात आले आहे. त्यापैकी धनखड कार्यक्रमस्थळी पोहोचले आहेत.

मुख्य मंचावरील बॅकड्रॉपवरचा संदेश सर्वांचे लक्ष वेधून घेत आहे. तिथे 'जय जय गूंजे भारत माँ की, उसी के हित में हम जिए मरे' ही ओळ लिहिली आहे. म्हणजेच देशहित सर्वात महत्त्वाचे आहे, असा संदेश मुख्य मंचावर देण्यात आला आहे. याशिवाय वंदे मातरम् या राष्ट्रीय गीताचाही उल्लेख मुख्य मंचावर आहे.

बॅकड्रॉपवर तीन लक्षवेधी गोष्टी दिसतात. पहिली म्हणजे वर सांगितलेली ओळ. दुसरी म्हणजे उजव्या बाजूला असलेला वंदे मातरम् गीताचा उल्लेख. याच वर्षी संसदेने सरकारी कार्यक्रमांमध्ये वंदे मातरम् गायन बंधनकारक करणारा Prevention of Insults to National Honour (Amendment) Act, 2026 हा कायदा मंजूर केला आणि त्याद्वारे या राष्ट्रीय गीताला कायदेशीर संरक्षण देण्यात आले आहे. तिसरी गोष्ट म्हणजे बॅकड्रॉपच्या डाव्या बाजूला देवीमातेच्या फोटोसह 'त्वं हि दुर्गा दशप्रहरणधारिणी। कमला कमलदलविहारिणी। वाणी विद्यादायिनी' या काव्यात्मक पंक्ती लिहिल्या आहेत. वंदे मातरममधील देवीच्या आराधनेच्या या कडव्याबद्दल काँग्रेस आणि काही संघटनांनी आक्षेप घेतले होते.

उत्सवाला मान्यवरांची हजेरी आहे. राज्याचे मुख्यमंत्री देवेंद्र फडणवीस संघाच्या विजयादशमी उत्सवात स्वयंसेवकांच्या पूर्ण गणवेशात उपस्थित आहेत. केंद्रीय मंत्री नितीन गडकरीही पूर्ण गणवेशात या उत्सवात सहभागी होण्यासाठी आले आहेत. राज्याचे महसूल मंत्री चंद्रशेखर बावनकुळे हेही स्वयंसेवकांच्या पूर्ण गणवेशात उपस्थित आहेत.

राज्य अल्पसंख्याक आयोगाचे अध्यक्ष प्यारे खान हेदेखील संघाच्या या कार्यक्रमात उपस्थित आहेत. संघाच्या निमंत्रणावरून ते विजयादशमी उत्सवात आले असल्याची माहिती आहे.