नागपुरात भरदिवसा वृद्धाच्या हातातील ५० हजार रुपयांची बॅग हिसकावली

नागपुरातील गिट्टीखदान पोलीस स्टेशनच्या हद्दीत भरदिवसा बॅग लिफ्टिंगचा प्रकार घडला आहे. दीपक नगर भागातील नागभूमि सोसायटीच्या रेडियंट अपार्टमेंटच्या आवारात एका अज्ञात आरोपीने ७० वर्षांच्या वृद्धाच्या हातातील बॅग हिसकावली आणि तो तिथून पसार झाला. त्या बॅगेत ५० हजार रुपये रोख आणि काही महत्त्वाची कागदपत्रे होती.

आरोपीला पकडण्यासाठी वृद्धाने त्याचा पाठलाग केला, पण तोल गेल्याने ते खाली पडले आणि आरोपीला पकडता आले नाही. ही संपूर्ण घटना अपार्टमेंटमध्ये लावलेल्या सीसीटीव्ही कॅमेऱ्यात कैद झाली आहे.

ज्ञानेश्वर नाईक असे या वृद्धाचे नाव आहे. ते २६ ऑक्टोबर रोजी फेडरल कॉलनीतील इंडियन बँकेत गेले होते. तिथे त्यांनी आपल्या पेन्शन खात्यातून १.५० लाख रुपये काढले आणि ते घरी परतत होते. त्यातले ५० हजार रुपये त्यांनी एका बॅगेत ठेवले होते, तर उरलेली रक्कम पँटच्या खिशात होती.

घरी पोहोचल्यानंतर नाईक अपार्टमेंटच्या आवारात लिफ्टजवळ उभे होते. तेवढ्यात दुचाकीवरून आलेल्या एका अज्ञात आरोपीने त्यांच्या हातातली रोख रकमेची बॅग झटक्यात हिसकावली आणि वेगाने निघून गेला.

बॅगेत ५० हजार रुपयांशिवाय बँकेची पासबुक, चेकबुक आणि पेन्शन पेमेंट ऑर्डर बुकही होती. प्रकार घडल्यावर नाईक यांनी आरोपीला पकडण्यासाठी त्याच्या मागे धाव घेतली. पण तोल गेल्याने ते खाली पडले. या दरम्यान आरोपी तिथून निसटण्यात यशस्वी झाला.

घटनेची माहिती मिळाल्यानंतर गिट्टीखदान पोलिसांनी अज्ञात आरोपीविरुद्ध गुन्हा दाखल केला आहे. आरोपीचे वय सुमारे ३० ते ३५ वर्षे असल्याचे सांगितले जात आहे. पोलीस अपार्टमेंटमधील सीसीटीव्ही कॅमेऱ्यांचे फुटेज तपासून आरोपीची ओळख पटवण्याचा आणि त्याला पकडण्याचा प्रयत्न करत आहेत.

प्राथमिक माहितीनुसार, आरोपी बँकेपासूनच नाईक यांच्या मागावर होता, अशी शक्यता व्यक्त केली जात आहे. पोलीस या प्रकरणाचा पुढील तपास करत आहेत.